Jeremías 9 - Chayahuita (Shahui)

Israiroꞌsa co noyahuëꞌ nipiso marëꞌ sëtërahuësoꞌ

^1-2 Maꞌcha inotëro parti yaꞌhuëcaꞌhuaso marëꞌ pëi yaꞌhuëtërincohuë paya. Inaquë paꞌsahuato yaꞌhuëꞌitohuëꞌ. Israiroꞌsasoꞌ quëmopinëhuëpita nipirinhuëꞌ, pachitohuëꞌ. Yaꞌipiya quëran inahuasoꞌ, co Yosëíchin cancantopihuëꞌ. Nonpintahuatona patopi. Inapitasoꞌ quëmopinëhuëpita nipirinahuëꞌ, naꞌcon taquiapi niꞌton, tahuëri tashirë chachin naꞌnëi, topirahuë. ¡Iꞌsha paꞌirinsoꞌ, huinan, inapita pochin yaꞌpiratërahuë naporini, noya noya niitonhuëꞌ!

³ Sinioro naporin: “Israiroꞌsasoꞌ, pëꞌchinanquë shinërë aꞌparëso pochin nonpinchináchin cancantopi. Co huachi noꞌtëquën nonpihuëꞌ. Ninonpintápi. Napoaton aquë aquëtë co noyahuëꞌ yaꞌhuëpi. Co insonta yanohuitërincohuëꞌ. Ca Sinioroco shaꞌhuitaranquëmaꞌ:

⁴ Iporasoꞌ amiconëna tëranta co huachi natëcaso yaꞌhuërinhuëꞌ. Iina tëranta co natëchináchinhuëꞌ, niconin. Inahua capini ninonpintápi. Amiconëna nipirinhuëꞌ, nonpinapipi.

^5-6 Inahuara capini ninonpintápi. Co insonta noꞌtëquën noninhuëꞌ. Nonpinápatonaꞌ, noyá noꞌquipi. Pëshonëso pochin cancantatonaꞌ, co huachi nanitopihuë noya cancantacaisoꞌ. Ca Sinioroco shaꞌhuitaranquëmaꞌ: Apira apira maꞌsha nionpotopi. Apira apira ninonpintopi. Piyapinëhuëpita nipirinahuëꞌ, co yanohuitërinacohuëꞌ.

⁷ Caso Sinioroco yaꞌipi nanitaparahuë. Carima shaꞌhuitaranquëmaꞌ. Piyapinëhuëpita naponpi niꞌton, pën quëran tënicaꞌhuaso yaꞌhuërin. Co huachi onpotochináchinhuë niꞌton, napotarahuë.

⁸ Nonpachinara, caparihuan shinërë pochin yatëpatopi. Nonpinacaisoráchin cancantopi. Amiconënapita noya nontaponaraihuëꞌ, cancanëna quëransoꞌ, maꞌsha onpotochináchin cancantapi.

⁹ ¡Napopiso marëꞌ onpopionta anaꞌintaꞌhuaso yaꞌhuërin! Caso Sinioroco shaꞌhuitaranquëmaꞌ.

¹⁰ Motopiroꞌsa paꞌtatoma naꞌnë naꞌnë́rantacoꞌ. Pastoroꞌsantaꞌ paꞌtatoma osha oshaárantacoꞌ. Yaꞌipi huiquitërin niꞌton, co huachi insonta inaëchin paꞌninhuëꞌ. Ohuacaroꞌsanta ‘maaa,’ topisoꞌ, co huachi yaꞌcaninhuëꞌ. Niꞌniroꞌsaꞌ, anpiantëhuanoꞌsaꞌ, inapitanta taꞌapi.

¹¹ Quirosarin ninano ataꞌhuantohuato, naꞌpisá yamórantapon. Asaniroꞌsa yaꞌhuëcaiso marëꞌ yaꞌhuëapon. Cota huënton ninanoroꞌsanta ataꞌhuantohuato, tanahuantáponaꞌ,” tënin Sinioro.

¹² ¿Inta yonquínahuan niꞌton, nanitërin onpoatonsona napopisoꞌ nitotacasoꞌ? ¿Inso pënëntonaꞌpita Yosëri anitotërin niꞌton, nanitërin onpoatonsona napopisoꞌ shaꞌhuitiinpoasoꞌ? Inotërosoꞌ, yaꞌshi yaꞌshin. Co insonta inaquëchin paꞌninhuëꞌ. ¿Onpoatonta iso noꞌpanënpoanta taꞌhuantaton, ina pochin ninin? tënahuë.

¹³ Sinioro naporin: “Co topinan napopihuëꞌ. Israiroꞌsa iráca anitotërahuë onpopinsona nanpicaisoꞌ. Inapotopirahuëꞌ, co piꞌpian tëranta natëpihuëꞌ.

¹⁴ Co natantochináchinhuëꞌ cancantatonaꞌ, inahuara costapiso imapi. Shimashonënapitari aꞌchintërinso pochachin nonpin yosëroꞌsa moshapi.

¹⁵ Caso Sinioroco yaꞌipi nanitaparahuë. Israiroꞌsa Yosënënaco. Máin nininso aꞌcarëso pochin, piyapinëhuëpita nitarahuë. Oꞌoi noniapinan pochin nininsoꞌ, oꞌshitarahuë.

¹⁶ Nisha nisha piyapiꞌsa yaꞌhuëpiquë aꞌpaato ayanquëarahuë. Co nohuitopiquëhuëꞌ, aꞌpaarahuë. Co shimashonëna tëranta nohuitopiquëhuëꞌ, aꞌpaarahuë. Yaꞌipi noquitai marëꞌ, sahuëninëna siꞌhuitahuatona inimiconënapitari ima imarantaponaꞌ,” tënin.

Quirosarinquë sëtatona oshaapisoꞌ

¹⁷ Siniorosoꞌ yaꞌipi nanitaparin. Ina chachin camaiarinpoaꞌ: “¡Noya natanco shaꞌhuichinquëmaꞌ! Aꞌnaquën sanapiꞌsa canacaiso marëꞌ naꞌnënaꞌpiroꞌsa yaꞌconpi. Inapita përácoꞌ, huëꞌinaꞌ,” tënin.

¹⁸ Manóton huëꞌsahuatonaꞌ, canpoa marëꞌ naꞌnëinaꞌ. Canpoanta naꞌnëmiatahuaꞌ.

¹⁹ Quirosarin quëran huarëꞌ yaꞌipi parti naꞌnërantapisoꞌ natanëhuaꞌ. ¡Maꞌhuántacha canpoasoꞌ ataꞌhuantërinënpoa paya! Paꞌpi taparo nitërinënpoaꞌ. Yaꞌipi yaꞌhuërëhuaso tapitërinënpoaꞌ. Yaꞌipi noꞌpanënpoa patacaso yaꞌhuërin.

²⁰ Sanapiꞌsanquëmanta Sinioro nontarinquëmaꞌ natancoꞌ. Noya natanco shaꞌhuitarinquëmaꞌ: “Huaꞌhuama sanapi yaꞌhuëtërinquëmasoꞌ, aꞌchintoco naꞌnëcaisoꞌ. Payaramasopitantaꞌ, aꞌchintoco sëtatona oshaacaisoꞌ.

²¹ Sëtatona oshaahuachina napoꞌinaꞌ: ‘Pëinënpoapitaquë chimirin yaꞌcotërinpoaꞌ. Noya noya pëiroꞌsaquënta yaꞌconin. Cachiroꞌsaquë notohuaroꞌ huaꞌhuaroꞌsa tiquipi. Prasaroꞌsaquënta huiꞌnapiroꞌsa inapotopi.

²² Mashoroꞌsanta tëpapisoꞌ notëntërantapi. Ninano aipiran chiꞌchiꞌ yamorantarinso pochin nipi. Yaquinaꞌpi trico motoꞌ atatohuachina, co incari maninsohuë pochin nisapi,’ chinaꞌ,” tënin.

²³ Sinioro chachin ina pochin shaꞌhuitërinpoaꞌ. Naquëranchin Sinioro taantapon: “Aꞌnaquëma nani maꞌsha nitotëramaꞌ. Napoapomarahuëꞌ: ‘Ma noyacha caso nitotërahuë paya,’ ama tocosohuëꞌ. Chiníquënquëma nipatamantaꞌ: ‘Ma noyacha caso chinirahuë paya,’ ama tocosohuëꞌ. Nani maꞌsha yaꞌhuëtohuachinquëmantaꞌ: ‘Ma noyacha caso nani maꞌsha yaꞌhuëtërinco paya,’ ama tocosohuëꞌ.

²⁴ Insonquëma tërantaꞌ, ‘Ma noyacha caso ninahuë paya,’ yatopatamaꞌ, Sinioroco ninahuësoꞌ nitotatoma nohuitohuatamaco tëhuënchinsoꞌ, noꞌtën chachin napoaramaꞌ. Casáchin yaꞌipiroꞌpaꞌ huaꞌanëntato nosororanquëmaꞌ. Co noyahuëꞌ nipatamaꞌ noꞌtëquën anaꞌintaranquëmaꞌ. Noya nipatamasoꞌ noya niꞌsaranquëmaꞌ. Cá pochin cancantopisopita paꞌyatarahuë. Ca Sinioroco shaꞌhuitaranquëmaꞌ,” tënin.

^25-26 (-)