Jeremías 7 - Chayahuita (Shahui)

Yosë chinotacaso pëiquë pënëntërinsoꞌ

¹ Aꞌna tahuëri Sinioro itaponco:

^2-3 “Chinotërinacoso pëiquë paꞌsahuaton, yaꞌcoanaquë huaniconquëꞌ. Inataquëchin Cota huënton israiroꞌsa chinotiinacoso marëꞌ yaꞌconpi. Naporahuësoꞌ inapita anitotëquëꞌ: ‘Caso Sinioroco yaꞌipi nanitaparahuë. Yosëco niꞌto, israiroꞌsanquëma chinotëramaco. Noya noya imatomaco noya nicoꞌ. Napohuatamaꞌ, co yaꞌhuërama quëran ocoiaranquëmahuëꞌ.

⁴ Aꞌnaquënsoꞌ, nonpintatënëmaꞌ: “Isëquë Sinioro chinotacaso pëi yaꞌhuërin. Napoaton co insonta maꞌsha onpotiinpoaso yaꞌhuërinhuëꞌ,” itërinëmaꞌ.

^5-7 Noya noya imatomaco noya nicoꞌ. Aꞌnapitantaꞌ, noꞌtëquënáchin yonquirapicoꞌ. Nisharoꞌsa noꞌtëquën pahuërëcoꞌ. Saꞌahuaroꞌsaꞌ, quëyoronoꞌsaꞌ, inapitanta inapotocoꞌ. Piyapiꞌsa co manta onpopisopitahuëꞌ, ama tëpacosohuëꞌ. Mamanshiroꞌsa moshahuatamaꞌ, maꞌsha onpocamasoꞌ yonisaramaꞌ. Napoaton ama manta inapita moshacosohuëꞌ. Napohuatamaꞌ, co yaꞌhuërama quëran ocoiapënquëmahuëꞌ. Isoso noꞌpaꞌ, shimashonëmapitari huaꞌanëntomiatacaiso marëꞌ, quëtërahuë.

⁸ Canpitaso nonpi nananoꞌsa natëtëramaꞌ. Inasoꞌ co piꞌpian tëranta catahuarinquëmahuëꞌ.

⁹ Niihuaramaꞌ, nitëparamaꞌ, nitëhuananpitëramaꞌ, Yoscoarëꞌ tapomarahuë nonpinamaꞌ. Paaro moshatoma yonarin pochin nininsoꞌ aꞌpëramaꞌ. Nisha nisha mamanshiroꞌsanta co nohuitapomarahuëꞌ, mosharamaꞌ.

¹⁰ Napoapomarahuëꞌ, pëi acotërinacoquë huëꞌsahuatomaꞌ, canta chinotaantaramaco. “Sinioro pëinënquë yaꞌhuëhuatëhuaꞌ, co manta onpoarihuahuëꞌ,” tënamaꞌ. Co costarahuëso nisápomarahuëꞌ, “noya inachachin nisápasoꞌ,” toconamaꞌ.

¹¹ Iso pëi acotërinacososoꞌ, nóya. Canpitariso napoaponahuëꞌ, ihuatëroꞌsa yaꞌhuëpiquë pochin atarantëramaꞌ. “Ina mini iso pëiꞌ,” ama tocosohuëꞌ. Ina pochin cancantëramasoꞌ, nani niꞌnahuë. Caso Sinioroco shaꞌhuitaranquëmaꞌ.

¹² Canaan noꞌpaquë ipora yaꞌhuëapomaꞌ, chinotërinacoso nëꞌmëtë pëi acocaiso marëꞌ Siro ninanoꞌton huayonahuë. Inapopirahuëꞌ, shimashonëmapita co noyahuëꞌ nipiso marëꞌ ina ninano anaꞌintërahuësoꞌ, niꞌconcoꞌ.

¹³ Canpitantaꞌ, co noyahuëꞌ ninamasoꞌ aꞌpocaso marëꞌ naquëranchin naquëranchin pënënanquëmaꞌ. Inapotopiranquëmahuëꞌ co yanatëramacohuëꞌ. Co natanamacoso tëranta nohuantëramahuëꞌ. Caso Sinioroco shaꞌhuitaranquëmaꞌ.

¹⁴ Siroquë chinotiinacoso nëꞌmëtë pëi iráca yaꞌhuëpirinhuëꞌ, co noyahuëꞌ nipi niꞌton, ataꞌhuantërahuë. Canpitanta chinotëramacoso pëi paꞌpoyainquëmasoꞌ ninapiramahuëꞌ, co noyahuëꞌ ninamaꞌ. Napoaton canpitanta inapita pochachin nitaranquëmaꞌ.

¹⁵ Iprain huënton israiroꞌsasoꞌ, canpita quëmopinëmaꞌ. Napopirinahuëꞌ, noꞌpanëhuë quëran ocoirahuë. Inapochachin canpitanta ocoiaranquëmaꞌ, tënin Sinioro,’ itëquëꞌ,” itërinco.

Co Sinioroíchin cancantatonaraihuëꞌ, tëhuëpisoꞌ

¹⁶ Ina quëran Sinioro itaantaponco: “Quëmasoꞌ, ama isopita marëꞌ nontocosohuëꞌ. Ama napion ancantaton nontocosohuëꞌ. Ina pochin ancantaton nontopirancohuë tërantaꞌ, co aꞌpaniaranquënhuëꞌ.

¹⁷ Cota huënton ninanoroꞌsaquë, Quirosarin cachiroꞌsaquë, inaquëpita napopisoꞌ, ¡quëmanta nani niꞌnan!

¹⁸ Huaꞌhuaroꞌsa ihuë yontonpi. Paꞌpinasoꞌ aꞌpëtopi. Aꞌshinantaꞌ, arina taparoatonaꞌ, cashin panoꞌsa nipi. Ina aꞌnotatonaꞌ, ‘Piꞌiroꞌtë huaꞌan paya’ itopisoꞌ mamanshi moshapi. Aꞌnapita mamanshi marëntaꞌ, ina pochin nitatona moshapi. Ina marëꞌ caso anoꞌhuitërinaco.

¹⁹ Napoaponahuëꞌ, co casáchin anoꞌhuitërinacohuëꞌ. Inahuara chachin taparo nicacaiso marëꞌ naporapi. Caso Sinioroco napotaranquëmaꞌ.

²⁰ Napoaton iso noꞌpaꞌ, paꞌpi noꞌhuito anaꞌintarahuë. Piyapiroꞌsaꞌ, maꞌsharoꞌsaꞌ, nararoꞌsaꞌ, sharoꞌsaꞌ, inapita quëran huarëꞌ ataꞌhuantarahuë. Panca pënsoꞌ, co tacopitochináchinhuëꞌ tënëntërin. Ina pochin noꞌhuitërahuësoꞌ nisarin,” itërinco.

²¹ Siniorosoꞌ yaꞌipi nanitaparin. Inasoꞌ, israiroꞌsari chinotërin. Ina chachin piyapinënpita itaantapon: “Nohuantohuatamaꞌ, onponta maꞌsha ca marëꞌ tëpacoꞌ. Inapotahuatomaꞌ, oshanëma marëꞌ yaꞌipi ahuiquitocoꞌ. Aꞌnaquëonta tomaquën ahuiquitatomaꞌ, noshinën caꞌcoꞌ.

²² Napopiramahuëꞌ, Iquipito quëran shimashonëmapita ocoiapo, maꞌsha ca marëꞌ tëparahuatona aꞌnaquën yaꞌipi ahuiquitacaisoꞌ, aꞌnaquëonta tomaquën ahuiquitacaisoꞌ, inapita nicacaisoꞌ, co camairahuëꞌ.

²³ Isocha tëhuënchinsoꞌ camairahuë: ‘Yaꞌipi camaitërahuëso natëcoꞌ. Inapohuatamaꞌ, ca Yosënëmaco nisarahuë. Canpitantaꞌ, piyapinëhuëpita nisaramaꞌ. Onpopinsona cancantamasoꞌ, nani camairanquëmaꞌ. Ina chachin nicoꞌ. Inapohuatamaꞌ, noya yaꞌhuëaramaꞌ,’ itëranquëmaꞌ.

²⁴ Napotopiranquëmahuëꞌ, canpitaso co natëramacohuëꞌ. Co natantochináchinhuëꞌ cancantatomaꞌ, co noyahuëꞌ ninamaꞌ. Casáchin cancantamacoso nipirinhuëꞌ, nisha cancantëramaꞌ.

²⁵ Shimashonëmapita Iquipito quëran ocoirahuë. Naporo quëran huarëꞌ pënëntonaꞌpiroꞌsa aꞌpatëranquëmaꞌ. Inapitasoꞌ natëtonaco naquëranchin naquëranchin pënëninquëmaꞌ.

²⁶ Pënënpirinquëmahuëꞌ, co natëramahuëꞌ. Shimashonëmapita co natërinacohuëꞌ. Canpitaso napoaponahuëꞌ, aquë aquëtë co natëtëramahuëꞌ,” itërin.

²⁷ Naquëranchin Sinioro nontaantarinco: “Quëmari yaꞌipi inapita shaꞌhuitëquëꞌ. Co natëpirinënquëontaꞌ, shaꞌhuitëquëꞌ. Co aꞌpanipirinënquëontaꞌ, chiníquën shaꞌhuitëquëꞌ:

²⁸ ‘Canpitaso Sinioro yaotëatënquëma napotopirinquëmahuëꞌ, co nohuantëramahuëꞌ natëtamasoꞌ. Co ótëinquëmaso tëranta nohuantëramahuëꞌ,’ itëquëꞌ,” itërinco.

Quirosarinquë nisha nisha moshapisoꞌ

²⁹ Naquëranchin Sinioro taantarin: “Quirosarinquë yaꞌhuëramasopita. Naporopi ainëma yaquirahuatomaꞌ, tëꞌyatocoꞌ. Inapoatomaꞌ, tanahuantárin panënoꞌsaquë oshaatoma naꞌnëcoꞌ. Piyapinëhuëpitanquëma nipomarahuëꞌ, noꞌhuitënquëma aꞌporanquëma niꞌton, inapocoꞌ.

³⁰ Cota huënton israiroꞌsasoꞌ, co costarahuësohuëꞌ nipi. Chinotërinacoso pëiquë chachin amiro mamanshinënapita poꞌmopi. Inapoatona pëinëhuë tapipi.

³¹ Pini-inon motopianaquë Tohuito marëꞌ artaro nipi. Ina aipi huiꞌninapita ahuiquitopi. Inapocaisosoꞌ, co piꞌpian tëranta camairahuëꞌ. Co piꞌpian tëranta yonquiyatërarahuëꞌ.

³² Napopiso marëꞌ tahuëri nanihuachin ina motopianasoꞌ, co huachi Tohuito itaponahuëꞌ. Co huachi Pini-inon motopiana itaponahuëꞌ. ‘Israiroꞌsa tiquipiquë motopiana’ itaponaꞌ. Inaquë chachin chiminpisopita paꞌpitaponaꞌ. Co niquëꞌpaꞌ paꞌpitacaiso yaꞌhuëaponhuë niꞌton, napoaponaꞌ.

³³ Ina chimipiroꞌsasoꞌ, chanaro caꞌtëroꞌsaꞌ, niꞌniroꞌsaꞌ, inapitari caponaꞌ. Co incari tëranta aꞌpayataponhuëꞌ.

³⁴ Cota huënton ninanoroꞌsaquë, Quirosarin cachiroꞌsaquë, inaquëpita capa cancantopisoꞌ, copi tapona huachi. Pita naꞌhuëhuachinara capa cancantopisoꞌ, saꞌapachinara cantarapipisoꞌ, inapita copi taponaꞌ. Yaꞌipi iso noꞌpaꞌ tanahuantápon,” tënin Sinioro.