Jeremías 6 - Chayahuita (Shahui)

^1-15 (-)

Israiroꞌsa co natëtochináchinhuëꞌ cancantopisoꞌ

¹⁶ Naquëranchin Siniorori piyapinënpita itapon: “Paꞌnamaquë ira niosërarinsoꞌ quënanconpatamara, chiniconamaꞌ. Noya niꞌsahuatoma iracaya ira huayonamaꞌ. Canpitanta chihuërëso pochin cancantohuatamaꞌ, nontoco noꞌtën ira aꞌnotërëso pochin nichinquëmaꞌ. Inasáchin paꞌtohuatamaꞌ sano cancantaramaꞌ,” itërin. Canpitaso napoaponahuëꞌ: “Co nohuantëraihuëꞌ ina ira paꞌtaꞌhuaisoꞌ,” toconamaꞌ.

¹⁷ Napoaton Siniorosoꞌ, aꞌpaitonaꞌpiroꞌsa pochin nininsoꞌ acorin. Aꞌpaitonaꞌpiroꞌsasoꞌ, huëhuëpiro huëꞌsarinso niꞌpachinara, pomontopi. Ina pochin nicatona pënëntonaꞌpiroꞌsasoꞌ shaꞌhuitopirinëmahuëꞌ, canpitaso co nohuantëramahuëꞌ natëtamasoꞌ.

¹⁸ Napoaton Sinioro taantapon: “Nisha nisha piyapinquëma yaꞌhuëramasoꞌ, natancoꞌ. Piyapinëhuëpita parisitacaiso yaꞌhuërinso shaꞌhuichinquëmaꞌ.

¹⁹ Yaꞌipi isoroꞌpaquë yaꞌhuëpisopita natainaco. Piyapinëhuëpita co noyahuëꞌ nicatona oshahuanpi niꞌton, paꞌpi parisitacaiso aꞌpatarahuë. Aꞌchinahuësopita, pënëntërahuësoꞌ, inapita co yanatëtonaraihuëꞌ, nocanpi niꞌton, inapotarahuë.

²⁰ Israiroꞌsanquëmaꞌ, canpitaso Sapa noꞌpa quëran yonarin pochin nininsoꞌ quëshiramaco. Pimo nararoꞌsanta áquë noꞌparoꞌsa quëran quëshiramaco. Inapita quëshipiramacohuëꞌ: ¡Topinan quëran quëshiramaco! Chinotamacoso marëꞌ artaronëhuëquë maꞌsha tëparahuatoma aꞌnaquën yaꞌipi ahuiquitëramaꞌ. Aꞌnaquënsoꞌ, piꞌpiyan ahuiquitëramaꞌ. Inaporamasopita, ¡yaꞌipi co noyahuëꞌ niꞌnahuë!” tënin.

²¹ Napoaton Siniorosoꞌ inapita yonquiaton taantapon: “Isopitasoꞌ, piyapinëhuëpita nipirinahuëꞌ, ca nohuanton iꞌparahuatona anotopiso pochin nicaponaꞌ. Mashoroꞌsa huiꞌninpitarë chachin, niyaꞌyoranpisopita amiconënarë chachin, yaꞌipi inapita chiminaponaꞌ,” tënin.

Norti parti quëran huëcatona ahuëtacaiso shaꞌhuirinsoꞌ

²² Naquëranchin Sinioro taantapon: “Norti parti yaꞌhuëpisopita áquë yaꞌhuëpirinahuëꞌ, huëꞌsapi. Chiníquën nacion huëꞌsarin.

²³ Sontaronënpitantaꞌ, pëꞌchinan, sahuëni, inapita quësapi. Inapitasoꞌ, paꞌpi noꞌhuitërayaroꞌsaꞌ, co nito nosorotopihuëꞌ. Noncaropisontaꞌ, marë tënëntërinso pochin ninin. Cahuarioquë yaꞌmitërahuatonaꞌ, huëꞌsapi. Quirosarinquë yaꞌhuëpisopita ahuëcaiso marëꞌ huëꞌsapi,” tënin.

²⁴ Quirosarin yaꞌhuëhuanoꞌsasoꞌ, napoaponaꞌ: “Huëꞌsapiso natantatoi, paꞌpi paꞌyanai. Inapoatoi co huachi chiniraihuëꞌ. Sanapi huaꞌhua iquitërinso pochin, co napion cancantërai.

²⁵ Ama insonta iminquë paꞌinsohuëꞌ. Ama ira tëranta paꞌchinasohuëꞌ. Inimicoroꞌsasoꞌ, noyá niacorahuatona canquiapi. ¡Yaꞌipi parti inapita tëꞌhuatapi!” tosapi.

²⁶ Yosë piyapinënpitanquëma nipomarahuëꞌ, saꞌcatën aꞌmocoꞌ. Co napion ancantatomaꞌ, huarianoquë nianapitocoꞌ. Nichimiantëramaso pochin cancantatomaꞌ, naꞌnëmiatocoꞌ. Aꞌnaíchin huiꞌnama nininsoꞌ chiminpachina sëtëramaso pochin nicoꞌ. Ataꞌhuantarinquëmasopita aꞌnanaya cantiarinquëma niꞌton, inapocoꞌ.

²⁷ Ina quëran Yosë itaantarinco: “Piyapinëhuëpita quëmari tëniriquëꞌ. Inapotohuatan, ¿onpoꞌinataꞌma paꞌ?” itërinco.

²⁸ “Yaꞌipi inapitaso Sinioro, co natantochináchinhuëꞌ cancantopi. Nanan paꞌyatopi, nitapicancanpi, napopi. Shaꞌpi huaꞌna pochin, huaꞌnamia pochin cancantopi.

²⁹ Aꞌhuëntëquë chiníquën aꞌhuëntohuachinara, pën ahuënaratahuaton promo asoquirin. Ina pochachin piyapinënpita noya tapacaso marëꞌ maꞌsha onpotopiranhuëꞌ, co noyahuëꞌ nipiso co yaaꞌpopihuëꞌ.

³⁰ Naponpiso marëꞌ inapitasoꞌ, ‘prata chiꞌchirotërinso pochin niconpi,’ itaponaꞌ. Aꞌporan niꞌton, inapo nohuitaponaꞌ,” itërahuë carintaꞌ.