Jonás 1 - Chayahuita (Shahui)

Yosëri Conasë Ninihui ninanoquë aꞌparinsoꞌ

¹ Israiro noꞌpaquë aꞌnara pënëntonaꞌpi yaꞌhuërin, Conasë itopisoꞌ. Paꞌpinsoꞌ, Amitai itopi. Aꞌna tahuëri Conasësoꞌ, Siniorori camairin:

² “Ninihuisoꞌ, panca ninanoꞌ. Napoaponahuë inaquë yaꞌhuëpisopitasoꞌ, co imatonacohuë paꞌpi co noyahuëꞌ nipi. Napoaton inaquë paquëꞌ. Paꞌsahuaton ataꞌhuantaꞌhuaso yonquirahuësoꞌ, shaꞌhuiconquëꞌ,” itërin.

³ Napotopirinhuëꞌ, Conasëso co inaquë pacatonhuëꞌ, niquë paꞌnin. Sinioro yataꞌananpiton, Copë ninano nonshinanquë paꞌmarin. Inaquë nipachina, aꞌnara panca nancha Tarsis ninanoquë yapaꞌsarinsoꞌ, quënanconin. Inanta pahuërëtahuaton, Sinioro taꞌananpicaso marëꞌ imatërin.

⁴ Marë huancoanaiꞌ paꞌsapirinahuëꞌ, Sinioro nohuanton panca ihuaiꞌ paꞌnin. Napohuachina, panca coꞌsacaitërin. Napoaton: “Ipora tëhuënchinso nancha yaꞌquiapon,” topi yonquiatonaꞌ.

⁵ Coꞌhuara inapoyátërasohuëꞌ, Conasëso pëꞌpëto quëpapiquë yaꞌcomarahuaton huëꞌësárin. Nancha quëpanaꞌpiroꞌsantaꞌ, paꞌpi paꞌyanpi. Napoatonaꞌ, mamanshinënapitari nichaꞌëcaiso marëꞌ nontopi. Nontopirinahuëꞌ, co yasanoirinhuëꞌ. Napohuachina, nancha niotëintacaso marëꞌ pëꞌpëto quëparapisoꞌ, tëꞌyaitopi.

⁶ Nancha huaꞌanënsoꞌ, pëꞌpëto quëpapiquë yaꞌcomarahuaton niꞌpirinhuëꞌ, Conasë huëꞌësárin quënamarin. Quënamarahuaton: —¡Capayatëquë huëꞌëitëꞌ! ¡Paꞌpi huëhuëpiro nisarëhuaꞌ! Huënsëaton Yosëparin nontëquëꞌ. Tapona ina yanichaꞌësápirinpoahuëꞌ, itërin.

⁷ Huaꞌani napotohuachina, Conasënta pipiintarin. Nancha quëpanaꞌpiroꞌsasoꞌ: —Insosona naꞌinin quëran poꞌsarëhuaso nitotacaso marëꞌ, nicanarëhuaso pochin nicatëhua nitotahuaꞌ, niitopi. Inapohuachinara, Conasë naꞌininsoꞌ, nitotopi.

⁸ Napoatonaꞌ: —Shaꞌhuitocoi: ¿Maquëta tëhuëran niꞌton, poꞌsarëhuaꞌ? ¿Maquëta sacatëran? ¿Intohuaranta huëꞌsaran? ¿Ma noꞌpaquëta yaꞌhuëran? ¿Ma piyapinquënta ninan? inapita shaꞌhuitocoi nitochi, itopi.

⁹ —Caso iprio piyapico niꞌto, Sinioro chinotërahuë. Inaso Yosë, inápaquë huaꞌanëntërin. Inari chachin isoroꞌpaꞌ, marëꞌ, inapita acorin.

¹⁰ Sinioro camairincoso co natëtohuëꞌ, taꞌananpiarahuë, itërin Conasëri. Inapitariso paꞌyanatonaꞌ: —¡Maꞌhuantacha quëmaso ninan paya! ¡Co napoitonhuëꞌ pora! itopi.

¹¹ Aquë aquëtë marë coꞌsacaitarinso nicatonaꞌ, naꞌcon naꞌcon paꞌyanpi. Napoatonaꞌ, Conasë nataantapi: —¿Maꞌta onpotohuatëinquën marë coꞌsacaitërinso copi tapon? itopi.

¹² —Tëhuënchachin ca naꞌinahuëso marëꞌ poꞌsarëhuaꞌ. Napoaton tëꞌyaitoco. Naporo huarëꞌ marë sanoiarin, itërin Conasëri.

¹³ Inaso napopirinhuëꞌ, inapitaso yonsanꞌpaꞌ yaꞌcaritacaiso marëꞌ chiníquën maitopi. Napopirinahuëꞌ, co nanitopihuëꞌ. Marë aquë aquëtë coꞌsacaitarin niꞌton, co nanitopihuëꞌ.

¹⁴ Napohuachina, Sinioro nontopi huachi: “Sinioro. Quëmaso nohuantëransoráchin ninan. Iso quëmapi naꞌinin quëran poꞌsarai nipachina, ama yaꞌipicoi taquiitaꞌhuaiso nohuantëquësohuëꞌ. Yaꞌhuërëꞌ inaso co manta tëhuëpirinhuëꞌ tëꞌyaitohuatoi, chimanapon. Napohuachin, ama ina naꞌinchincoisohuëꞌ,” itopi.

¹⁵ Inapoatona Conasë tëꞌyaitopi. Naporo chachin marë sanoirin.

¹⁶ Ina nicatonaꞌ, Sinioro chinotopi. Yaꞌipi cancanëna quëran chinotatonaꞌ: “Maꞌsha quëma marëꞌ tëparahuatoi chinotarainquën,” itopi.

Yosëri Conasë nichaꞌërinsoꞌ

¹⁷ Coꞌhuara tëꞌyaichátërasoihuëꞌ, Sinioroso aꞌnara panca sami Conasë miꞌtacaso marëꞌ camairin. Inapotohuachina, cara tahuëri tashirë chachin ina yoꞌnamënquë yaꞌhuërin.