Joel 2 - Chayahuita (Shahui)

Anaꞌintacaso tahuëri

¹ Quirosarin ninanosoꞌ, Siniorori huayonin. Inaquë pëinën yaꞌhuëcaso marëꞌ huayonin. Inaquë niyátainpichin yaꞌhuëcaiso marëꞌ aꞌpaito sontaroꞌsari, tronpita pihuitona huëhuëpiro huëꞌsarinso shaꞌhuiinaꞌ. Ina natanpisopitantaꞌ, chiníquën “yai,” taꞌtona naporinso aꞌnapita israiroꞌsa shaꞌhuichinaꞌ. Co huaꞌquiya quëranhuë Sinioro anaꞌintiinpoaso tahuëri naniarin. Napoaton yaꞌipi Cota huëntonquë yaꞌhuëpisopita paꞌyanatona ropachinaꞌ.

² Ina tahuëri nanihuachin huëhuëpiro tashinantápon. Chitorori piꞌiroꞌtë iꞌcopitohuachina tashinantërinso pochin nisarin. Panca sontaroꞌsa huënton chiníquënoꞌsaráchin huëꞌsapi. Motopiroꞌsataquëchin pantërërahuatona huëꞌsapi. Tahuëririahuachina aꞌpininso pochin niriapi. Iráca quëran huarëꞌ co insonta ina pochin niꞌchininhuëꞌ. Aꞌna tahuërinta co huachi ina pochin niꞌsapihuëꞌ.

³ Ina sontaroꞌsasoꞌ, pën aꞌnaroáchin maꞌsha ahuiquitërinso pochin yaꞌipi quënanpisoꞌ pëꞌyarapi. Coꞌhuara naꞌhuëyátërasoihuëꞌ, nani maꞌsha huiquitërantarin. Nani naꞌhuëpi piquëraontaꞌ, pën co sanoarinhuëꞌ. Coꞌhuara inapita canquiátërasoihuëꞌ, isoroꞌpaso noyápiachin nararo pochin nipirinhuëꞌ. Inapita naꞌhuëhuachina, topinan iꞌhuananárin patapi. Co maꞌshari tëranta chaꞌëtaponhuëꞌ.

⁴ Ina sontaroꞌsasoꞌ, cahuarioroꞌsa pochin yaꞌnoponaꞌ. Cahuarioquë paꞌnapi sontaro pochin chiníquën taꞌaponaꞌ.

⁵ Motopiroꞌsaquë niitona yanpon topachinaꞌ, chiníquën tënëntaponaꞌ. Quira toronanoꞌsa taꞌahuachinara huanërëntërinso pochin nisapi. Nara yanimë huëyahuachina, tënëntërinso pochin niponaꞌ. Chiníquën sontaroꞌsa huënton niahuëcaiso marëꞌ noyá niacopiso pochin nisapi.

⁶ Canquirapiso nicatonaꞌ, yaꞌhuëhuanoꞌsaso shaꞌpitaponaꞌ. Paꞌpi tëꞌhuatatona ropataponaꞌ.

⁷ Inimicoroꞌsasoꞌ, ahuëchantopiso sontaroꞌsa pochin ahuëtacaiso marëꞌ taꞌaponaꞌ. Pairaroꞌsanta nanpëtaponaꞌ. Co pëshonponaraihuëꞌ, noꞌtëquën paꞌsapi.

⁸ Co niyaꞌtataponaraihuëꞌ, aꞌnaya aꞌnaya noꞌtëquën paꞌsapi. Onponta pëchinanquë shinërë tëꞌyanantapirinahuëꞌ, pantërëpiquëranchin paꞌsapi.

⁹ Quirosarin ninano yaꞌcontapi. Pairanën aipi taꞌarapi. Pëiroꞌsaquë nanpërapi. Huintanaroꞌsataquëchin ihuatë pochin pëiquë yaꞌconapi.

¹⁰ Yaꞌipi isoroꞌpaquë yaꞌhuëpisopita paꞌyanatonaꞌ, Sinioro notënanquë ropataponaꞌ. Piꞌiroꞌtënta nacon nacontapon. Piꞌi, yoqui, inapitanta tacopiapon. Tayoraroꞌsanta co huachi aꞌpinaponhuëꞌ.

¹¹ Sinioronta pinën quëran sontaronënpita acorahuaton, huira pochin chiníquën nonsarin. Huaꞌhuayátërahuë sontaronënpita yaꞌhuëtërin. Natërinsopitasoꞌ, co pichichináchinhuëꞌ. Sinioro anaꞌintiinpoaso tahuëri nanihuachin, ¡ma huëhuëpirocha nisarin paya! Ina tahuëri nanihuachin co insonta ahuantarinhuëꞌ.

Yaꞌipi cancanëna quëran Sinioro nontaantacaiso marëꞌ pënëninsoꞌ

¹² Sinioroso nipirinhuëꞌ, tapon: “Yaꞌipi cancanëma quëran casáchin chinotoco. Ayono nicatoma chiníquën nontoco. Oshanëma yonquiatoma naꞌnëcoꞌ,” tënin.

¹³ Sinioro chachin tahuërëtaantacoꞌ. Inaso Yosënënpoaꞌ. Co napion sëtohuatamara, motoꞌ sëꞌmoramaꞌ. Ina pochin cancantatomaꞌ, oshanëma marëꞌ sëtocoꞌ. Siniorosoꞌ, noyápiachin cancantaton, aꞌnaroáchin yanosorotërin. Co aꞌnaroáchin noꞌhuitërinhuëꞌ. Nosoromiatërinpoaꞌ. Inasoꞌ, co insonta anaꞌintacaso nohuantërinhuëꞌ. Naporin.

¹⁴ Tapona naporamaso marëꞌ Sinioro nosoroápirinquëmahuëꞌ. Nosoroatënquëma cosharoꞌ, huino, inapita ina pëinënquë aꞌnocamaso marëꞌ aꞌpatiápirinquëmahuëꞌ.

¹⁵ Quirosarinquë tronpita pihuitoma piyapiꞌsa ayontoncoꞌ. Niyontonpachinaꞌ, ayono nicacaiso marëꞌ shaꞌhuicoꞌ.

¹⁶ Yaꞌipi Yosë piyapinënpita ayontoncoꞌ. Ina camaitërinso nicatomaꞌ, Sinioro marëꞌ nitapacoꞌ. Mashoyaroꞌsaꞌ, paiyaroꞌsaꞌ, huaꞌhuaroꞌsaꞌ, shoꞌshopiaꞌhuaroꞌsa quëran huarëꞌ, quëinaꞌ. Nasha nimapisopitantaꞌ, quëhuënpisoꞌ patoana huëshirahuatonaꞌ, huëꞌinaꞌ.

¹⁷ Sinioro marëꞌ sacatopisoꞌ corto huaꞌanoꞌsantaꞌ, naꞌnëinaꞌ. Yosë pëinën ishpanamën notënanquë artaro yaꞌhuërinsoꞌ, co aquëyahuëꞌ. Ina huáncana huanirahuatonaꞌ, piyapiꞌsa marëꞌ Sinioro nonchinaꞌ: “Piyapinënpita Sinioro tëhuëtatënën oshahuanpisoꞌ, inquitëquëꞌ. Piyapinënpitacoi nipiraihuëꞌ co catahuahuatancoihuëꞌ, aꞌnapitaso tëhuaponacoi. Ama aꞌnapita nacionoꞌsa canarahuatonacoi, huaꞌanënchinacoisohuëꞌ. Inapitaso co chinotopirinënhuëꞌ, canarahuatonacoi: ‘¿Inata nipachin israiroꞌsa Yosënënari catahuarinhuëꞌ?’ tosapi,” ichinaꞌ.

Israiroꞌsa noya acoantacaso Siniorori shaꞌhuitërinsoꞌ

^18-19 Sinioro camaitërinso chachin corto huaꞌanoꞌsari nontohuachinara, inaso piyapinënpita nosororinsoꞌ, aꞌnotarin. Inapita nosoroaton itapon: “Noyapaꞌ. Naporama niꞌquëhuarëꞌ, ca nohuanton triconëma noyataantapon. Oparoꞌsanta huino niantamaso marëꞌ, noyataantapon. Oriporoꞌsanta toma ocoyantamaso marëꞌ, yaꞌhuëantapon. Nanirinso chachin yaꞌhuëtaantarinquëma niꞌton, co huachi tanapomahuëꞌ. Co huachi yamoropomahuëꞌ. Inpioroꞌsantaꞌ, co huachi tëhuainëmasoꞌ yaꞌhuëaponhuëꞌ.

²⁰ Norti quëran sëquërëꞌ huëꞌpisoꞌ, aꞌpataranquëmaꞌ. Inapoato inotëro parti tëꞌyatarahuë. Quëchitopisopitasoꞌ, chimiriiꞌ marëꞌpaꞌ inquiitarahuë. Piquëran paꞌpisopitantaꞌ, marë pancaiꞌpaꞌ inquiitarahuë. Nonënapitasoꞌ chanatatonaꞌ, anahuanapon. Canpita catahuaꞌhuanquëmaso marëꞌ huëhuëpiro nininsopita nisarahuë,” tënin.

²¹ Cota huënton noꞌpanënquë yaꞌhuëpisopita capa cancanchinaꞌ. Naporahuatona ama huachi tëꞌhuainasohuëꞌ. Sinioro chachin piyapinënpita catahuacaso marëꞌ huëhuëpiro nininsopita nisarin niꞌton, capa cancantaponaꞌ.

²² Tanan maꞌsharoꞌsanquëmantaꞌ, ama huachi paꞌyancosohuëꞌ. Cosharo yaꞌhuëantarin niꞌton, co tana tëpaponquëmahuëꞌ. Pastoroꞌsa yaꞌhuërinquë pasto pëtotërantapon. Nararoꞌsanta nitaantapon. Iquiraroꞌsaꞌ, oparoroꞌsaꞌ, inapitanta sacóshin nitaantaponaꞌ.

²³ Quirosarinquë yaꞌhuëramasopitantaꞌ, capa cancantocoꞌ. Yaꞌipi Cota huëntonquë yaꞌhuëramasopita, noya cancantocoꞌ. Sinioroso Yosënënpoa niꞌton, ina yonquiatoma noya cancantocoꞌ. Ina nohuanton nohuantasëhua chachin oꞌnaantarin. Iráca, tahuërinënquë chachin oꞌnaninso pochin niaantarin.

²⁴ Imin camayoroꞌsa notohuaroꞌ trico macaponaꞌ. Huino, tomaꞌ, inapitanta notohuaroꞌ yaꞌhuëtaponaꞌ.

²⁵ Ina quëran Sinioro taantarin: “Sëquërëroꞌsa aꞌpatáponquëmaꞌ, naꞌa piꞌipi co manta manamahuëꞌ. Inapitasoꞌ sontaroꞌsa huënton ataꞌhuantacaiso marëꞌ aꞌpapiso pochin carima aꞌpatëranquëmaꞌ. Ina piꞌipiroꞌsaquë co manta manamasohuëꞌ iꞌhuërëtaꞌhuanquëmaso marëꞌ naꞌcon naꞌcon quëtaantaponquëmaꞌ.

^26-27 Inapotohuatënquëmaꞌ, noyá natëaquë huarëꞌ coshataramaꞌ. Inapoatoma chinotaramaco. Canpita catahuaꞌhuanquëmaso marëꞌ huëhuëpiro nininsopita ninahuë niꞌton, chinotaramaco. Inapotohuatënquëma yaꞌipi israiroꞌsanquëmaꞌ: ‘Tëhuënchachin Sinioronënpoasoꞌ, Yosë. Co aꞌna yaꞌhuërinhuëꞌ ina pochin chinotacasoꞌ. Inasáchin catahuarinpoaꞌ,’ tosaramaꞌ. Naporo quëran huarëꞌ co huachi onporonta tapanapomahuëꞌ,” tënin.

Yosë, ispiritonën aꞌpaimacaso shaꞌhuirinsoꞌ

²⁸ Naquëranchin Sinioro taantarin: “Ina tahuëriꞌsa naꞌhuërinso piquëran, ispiritonëhuë yaꞌipi piyapinëhuëpita ayaꞌcoancantarahuë. Inapotohuato, huiꞌnamapita quëmapiꞌsaꞌ, sanapiꞌsaꞌ, yonquirahuëso shaꞌhuiponaꞌ. Mashoyaroꞌsanta huaꞌnataponaꞌ. Huiꞌnapiꞌsanta huaꞌnarëso pochin aꞌnotërahuësoꞌ, niꞌsapi.

²⁹ Piyapinëma quëmapiꞌsaꞌ, sanapiꞌsaꞌ, inapitanta ispiritonëhuë ayaꞌcoancantarahuë.

³⁰ Ca nohuanton panca maꞌsha inápaquë yaꞌnorarin. Quënanpachina paꞌyanapi. Isoroꞌpaquëntaꞌ, piyapiꞌsa ayonquiaꞌhuaso marëꞌ maꞌsha acoarahuë: Huënaiꞌ, pën, conai tomontërinsoꞌ, inapita niꞌsapi.

³¹ Piꞌintaꞌ tashiarin. Yoquintaꞌ, huënai pochin nisarin. Coꞌhuara anaꞌintaꞌhuaso tahuëri naniyátërasohuëꞌ, napoarin. Ina tahuëri nanihuachin, paꞌpi huëhuëpiro nisarin,” tënin.

³² Sinioro chinotopisopitaso nipirinhuëꞌ, chimirin quëran chaꞌësapi. Sinioro naporinso chachin huayoninsopitasoꞌ, chaꞌësapi. Quirosarin ninanoquë chaꞌëcaiso yaꞌhuëapon niꞌton, napoapi.