Jeremías 37 - Chayahuita (Shahui)

Sitiquiasë copirno natanincosoꞌ

¹ Papironia copirnosoꞌ, Cota huënton copirno nicacaso marëꞌ Sitiquiasë acorin. Cosiasë huiꞌnin Coaquin itopisoꞌ yaꞌhuërënamën ina acorin.

² Inaso napoaponahuëꞌ, catahuarinsopita huaꞌanoꞌsarë chachin Sinioro anitotërincoso shaꞌhuitërahuësoꞌ, co natërinhuëꞌ. Co yaꞌhuëhuanoꞌsari tëranta natëpihuëꞌ.

³ Aꞌna tahuëri copirnosoꞌ, nontiincoso marëꞌ isopita huaꞌanoꞌsa aꞌpairin: Sirimiasë huiꞌnin Ocaro itopisoꞌ nisahuaton, Maasiasë huiꞌnin Sooniasë corto huaꞌan. Inapitasoꞌ cantoonahuatonaco: “Siniorosoꞌ, Yosënënpoaꞌ. Canpoa marëꞌ ina nontëquëꞌ, tënin copirno,” itërinaco.

⁴ Naporo tahuëriꞌsa caso noya paꞌsárahuë. Co tashinan pëiquë pomoyátërarinacohuëꞌ.

⁵ Papironia sontaroꞌsanta Quirosarin ninano ahuëcaiso marëꞌ tancapitápirinahuëꞌ, Iquipito copirno sontaronënpita huëꞌsapiso natantopi. Napohuachina Papironia sontaroꞌsasoꞌ, Quirosarin aꞌporahuatonaꞌ, yaꞌhuëpiquë panantapi.

^6-7 Naporoꞌ Siniorosoꞌ, comisionoꞌsa shaꞌhuitaꞌhuaso marëꞌ camairinco: “Cota huënton copirno nontamacoso marëꞌ aꞌparinquëmaꞌ. Canpitarinta iso nanan shaꞌhuitocoꞌ: ‘Iquipito copirno sontaronënpita catahuainëmaso marëꞌ huëꞌsapisosoꞌ, nani yaꞌhuëpiquë ayamantapi.

^8-9 Papironiaroꞌsa patopirinënquëmahuëꞌ, naquëranchin ahuëinëmaso marëꞌ huëantaponaꞌ. Ahuërahuatënëmaꞌ, minsëarinëmaꞌ. Inapoatona yaꞌipi Quirosarin ninano iꞌchinpitaponaꞌ. Canpitasoꞌ: “Papironia sontaroꞌsa nani patërinënpoaꞌ,” tonamaꞌ. Napoatoma noya cancantëramaꞌ. Co napoapihuëꞌ.

¹⁰ Canpitari inapita ahuërahuatomaꞌ, acaniaꞌpitëramasoráchin quëparitopirinahuë tërantaꞌ, yaꞌhuëapi quëran noyamiachin huaniantarahuatonaꞌ, ninanonëma iꞌchinpichitonahuë, tënin Sinioro,’ itocoꞌ,” itërinco.

Tashinan pëiquë poꞌmorinacosoꞌ

^11-12 Papironia sontaroꞌsasoꞌ, Quirosarin ninano patahuatona paꞌsapi. Iquipito sontaroꞌsa huëꞌsapiso natantatonaꞌ, napoapi. Naporoꞌ quëmopinëhuëpitarëꞌcoi noꞌpaꞌ nipatomataꞌhuaiso marëꞌ paꞌsarahuë. Mincamin huënton noꞌpanënaquë paꞌsarahuë.

¹³ Mincamin yaꞌcoana itopiquë nipatora, Iriasë aꞌpaitoroꞌsa huaꞌan maninco. Inasoꞌ Sirimiasë huiꞌnin. Sirimiasënta paꞌpin Ananiasë itopi. Iriasëso masahuatonco: —¡Quëmasoꞌ papironiaroꞌsa catahuacaso marëꞌ paꞌsaran! itërinco.

¹⁴ —Co naporinhuëꞌ. Co ina marëꞌ paꞌnahuëꞌ, itërahuë. Napopirahuëꞌ, inaso co natëtoncohuëꞌ, copirno catahuarinsopita huaꞌanoꞌsaquë, yoꞌconinco.

^15-16 Inapita huaꞌanoꞌsantaꞌ, noꞌhuitonaco ahuihuitërinaco. Naporahuatonaꞌ, Conatan ninshitonaꞌpi pëinën tashinan pëi atarantopi niꞌton, inaquë poꞌmorinaco. Acoporoꞌ patoanaquë poꞌmohuachinacora, inaquë huaꞌqui yaꞌhuërahuë.

^17-18 Aꞌna tahuëri Sitiquiasë copirno huaꞌanëntërinso pëiquë amatërinco. Quëpahuachinacora poꞌoana quëran nataninco: —¿Maꞌsona tëranta Sinioro anitotërinquën to? itërinco. —Anitotërinco mini. Quëmasoꞌ chiníquën nanantopiranhuëꞌ, Papironia copirno minsërahuatënquën masarinquën, itërahuë. Napotahuato, carinta copirno natanahuë: —Maꞌta onpotatënquën tëhuëtëranquën. Catahuarinënquënsopita huaꞌanoꞌsahuë nipon, yaꞌhuëhuanoꞌsahuë nipon ¿Maquëta tëhuëtëranquëma niꞌton, tashinan pëiquë poꞌmoramaco?

¹⁹ Aꞌnaquën pënëntonaꞌpiroꞌsasoꞌ: “Noya yaꞌhuëapomaꞌ. Co Papironia copirno yaꞌhuëaramaso noꞌpaquë, ahuëtaponhuëꞌ,” itërinënquëmaꞌ. Inata nipachin ina pochin nininhuëꞌ.

²⁰ Quëmasoꞌ chiníquën nanantëran niꞌton, nontëranquënsoꞌ natanco. Ina natanaton, nosoroco. Ama huachi Conatan ninshitonaꞌpi pëinënquë poꞌmoantaꞌinacosohuëꞌ. Inapotaantahuachinacosoꞌ, chiminapo huachi, itërahuë.

²¹ Napotohuatora copirnosoꞌ, aꞌpaito sontaroꞌsa pëi iꞌiratënënquë acoinacosoꞌ camaitërin. Naporahuaton ina camaitërin quëran nani tahuëri pan quëshirinaco. “Pan camayoroꞌsa cachi” itopiquë nipisoꞌ quëshirinaco. Ninanoquë capamia capacaiso nicaquë huarëꞌ aꞌpaito sontaroꞌsa pëi iꞌiratënënquë yaꞌhuëárahuë.