Josué 4 - Chayahuita (Shahui)

Shonca cato naꞌpiroꞌsa Cortaniiquë mapisoꞌ

¹ Yaꞌipi israiroꞌsa pëntonpachinara, Siniorori Cosoi itapon: “Shonca cato Israiro quëmapiꞌsa huayonquëꞌ. Nani huënton quëran aꞌnaya aꞌnaya huayonquëꞌ.

^2-3 Nani huayonpatan, naꞌpiroꞌsa ocoicaiso camaiquëꞌ. Cortaniiꞌ yanirinquë masahuatonaꞌ, shonca cato ocoiꞌinaꞌ. Corto huaꞌanoꞌsa huaniapitaquëran ocoiꞌinaꞌ. Ocoirahuatonaꞌ, ipora tashi chinotaramaquë quëpaꞌinaꞌ,” itërin.

⁴ Napotohuachina, Cosoiso shonca cato quëmapiꞌsa huayoninso përarin.

⁵ Huëꞌpachinara itapon: “Cortaniiꞌ yanirinquë huancanaquë huarëꞌ, pacoꞌ. Sinioronënpoa caposonën notënanquë aꞌnaya aꞌnayama aꞌnara naꞌpi macoꞌ. Israiroꞌsanpoasoꞌ, shonca cato huënton ninëhuaꞌ. Napoaton, aꞌnaya aꞌnaya mapatamaꞌ, shonca cato yaꞌipiya quëran naniarin.

^6-7 Catahuainpoaso marëꞌ Siniorosoꞌ Cortaniiꞌ patomairin. Chini chiníquën nanantaton naporin. Ina ayonquiinpoaso marëꞌ, iso naꞌpiroꞌsa imoarëhuaꞌ. Aꞌna tahuëri huiꞌnamapita natanarinquëmaꞌ: ‘¿Maꞌta tapoma iso naꞌpiroꞌsa imoramaꞌ?’ itaponënquëmaꞌ. Napotohuachinënquëmaꞌ: ‘Yosë yonquiaꞌhuaiso marëꞌ imorai. Iráca corto huaꞌanoꞌsari, Sinioro caposonën pitënpi quëran Cortaniiꞌ pëntontacaiso marëꞌ iꞌnaitomapi. Iꞌnaitasoi chachin iꞌ nipatomairin. Inaporin niꞌton, noꞌpaꞌ paꞌtatoi pëntonai,’ itaramaꞌ,” itërin.

⁸ Napotohuachina, inahuaso Cosoiri camairinso chachin nipi. Paꞌsahuatonaꞌ, naꞌpiroꞌsa Cortaniiꞌ yanirinquë mapi. Israiroꞌsasoꞌ shonca cato huënton niꞌton, shonca cato mapi. Aꞌnaya aꞌnaya huënton marëꞌ aꞌnara naꞌpi mapi. Masahuatonaꞌ, chinotai marëꞌ nëꞌmëtë pëinëna ótënpiquë imopi. Siniorori Cosoi camairinso chachin nipi.

⁹ Naporahuaton Cosoisoꞌ, shonca cato naꞌpi chachin maantarin. Ina naꞌpiroꞌsasoꞌ, corto huaꞌanoꞌsa Siniororëꞌ anoyatopiso caposonën pitënpi quëran huanipitaquëchin, aꞌmitë aꞌmitëtërin. Ina naꞌpiroꞌsasoꞌ, iso quirica ninshitasoco huarëntaꞌ, inaquëranchin yaꞌhuapi.

¹⁰ Siniorori Cosoi quëran israiroꞌsa camairin. Yaꞌipi camaitërinso nicasoi corto huaꞌanoꞌsasoꞌ, Cortaniiꞌ yanirinso huáncana huanirápi. Siniororëꞌ anoyatopiso caposonën, pitënpi quëran huanirápi. Moisësënta ina pochin Cosoi camairin niꞌton, inapochin nipi. Manorahuatonaꞌ, Cortaniiꞌ yanirinso pëntontopi.

¹¹ Naní quëran pëntonpachinara, corto huaꞌanoꞌsanta pëntonpi huachi. Siniororëꞌ anoyatopiso caposonën, pitënpi quëran pëntonpi. Nani pëntonahuatona naquëranchin quëchitaantapi.

¹² Nopino, Cato, inapita Israiro huëntonoꞌsantaꞌ pëntonpi. Manasisi patoma huënton israiroꞌsantaꞌ, napopi. Moisësëri camairinso chachin noyá niacorahuatona pëntonpi. Inahuaꞌton quëchitapi.

¹³ Catapini shonca huaranca israiroꞌsa ahuëtai marëꞌ noyá niacopi. Inaporahuatonaꞌ, Sinioro caposonën notënanquë naꞌhuëpi. Paꞌsahuatonaꞌ, Quirico canonamatë parti notëtopi.

¹⁴ Naporo tahuëri yaꞌipi israiroꞌsa niꞌtonënquë, Siniorori Cortaniiꞌ ayanirin. Ina nicatona Cosoi paꞌyatopi. Chiminaquë huarëꞌ paꞌyatatonaꞌ, tëꞌhuatapona huachi. Moisësë napotopiso pochachin, Cosointa nitapi.

¹⁵ Naporoꞌ Siniorori Cosoi camairin:

¹⁶ “Corto huaꞌanoꞌsa canpitaroꞌco anoyatërahuësoꞌ caposonën pitënpi quëran Cortaniiꞌ yanirinso huáncana huanipisoꞌ, camaiquë pipiinaꞌ,” itërin.

¹⁷ Napotohuachina, Cosoisoꞌ pipicaiso marëꞌ camaitërin.

¹⁸ Corto huaꞌanoꞌsa pipihuachinara, naquëranchin Cortaniisoꞌ, inachachin niantarin. Coꞌhuara yaniyátëraponhuëꞌ paquiitërinso pochachin niantarin.

¹⁹ Pascoa yoquiquë shonca tahuëritapasoꞌ, israiroꞌsa Cortaniiꞌ yanirin quëran pëntonpi. Pëntonahuatona Quiricaro itopiquë chinotai marëꞌ nëꞌmëtë pëinëna ótëantapi. Quiricarosoꞌ Quirico quëran, piꞌi pipirinso parti quëparitërin.

²⁰ Inaquë Cosoi naꞌpiroꞌsa Cortaniiꞌ quëran ocoipisoꞌ, aꞌmitë aꞌmitëtërin. Shonca cato chachin napotërin.

²¹ Naporahuaton israiroꞌsa itapon: “Aꞌna tahuëri huiꞌnamapita natanaponquëmaꞌ: ‘¿Maꞌta tapoma isopita naꞌpiroꞌsa aꞌmitë aꞌmitëtëramaꞌ?’ itaponënquëmaꞌ.

^22-23 Napotohuachinënquëmaꞌ: ‘Yosë yonquiaꞌhuaiso marëꞌ aꞌmitë aꞌmitëtërai. Iráca Sinioro caposonën, corto huaꞌanoꞌsari pitënpi quëran Cortaniiꞌ pëntontacaiso marëꞌ iꞌnaitomapi. Iꞌnaitasoi chachin Sinioro nohuanton iꞌ nipatomairin. Inaporin niꞌton, noꞌpaꞌ paꞌtatoi pëntonai. Iráca chachionta pëntonaꞌhuaiso marëꞌ Quëhuaiꞌ marë patomairin. Inapotasoꞌ, noꞌpaꞌ paꞌtatoi pëntonai. Inapochachin Cortaniinta nitërin,’ itaramaꞌ.

²⁴ Ina pochin shaꞌhuihuatamaꞌ, yaꞌipi isoroꞌpaquë nisha nisha piyapi nipisopita Sinioro chini chiníquën nanantërinso nitotaponaꞌ. Naporahuaton canpitantaꞌ, ‘Sinioroso Yosënënpoa niꞌton, noya nicatëhua natërápaso yaꞌhuëchinpoaꞌ,’ tosaramaꞌ,” itërin Cosoiri.