Josué 10 - Chayahuita (Shahui)

Amororoꞌsa canapisoꞌ

¹ Cosoisoꞌ israiroꞌsarë chachin Quirico ataꞌhuantopi. Ina piquëran Ai ninano yaꞌhuërëꞌ, inapotaantapi. Capaon ninanoquë yaꞌhuëpisopitasoꞌ, ina natantopi. Ina natantatonaꞌ, ama israiroꞌsarëꞌ niahuëcaiso marëhuëꞌ, anoyatopi. Anoyatopi niꞌton, inapitarëꞌ yaꞌhuëpi. Ina yaꞌcari aꞌnanta ninano yaꞌhuërin. Quirosarin itopiso. Copirnonënsoꞌ, Atonisi itopi. Inaso piyapinënpitarë chachin israiroꞌsa canatëriapiso natantatonaꞌ, paꞌpi paꞌyanpi. Paꞌyanatonaꞌ:

² “Capaonsoꞌ, panca ninanoꞌ. Ai ninano quëran panca panca. Naporahuaton noya noya ninin. Copirnoroꞌsa ninano huaꞌanëntopiso pochin niconin. Piyapinënpitanta noyá nitotopi ahuëtacaiso niponaraihuëꞌ napopi,” topi.

^3-5 Catapini Amoro copirnoroꞌsa ina yaꞌcariya yaꞌhuëpi. Aꞌnasoꞌ, Oamo itopi. Inasoꞌ copirno, Iporon ninanoquë huaꞌanëntërin. Aꞌnantaꞌ, Piran itopi. Inasoꞌ, Carmoto ninano itopiquë huaꞌanëntërin. Aꞌnantaꞌ, Cahuia itopi. Inasoꞌ, Naquisi ninano itopiquë huaꞌanëntërin. Aꞌnantaꞌ, Tipiri itopi. Inasoꞌ, Icoron ninano itopiquë huaꞌanëntërin. Inapita copirnoroꞌsa Atonisiri piyapinënpita quëran nanan aꞌpatërin: “Copirnonëhuëi naporin: ‘Capaon ninanoquë yaꞌhuëpisopita Cosoi, israiroꞌsaꞌ, inapitarëꞌ nani anoyatopi. Ama niahuëcaiso marëhuëꞌ inapopi. Napoaton huëco paꞌahua Capaonoꞌsa ahuëcaꞌhuaiso catahuacoi,’ tënin,” itopi. Napotohuachinara, nohuantopi. Inapoatona aꞌnatërápo Amoro copirnoroꞌsa sontaronënapitarë chachin Capaon paapapi. Inaquë yaꞌhuëpisopita ahuëcaiso marëꞌ paꞌpi.

⁶ Ina nicatona Capaonquë yaꞌhuëpisopitasoꞌ, Cosoi shaꞌhuitacaiso marëꞌ aꞌnara aꞌpapi. Quiricaroquë nincantahuaton shaꞌhuitonin: “Yaꞌipi amoro copirnoroꞌsaꞌ motopiroꞌsa parti yaꞌhuëpisoꞌ, nihuëntonpi. Nihuëntonahuatona ahuëinacoiso marëꞌ oꞌmapi. Nani anoyatërëhua piyapinëma nicaꞌhuaisoꞌ nichinapon chachin nosorocoi. Nosoroatoncoi sontaronënpitarëꞌquën chachin huëquë manóton inapita quëran paꞌpoyacoi,” itërin.

⁷ Napotohuachinara, Cosoiso yaꞌipi sontaronënpita ayontonin. Aꞌnaquën sontaroꞌsasoꞌ, noya noya ahuëtopi. Inapitanta Quiricaroquë ayontonin.

⁸ Coꞌhuara Capaonquë paꞌshátërasoihuëꞌ, Siniorori Cosoi itapon: “Ama amororoꞌsa tëꞌhuatëquësohuëꞌ. Carinquën catahuaranquën yaꞌipi inapita minsëamasoꞌ,” itërin.

⁹ Siniorori shaꞌhuitohuachina, Cosoisoꞌ yaꞌipi sontaronënpitarë chachin Quiricaro quëran paꞌpi. Tashi pantarápatonaꞌ, amororoꞌsa co yonquiasoihuëꞌ ahuëcontapi.

¹⁰ Sinioro nohuanton amororoꞌsa paꞌpi paꞌyanpi. Inapohuachinara, Cosoisoꞌ sontaronënpitarë chachin, notohuaroꞌ amororoꞌsa tëpapi. Capaon ninano tancapitapirinahuëꞌ, inapotopi. Aꞌnaquën amororoꞌsaso taꞌapirinahuëꞌ, israiroꞌsari imapi. Piti-oron ninanoquë ira paꞌninso parti imapi. Aꞌnaquëonta Asica ninanoꞌ, Maquita ninanoꞌ, inapita ninanoroꞌsa yaꞌhuërinso parti huarëꞌ taꞌapi. Napopirinahuë israiroꞌsari imatona notohuaroꞌ tëpapi.

¹¹ Piti-oron ninano yaꞌcariꞌ, aꞌna nicotoana yaꞌhuërin. Inataquëchin aꞌnaquën amororoꞌsasoꞌ, israiroꞌsa tëꞌhuatatona paꞌmapi. Ina paꞌtomasoi, Siniorori chachin inápa quëran notohuaroꞌ panca naꞌpiroꞌsa aꞌpatiimarin. Ocai pochin aꞌpatiimarin. Ina naꞌpiroꞌsari notohuaroꞌ tiquirin. Israiroꞌsari sahuëniquë tëpapi quëran naꞌcon naꞌcon tiquirin.

¹² Sinioro nohuanton israiroꞌsari amororoꞌsa canapi. Naporo tahuëri chachin Cosoi Yosë nontërin. Sontaronënpita natantonënquë Sinioro nontaton, tapon: “Piꞌi, Capaon ninanoquë tachitëquëꞌ. Quëmanta yoqui, Acaron motopianaquë tachitëquëꞌ,” itërin.

¹³ Napotohuachina: Piꞌi, yoqui, inapitanta tachitopi. Israiroꞌsari inimiconënpita minsëai huarëꞌ tachitopi. Ina chachin noya ninaꞌpi itopisonta quiricaquë ninshitërinso naporin. Naporo piꞌi, camotëchin nisarin. Nisaponahuëꞌ, aꞌna tahuërira pochin tachitaton, co huachi manorinhuëꞌ yaꞌconacasoꞌ.

¹⁴ Iráca quëran huarëꞌ co ina pochin tahuëri yaꞌhuëchininhuëꞌ. Ina piquëraonta co huachi ina pochin tahuëri yaꞌhuëantarinhuëꞌ. Naporoíchin Sinioro aꞌna piyapiri nontërinsoꞌ, poꞌpin aꞌpanirin. Sinioro chachin israiroꞌsa catahuaton ahuëtarin niꞌton, naporin.

¹⁵ Ina quëran Cosoisoꞌ, israiroꞌsarë chachin Quiricaroquë paꞌmantapi.

^16-43 (-)