Joel 1 - Chayahuita (Shahui)

Israiroꞌsa sëquërëꞌ quëran parisitopisoꞌ

¹ Caso Coiroco. Tatahuësoꞌ, Pitoiro itopi. Iporasoꞌ Sinioro huaꞌnarëso pochin anitotërincosoꞌ, ninshitaranquëmaꞌ.

² Cota huëntonquë mashoyanquëma yaꞌhuëramasopita, yaꞌipi ina huëntonquë yaꞌhuëramasopitantaꞌ, noya natanco shaꞌhuichinquëmaꞌ: ¡Tëhuënchachin co onporonta niꞌnamasohuëꞌ niꞌsaramaꞌ! Shimashonëmapitanta yaꞌhuëaponaꞌ, ¡tëhuënchachin co onporonta ina pochin niꞌchinpihuëꞌ!

³ Ipora niꞌsaramasoꞌ, canpitanta huiꞌnamapita shaꞌhuitocoꞌ. Inapitantaꞌ, huiꞌninapita shaꞌhuichinaꞌ. Shiparimapita piquëran huaꞌhuatopisontaꞌ, shaꞌhuichinaꞌ.

⁴ Yaꞌhuërëhuaso noꞌpaquë sëquërëꞌ huëꞌsahuaton, yaꞌipi cosharo pëꞌyatërinpoaꞌ. Nisha nisha nipisopitari niyaꞌhuërëton huëcatonaꞌ, napotërinënpoaꞌ.

⁵ Noꞌpirahuëtënquëmaꞌ, ¡huënsëco huachi! Huino paꞌyatëramasopita, sëtatoma naꞌnëcoꞌ. Oparoroꞌsa sëquërëri pëꞌyarin niꞌton, co huachi huino nicacaiso yaꞌhuërinhuëꞌ.

⁶ Sëquërëroꞌsasoꞌ chiníquën sontaroꞌsa huënton pochin nicatonaꞌ, yaꞌhuërëhuaso noꞌpaquë yaꞌconpi. Yaꞌipi yanquërahuatonaꞌ, naramëroꞌsa pëꞌyarin. Paꞌpiniꞌ natëquën quëran mápinën pëꞌyarinso pochin nipi.

⁷ Yaꞌipi oparonënpoapita pëꞌyapi. Yaꞌipi iquiraroꞌsanta pëꞌyapi. Shaꞌhuëtën quëran huarëꞌ capatonaꞌ, ironantërin. Sëꞌpainpitantaꞌ, huirinantaquë huarëꞌ aꞌporin.

⁸ Nasha soꞌyahuan soꞌin chiminpachina, co napion ancantaton, naꞌnërin.

⁹ Inapochachin corto huaꞌanoꞌsanta naꞌnëpi. Co huachi Yosë marëꞌ tëranta cosharoꞌ, huino, inapita quëpihuëꞌ niꞌton, napopi.

¹⁰ Iminoꞌsaquë capa cosharo huachi. Nichimiyantohuachinara sëtopiso pochin noꞌpantaꞌ, tanahuantárin. Triconta capa ninin. Oparoroꞌsaꞌ, oriporoꞌsaꞌ, inapitanta yanirin.

¹¹ Imin camayonquëmaꞌ, shaꞌtëramasopita tapitërinënquëmaꞌ. Trico, sipata, inapita shaꞌpiramahuëꞌ, co huachi nitërinsoꞌ masaramahuëꞌ. Napoaton co napion ancantatomaꞌ, naꞌnëcoꞌ.

¹² Oparoroꞌsaꞌ, iquiraroꞌsaꞌ, cranata huayoroꞌsaꞌ, inapitanta yanipi. Mansanaroꞌsaꞌ, palmeraroꞌsaꞌ, nisha nisha nararoꞌsa nipisopita, yanirin. ¡Inapoatëhua Cota huëntonquë yaꞌhuërëhuasopitasoꞌ, co napion cancantacaso yaꞌhuërin!

¹³ Corto huaꞌanoꞌsanquëmaꞌ: Canpitasoꞌ Sinioro artaronënquë sacatëramaꞌ. Yosënënpoa chinotërëhuaso pëiquë, co huachi Sinioro marëꞌ cosharoꞌ, huino, inapita quëpihuëꞌ. Napoaton sëtonëmaquë saꞌcatën aꞌmosahuatomaꞌ, yaꞌipi tashi naꞌnëcoꞌ.

¹⁴ Yaꞌipi Cota huëntonquë piyapiꞌsa ayontonahuatomaꞌ, ayono nicacaiso camaicoꞌ. Sinioronënpoa chinotërëhuaso pëiquë yaꞌipi ansianoꞌsantaꞌ, niyontoinaꞌ. Niyontonahuatonaꞌ, catahuainpoaso marëꞌ Sinioro nonchinaꞌ.

¹⁵ Anaꞌintacaso tahuëri nani naniriarin. Ina tahuëri nanihuachin, ¡maꞌhuántacha nisarëhua paya! Naporoꞌ Siniorosoꞌ ataꞌhuatarinpoaꞌ. Yaꞌipi nanitapaton inapotarinpoa huachi.

¹⁶ Canpoara yaꞌpiranpoa quëran chachin sharoꞌsa osërëtërinënpoasoꞌ niꞌnëhuaꞌ. Napoaton co huachi Sinioro pëinënquë capa cancantërëhuahuëꞌ.

¹⁷ Noꞌpaꞌ taparopiquë yaꞌpirin shaꞌpirinahuëꞌ, co oꞌnaninhuëꞌ niꞌton, inaquëranchin chiminin. Napoaton co huachi trico macacaso yaꞌhuëaponhuëꞌ. Cosharo tapacaiso pëiroꞌsantaꞌ, capanantësáchin quëparitërin.

¹⁸ Pëꞌtahuaroꞌsanta tanatonaꞌ, yamorotonaꞌ, noncarorápi. Ohuacaroꞌsa pasto yonípirinahuëꞌ, co quënanpihuëꞌ. Ohuica huëntonoꞌsantaꞌ, tanatonaꞌ, yamorotonaꞌ, taquirapi.

¹⁹ Inapoatoi Sinioro nontarainquën. Inotëroquë pastoroꞌsa yaꞌhuërinsoꞌ, pëni ahuiquitëraꞌpiarin. Yaꞌipi nararoꞌsanta yaꞌhuërinso napotërin.

²⁰ Tanan maꞌsharoꞌsa quëran huarëꞌ noncarotonaꞌ, nontatë pochin nitarinënquën. Iꞌshanaroꞌsa yaniraꞌpiapi, pastoroꞌsa yaꞌhuërinquëntaꞌ, pëni ahuiquitërantararin. Napoaton inahuanta napopi.