Josué 5 - Chayahuita (Shahui)

Quiricaroquë marca niacotopisoꞌ

¹ Cortaniiꞌ quëran piꞌi yaꞌconinso parti noꞌpaquë, nisha nisha copirnoroꞌsa yaꞌhuëpi. Amoro copirnoroꞌsaꞌ, Canaan copirnoroꞌsaꞌ, inapita yaꞌhuëpi. Amororoꞌsasoꞌ, Cortaniiꞌ yonsan parti yaꞌhuëpi. Cananoꞌsantaꞌ, marë Pancaiꞌ parti yaꞌhuëpi. Yaꞌipi inapita natantopi: “Siniorori Cortaniiꞌ ayanirin. Inapotasoꞌ, israiroꞌsanta pëntontopi,” topi. Ina natantatonaꞌ, naꞌcon naꞌcon paꞌyanpi. Napoaton co nanitopihuëꞌ israiroꞌsa chinitacaisoꞌ.

² Naporo tahuëriꞌsa Siniorori Cosoi itapon: “Naꞌpi quëran cosoroaꞌhuaroꞌsa niquëꞌ. Inaquë israiroꞌsa marca acotëquëꞌ,” itërin.

³ Napotohuachina cosoroaꞌhuaroꞌsa nisahuaton Israiro quëmapiꞌsa marca acotërin. Araroti motopi itopiquë napotërin.

^4-6 Iráca Iquipitoquë yaꞌhuëasoi chachin israiroꞌsa marca acotopi. Mashoroꞌsaꞌ, huaꞌhuaroꞌsaꞌ, yaꞌipi acotopi. Catapini shonca piꞌi inotëro parti paꞌtasoi huaꞌhuatopisopitasoꞌ, co acotopihuëꞌ. Iquipito quëran mashoroꞌsa pipipisopitasoꞌ co Sinioro natëpihuëꞌ. Napoaton inari shaꞌhuitërin: “Shimashonëmapita iráca shaꞌhuitërahuë: ‘Caso Sinioroco niꞌto, noꞌtëquën shaꞌhuitaranquëmaꞌ. Aꞌna tahuëri shiparimapita iso noꞌpaꞌ co manta pahuaninsohuëꞌ quëtarahuë,’ itërahuë. Napotopirahuë, canpitaso co natëramacohuëꞌ. Napoaton caso Sinioroco niꞌto, noꞌtëquën shaꞌhuitaranquëmaꞌ. Canpitaso co inaquë yaꞌconaramahuëꞌ,” itërin. Napotërinso chachin, inapitaso inotëro parti taquipi. Inapoatona ipora Cortaniiꞌ pëntontopisopitasoꞌ naꞌcon naꞌcon co marcahuanyántërapihuëꞌ.

⁷ Napoaton Cosoi camaitërin inapita marca acotacaisoꞌ. Co natëtatonaraihuëꞌ taquipisopita huiꞌninaꞌ, acotapi. Inapitasoꞌ paꞌpina yaꞌhuërënamën Siniorori Canaan noꞌpaquë poꞌmoarin. Inotëro parti paꞌsápatona co acotopihuë niꞌton, inapotapi huachi.

⁸ Nani yaꞌipi acotohuachinara, noyatai huarëꞌ inaranchin chinotopi.

⁹ Naporoꞌ Siniorori Cosoi itapon: Iquipitoroꞌsa marëꞌ israiroꞌsa sacatatonaꞌ, taparo nisápirinahuëꞌ, cari inquitërahuë huachi. Iporasoꞌ marcahuanatonaꞌ, co huachi taparo nipihuëꞌ. Napoaton ina roꞌtësoꞌ, Quiricaro, itopi.

¹⁰ Israiroꞌsasoꞌ inaquëranchin yaꞌhuëasoiꞌ, pascoa pita naꞌhuëpi. Catapini tahuëri pochin inaquë yaꞌhuëasoiꞌ, iꞌhuanahuanquë nispiratapi. Quiricarosoꞌ, Quirico ninano canonamatëquë yaꞌhuërin.

¹¹ Naporo tahuëri chachin pan co ahuëpocatopinanhuëꞌ caꞌpi. Triconta iyanapinan caꞌpi. Tahuëririnquëso nipirinhuëꞌ, Canaan noꞌpaquë shaꞌtopisoꞌ nitërinsoꞌ caꞌpi huachi.

¹² Naporo quëran huarëꞌ mana copi tënin huachi. Napoaton israiroꞌsasoꞌ, co huachi onporo tëranta ina caꞌpihuëꞌ. Naporo piꞌi quëran huarëꞌ, Canaan noꞌpaquë shaꞌtopisoꞌ nitërinsoꞌ caꞌpi.

Sinioro sontaronënpita huaꞌanën quënaninsoꞌ

¹³ Aꞌna tahuëri Cosoisoꞌ, Quirico ninano yaꞌcari nisarin. Inaquë niꞌsoꞌ aꞌnanaya aꞌnara quëmapi niꞌnin. Sahuëninën sëꞌquërin quëran ina notënan quëran huaniárin. Yaꞌcarirahuaton Cosoiri natanin: ¿Inta quëma catahuaran? israiroꞌsacoi catahuarancoi: ¿Inimiconëhuëipita nica? itërin.

¹⁴ Napotohuachina, inariso itapon: —Co canpita catahuaranquëmahuëꞌ. Co inimiconëma tëranta catahuarahuëꞌ. Sinioro sontaronënpita huaꞌanënco nicato oꞌmarahuë, itërin. Ina natanaton, Cosoiso isonin quëran noꞌpaquë huarëꞌ monshorin. Monshorinquëranchin nataantarin: —Caso quëma piyapinën pochinco ninahuë. ¿Maꞌta Sinioro nohuantëran nicaꞌhuasoꞌ? itërin.

¹⁵ Napotohuachina, inariso itapon: ¡Isëquë yaꞌnotëranquën niꞌton, sapatën ocoirahuaton chinotoco! itërin. Ina natanaton, Cosoiso inaquë chinotërin.