Jeremías 36 - Chayahuita (Shahui)

Paroco Yosë chinotacaso pëiquë quirica nontërinsoꞌ

¹ Cosiasë huiꞌnin Coaquin itopisoꞌ Cota huënton copirno nisarin. Nani catapini piꞌipi copirno yaꞌconinso nisahuasoꞌ, Sinioro nontatonco:

² “Aꞌnara soꞌnanpi quirica maquëꞌ. Naporahuaton israiroꞌsaꞌ, Cota huënton israiroꞌsaꞌ, yaꞌipi aꞌnapita nacionoꞌsaꞌ, inapita maꞌsona onpotaꞌhuasoꞌ shaꞌhuitëranquënsopita inaquë ninshitëquëꞌ. Cosiasë copirno huaꞌanëntasoꞌ, caniaritërahuë nontaꞌhuanquënsoꞌ. Ipora tahuëriquë huarëꞌ anitotëranquënsopita ninshitëquëꞌ.

³ Tapona Cota huënton israiroꞌsa huëhuëpiro yonquirapirahuëso nitotatonaꞌ, co noyahuëꞌ nipisoꞌ yaaꞌpoápirinahuëꞌ. Inapopi naporini, co noyahuëꞌ nicatona oshahuanpisoꞌ, inquichitohuëꞌ,” itërinco.

⁴ Napotohuachincora, Niriasë huiꞌnin Paroco itopisoꞌ amatërahuë. Huëꞌpachina, yaꞌipi Sinioro anitotërincosopita ninshitacaso marëꞌ camairahuë: “Nonahuëso chachin yaꞌipi ninshitëquëꞌ,” itërahuë. Napotohuatora, yaꞌipi ninshitërin.

⁵ Ninshitërinso tiquihuachina, camaiantarahuë: “Caso co nanitërahuë Yosë chinotacaso pëiquë pacaꞌhuasoꞌ.

⁶ Napoaton ayono tahuëri nanihuachin, piyapiꞌsa niyontonapi. Naporoꞌ quëma paꞌsahuaton, ninshitëransoꞌ natantonënaquë nontëquëꞌ. Quirosarin yaꞌhuëhuanoꞌsaꞌ, Cota huënton ninanoroꞌsa quëran huëꞌpisopita, inapita Siniorori anitotërinso natainaꞌ.

⁷ Siniorori inapita paꞌpi noꞌhuiton huëhuëpiro nitacasoꞌ yonquirin. Tapona ina natanatonaꞌ, co noyahuëꞌ nipisoꞌ yaaꞌpoápirinahuëꞌ. Inapoatona Sinioro nontopi naporini, inariso nichaꞌëitonhuëꞌ,” itërahuë.

⁸ Napotohuatora, inaso shaꞌhuitërahuëso chachin ninin. Yosë chinotacaso pëiquë paꞌsahuaton quirica ninshitërinsoꞌ nontërin.

⁹ Coaquin copirno yaꞌconinsoꞌ, aꞌnatërápo piꞌipi, iscon yoqui nisarin. Naporo tahuëri ayono nicacaiso marëꞌ camaitopi niꞌton, Sinioro marëꞌ niyontonpi. Yaꞌipi Quirosarin yaꞌhuëhuanoꞌsaꞌ, Cota huënton ninanoroꞌsaquë yaꞌhuëpisopita, inapita Yosë chinotacaso pëiquë niyontonpi.

¹⁰ Parocontaꞌ, inaquë paꞌnin. “Nasha yaꞌcoana,” itopisoꞌ notënanquë “Inapa iꞌiratëꞌ,” itopiso yaꞌhuërin. Inaquë pantarahuaton, Sahuin huiꞌnin Quimariasë itopisoꞌ patoananën quëran, yaꞌipiya natantasoi quirica ninshitërinsoꞌ nontërin.

Huaꞌanoꞌsa natantonënquë Paroco nontaantarinsoꞌ

¹¹ Micaiasëntaꞌ, huaꞌan yaꞌconin. Inasoꞌ, Quimariasë huiꞌnin, nisahuaton Sahuin shiin. Inantaꞌ, yaꞌipi Paroco quirica nontërinsoꞌ natanin.

¹² Natanahuaton, copirno huaꞌanëntërinso pëiquë paꞌnin. Quirica ninshitonaꞌpi patoananënquë, chiníquën nanantopisopita huaꞌanoꞌsa nani niyontonpi. Irisama ninshitonaꞌpi, Simaiasë huiꞌnin Piraia, Acaporo huiꞌnin Irnatan, Sahuin huiꞌnin Quimariasë, Ananiasë huiꞌnin Sitiquiasë, inapita. Nisahuaton, aꞌnapita huaꞌanoꞌsanta nani niyontonpi.

¹³ Micaiasëri yaꞌcoontarahuaton, Paroco quirica nontërinso yaꞌipi shaꞌhuitërin.

^14-15 Ina natanahuatonaꞌ, huaꞌanoꞌsaso aꞌnara comision Ioti itopisoꞌ aꞌpapi. Ioti paꞌpinsoꞌ Nitaniasë. Nitaniasë paꞌpionta Sirimiasë. Sirimiasë paꞌpionta Cosi, itopi. Yaaꞌpahuachinara shaꞌhuitopi: “Paroco quirica quëcaton quiyanta natanaꞌhuaiso marëꞌ nonchin,” itopi. Huëꞌpachina: —Huënsëaton nontëquëꞌ, itopi. Napohuachinara, Parocosoꞌ nontërin.

¹⁶ Huaꞌanoꞌsaso natanahuatonaꞌ, paꞌyanpi. Paꞌyanënaquë itohuara capini niniꞌsapi quëran: —Namasoꞌ, copirnonta nitotacaso yaꞌhuërin, topi.

¹⁷ Ina quëran Paroco natanpi: —¿Onpo ninshitëranta yaꞌipi iso quirica? itopi.

¹⁸ —Irimiasë, caniaritërin quëran tiquiaquë huarëꞌ shaꞌhuitërarinco ninshitërahuë, itërin inarintaꞌ.

¹⁹ Napohuachina huaꞌanoꞌsari: —Ipora quëmasoꞌ Irimiasërëꞌquën chachin intópanta paꞌsahuatomaꞌ, naꞌpicamaso yaꞌhuërin, itopi.

Coaquin copirno quirica aꞌpërinsoꞌ

²⁰ Huaꞌanoꞌsasoꞌ, Irisama ninshitonaꞌpi patoananënquë chachin ina quirica patopi. Ina quëran copirno pëinënquë paꞌsahuatonaꞌ, yaꞌipi shaꞌhuitonpi.

²¹ Copirnosoꞌ natanahuaton, Ioti chachin camaiantarin ninshitonaꞌpi pëinënquë quirica macontacasoꞌ. Macontarahuaton copirno, huaꞌanoꞌsaꞌ, inapita natantonënquë nontërin.

²² Pascoa yoqui quëran nani iscon yoqui naꞌhuërin niꞌton, naporoso sëhuën tahuëriꞌsa nisarin. Napoaton copirnosoꞌ, napëntërinso pëiquë pana pochin nininquë napëntarin.

²³ Ioti carahuë nipon, catapini panshinhuë nipon nontohuachina, copirnori cosoroaꞌhuaquë yashararin. Inapotahuaton pënquë aꞌpërin. Inapotochináchin yaꞌipi soꞌnanpi quirica tiquiaquë huarëꞌ nitërin.

²⁴ Copirno, catahuarinsopita huaꞌanoꞌsaꞌ, inapitaso natanaponaraihuëꞌ co manta Sinioro tëꞌhuatopihuëꞌ. Co oshanëna marëꞌ tëranta sëtopihuëꞌ.

²⁵ Irinatan, Tiraiasë, Quimariasë, inapitaso ama soꞌnanpi quirica aꞌpëcaso marëhuëꞌ nontopirinahuëꞌ, co copirnori natërinhuëꞌ.

²⁶ Naporahuaton, Parocoroꞌco chachin macainacoiso marëꞌ camaitërin. Quëmopinën Quiramiiro itopisoꞌ ina marëꞌ camairin. Asirisi huiꞌnin Siraiasë, Apitiiri huiꞌnin Sirimiasë, inapitanta ina chachin camairin. Napotohuachina, inapitaso yonisápirinacoihuëꞌ, co quënaninacoihuëꞌ. Sinioro poꞌorincoi niꞌton, co quënaninacoihuëꞌ.

Aꞌna yaꞌhuërë aninshitaantarincosoꞌ

²⁷ Quirica copirnori ahuiquitërinso piquëran, Siniorosoꞌ nontatonco:

²⁸ “Yaꞌnan aninshitëranquënso quirica Coaquin copirnori ahuiquitërin. Inapotërin niꞌquëhuarëꞌ, aꞌna soꞌnanpi quirica maantarahuaton, yaꞌnan aninshitëranquënso pochachin aninshitaantaquëꞌ.

^29-30 Aninshitaantarahuaton, inaquë copirnonta shaꞌhuitapon: ‘Sinioro naporin: “Ca nohuanton Irimiasë aninshitërin. Papironia copirno huëcaton, iso noꞌpaꞌ ataꞌhuantapon. Inapotohuachina, piyapiꞌsaꞌ, maꞌsharoꞌsa inapita co acoaponhuëꞌ,” tënin aninshitërinquë. Ina marëꞌ quëmarisoꞌ Irimiasë noꞌhuiran. Naporahuaton soꞌnanpi quirica aninshitërinsontaꞌ, ahuiquitëran. Naporanso marëꞌ ca Sinioroco shaꞌhuitaranquën: Quëmasoꞌ Tapi shinquën niꞌton, israiroꞌsa huaꞌanëntëran. Napoaponahuëꞌ, ca nohuanton quëma huiꞌnansoꞌ, co huachi israiroꞌsa huaꞌanëntarinhuëꞌ. Chiminpatan co paꞌpitaponënhuë niꞌton, nonën tahuëriso piꞌiri acoápon. Tashintaꞌ, sëhuëni quëtápon.

³¹ Quëmá quëran pipipisopita, catahuarinënquënsopita huaꞌanoꞌsaꞌ, yaꞌipinquëma oshanëma marëꞌ anaꞌintaponquëmaꞌ. Ca nohuanton Quirosarinquë yaꞌhuëpisopita, Cota huëntonquë yaꞌhuëpisopita, inapita huëhuëpiro shaꞌhuitërahuësoꞌ, nanipon. Nani shaꞌhuitopiranquëmahuëꞌ, co natëramacohuë niꞌton, napoarin,’ tënin, itëquëꞌ,” itërinco.

³² Napotohuachincora, aꞌna soꞌnanpi quirica maantarahuato, Paroco ninshitonaꞌpi quëtërahuë. Ina quëran iꞌhua Coaquin copirnori ahuiquitërinquë yaꞌhuërinso pochachin aninshitaantarahuë. Iꞌhua aninshitërahuë quëran, naꞌcon naꞌcon pochin aninshitocoantarahuë.