Jonás 4 - Chayahuita (Shahui)

Yosëri piyapiꞌsa nosorochináchin cancantërinsoꞌ

^1-5 Ina quëran Conasëso ninano quëran pipirahuaton, piꞌi pipirinso parti paꞌnin. Aquëmiachin paponahuëꞌ, ninanoso noya yaꞌnorin. Inaquë aꞌnara imënamëaꞌhuaya pochin huënsëaton naꞌicaso marëꞌ acorin. Inaporahuaton naꞌyapon pochin: “¿Maꞌtama ninano onpoꞌinpaꞌ?” tënin. Yosëri ninihuiroꞌsa nosoroaton nichaꞌërinsoꞌ, Conasëso niꞌnin. Ina nicaton paꞌpi noꞌhuitërin. Napoaton iso pochin Yosë nontërin: —Niꞌquë Sinioro. Quëmaso noyápiachin cancantaton aꞌnaroáchin yanosorotëran. Naporahuaton co aꞌnaroáchin noꞌhuitëranhuëꞌ. Piyapiꞌsa paꞌpi nosororan niꞌton, anaꞌintacaso shaꞌhuitaponahuëꞌ, co noyahuëꞌ nipiso aꞌpohuachinara, co huachi anaꞌintaranhuëꞌ. Inapochin ninansoꞌ, yaꞌhuërahuëquë chachin nani nitotërahuë. Napoaton naporo camaihuatancora, aꞌnaroáchin Tarsisꞌpaꞌ taꞌarapirahuëꞌ: “Ninihuiroꞌsaso inimiconëhuëipita niꞌtonaꞌ, ama co noyahuëꞌ nipiso aꞌpoꞌinasohuëꞌ. Yosëri ataꞌhuantochaꞌin,” taꞌto naporahuë. Iporaso tantiarahuëso chachin ninan. Napoaton Sinioro tëpachinaco huachi. Ca marësoꞌ, chiminaꞌhuaso noya noya tënahuë, itërin. Siniororiso napoaponahuëꞌ: —¡Co inapochin noꞌhuitacaso yaꞌhuërinhuëꞌ! itërin.

⁶ Yosëso Sinioro niꞌton, Conasë anaꞌitacaso marëꞌ aꞌnara nonirintë naꞌton pochin nininso apapotërin. Inapotahuaton aꞌna tashiya marëáchin imënamëaꞌhuaya asoꞌquëëtërin. Inapotohuachina, noyá imorapitërin. Napoaton Conasësoꞌ, nonirintë marëꞌ paꞌpi noya cancantërin.

⁷ Napopirinhuëꞌ, tahuëririnquë tashíramiachin Sinioroso aꞌnara chaꞌcho nonirintë aꞌtonacaso marëꞌ camairin. Inapotohuachina aꞌnaroáchin ahuirin.

⁸ Piꞌi pipihuachina Yosësoꞌ: “¡Ipora tahuëri paꞌpi chiníquën piꞌi piꞌcachin!” tënin. Napohuachina, paꞌpi chiníquën piꞌi piꞌcataton Conasë yatëparin. Piꞌi tapinantochináchin ninatanaton yachiminin: —Chiminahuë naporini, noya noya niitonhuëꞌ, tënin noꞌhuitaton.

⁹ Yosëriso napoaponahuëꞌ: —Nonirintë ahuirinso marëꞌ ¡co inapochin noꞌhuitacaso yaꞌhuërinhuëꞌ! itërin. —Noya mini tënahuë casoꞌ. Chiminchináchin noꞌhuitërahuë, itërin Conasëri.

¹⁰ Naporo Siniorori: —¡Maꞌhuantacha quëmaso yonquiran paya! Co quëmari nonirintë shacaton asoꞌsoranhuëꞌ. Co piꞌpian tëranta inaquë sacatëranhuëꞌ. Inasoꞌ, ca nohuanton aꞌna tashiya marëáchin soꞌsorahuaton, aꞌna tahuëriíchin anaꞌitërinquën. Tahuëririnquësoꞌ, ahuiantarin. Napopirinhuëꞌ, ina nosoronënquë ahuirinso marëꞌ aꞌpitaton noꞌhuitëran.

¹¹ Aquëtë huarëꞌ mini casoꞌ, Ninihui ninanoquë yaꞌhuëpisopita nosorocaꞌhuaso yaꞌhuërin. Inasoꞌ panca ninano niꞌton, pasa cato shonca huaranca naꞌcon piyapiꞌsa yaꞌhuërin. Inapitasoꞌ, huaꞌhuaroꞌsa co manta nitotatonaraihuëꞌ tëhuëpiso pochin nipi. Naporahuaton notohuaroꞌ pëꞌtahuaroꞌsanta yaꞌhuërin, itërin.