Jeremías 26 - Chayahuita (Shahui)

Yatëparinacosoꞌ

^1-2 Cosiasë huiꞌnin Coaquin itopisoꞌ nasha copirno Cota huëntonquë yaꞌconarin. Naporo tahuëriꞌsa Sinioro nontatonco: “Cota huëntonquë naꞌa ninanoroꞌsa yaꞌhuërin. Ina quëran huëꞌsahuatonaꞌ, pëinëhuëquë chinotërinaco. Inapita shaꞌhuitacaso marëꞌ nani nanan anitotëranquën. Yaꞌipi anitotëranquënsoꞌ, pëinëhuë iꞌiratëquë huanirahuaton shaꞌhuiquëꞌ.

³ Nani co noyahuëꞌ nipiso marëꞌ anaꞌintaꞌhuasoꞌ yonquirahuë. Napopirahuëꞌ, natëtënën co noyahuëꞌ nipiso aꞌpohuachinaꞌ, co huachi yonquirahuëso chachin nitapohuëꞌ.

^4-6 Iso pochin shaꞌhuitaran: ‘Maꞌsona shaꞌhuitëranquëmasopita coꞌsoꞌ natëhuatamahuëꞌ, ca marëꞌ pënëntopisopitanta co natëhuatamahuëꞌ, iso chinotëramacoso pëiꞌ, iráca Siroquë yaꞌhuërinso pochachin ataꞌhuantarahuë. Ca marëꞌ pënëntopisopitasoꞌ cari aꞌparahuë niꞌton, naquëranchin naquëranchin pënënárinënquëmaꞌ. Inapita co natëramahuëꞌ niꞌton, anaꞌintaranquëmaꞌ. Quirosarin ninano inapotohuato, yaꞌipi nacionoꞌsaquë yaꞌhuëpisopita ama huachi noya yaꞌhuëcaiso marëhuëꞌ yashaꞌhuitohuachinaꞌ iso pochin shaꞌhuitapi: “Quirosarin ninano Yosëri ataꞌhuantërinso pochachin canpitanta ataꞌhuanchinquëmaꞌ,” taponaꞌ, tënin Sinioro,’ itëquëꞌ,” itërinco.

⁷ Naporinso chachin Yosë pëinën iꞌiratëquë shaꞌhuirahuë. Shaꞌhuihuatora, corto huaꞌanoꞌsaꞌ, pënëntonaꞌpiroꞌsaꞌ, yaꞌipi yaꞌhuëhuanoꞌsaꞌ, inapita natanpi.

^8-9 Sinioro camairincosoꞌ, nani shaꞌhuihuatora, yaꞌipi natanpisopita masahuatonaco noꞌhuirinaco: “Iporasoꞌ chiminamaso yaꞌhuërin. Quëmasoꞌ pënëntohuatana, ‘Yosë chinotacaso nëꞌmëtë pëi Siroquë yaꞌhuërinsoꞌ, Siniorori ataꞌhuantërin. Ina pochachin isonta chinotërëhuaso pëiꞌ, ataꞌhuantarin. Iso ninanonta ataꞌhuantohuachin, tanahuantápon,’ tënan. Napoaton quëmasoꞌ, co tëꞌhuarohuanhuë pochin nonan. ¡Co ina pochin nonacaso yaꞌhuërinhuëꞌ!” itërinaco.

¹⁰ Cota huënton huaꞌanoꞌsanta naporapiso natantatonaꞌ, copirno pëi quëran Yosë chinotopiso pëiquë paꞌpi. Inaquë paꞌsahuatonaꞌ, “nasha yaꞌcoana” itopisoꞌ yaꞌcoanaquë huënsëconpi.

¹¹ Naporoꞌ corto huaꞌanoꞌsaꞌ, pënëntonaꞌpiroꞌsaꞌ, inapitasoꞌ, huaꞌanoꞌsaꞌ, yaꞌhuëhuanoꞌsa inapita nontatona itaponaꞌ: “Iso quëmapi chiminacaso yaꞌhuërin. Iso ninano taꞌhuantacasoꞌ shaꞌhuirin. Yaꞌipinquëma natanamaꞌ,” topi.

¹² Caso napoaporahuëꞌ, huaꞌanoꞌsaꞌ, yaꞌhuëhuanoꞌsa inapita nontato: “Sinioro nanan quëtërinco niꞌton, iso ninanoꞌ, Yosë chinotacaso pëiꞌ, inapita maꞌsona onpocasoꞌ shaꞌhuitëranquëmaꞌ.

¹³ Noya noya nicacamasoꞌ cancantocoꞌ. Sinioroso Yosënënpoa niꞌton, ina natëcoꞌ. Inapohuatamaꞌ, maꞌsha onpotiinquëmasoꞌ shaꞌhuitopirinquëmahuëꞌ, co inapotarinquëmahuëꞌ.

¹⁴ Caso nipirinhuëꞌ, maꞌsona yaonpotohuatamaco, inapotoco nipachin.

¹⁵ Napoaponahuëꞌ, noya yonquicoꞌ. Tëpahuatamacosoꞌ, co manta onpopirahuëꞌ tëpapomaco. Ina marëꞌ yaꞌipinquëma naꞌinaramaꞌ. Yaꞌipi shaꞌhuitëranquëmasopitasoꞌ, co caora nohuanton shaꞌhuitëranquëmahuëꞌ. Sinioro aꞌparinco niꞌton, napotëranquëmaꞌ,” itërahuë.

¹⁶ Napohuatora, huaꞌanoꞌsaꞌ, yaꞌhuëhuanoꞌsaꞌ, inapitari corto huaꞌanoꞌsaꞌ, pënëntonaꞌpiroꞌsaꞌ, inapita nontatona itaponaꞌ: “Iso quëmapi co manta onpotacaso yaꞌhuërinhuëꞌ. Siniorosoꞌ Yosë niꞌton, pënënainpoaso marëꞌ aꞌparin,” itopi.

^17-18 Aꞌnaquën ansianoroꞌsantaꞌ, huanirahuatona yaꞌhuëhuanoꞌsa niyontopisopita nontopi: “Cota huëntonquë Isiquiasë copirno nicasoꞌ, Morisitoquë aꞌnara pënëntonaꞌpi yaꞌhuërin. Inanta Siniorori nanan quëtërin niꞌton, yaꞌipi Cota huënton israiroꞌsa pënënaton itapon: ‘Siniorosoꞌ yaꞌipi nanitapaton: Quirosarin ninano ataꞌhuantapon. Imin taparocamarëꞌ ohuërëpiso pochin nitapon. Quirosarin ninanoquë naꞌpiroꞌsaraꞌ yamorápon. Yosë pëinën yaꞌhuërinquë motopiaꞌhuantaꞌ, pantatápon,’ tënin.

¹⁹ Miquiasëso napopirinhuëꞌ, yaꞌipi Cota huënton israiroꞌsaꞌ, Isiquiasë copirno, inapitariso co tëpapihuëꞌ. Copirno quëran huarëꞌ Sinioro tëꞌhuataton nosorocaiso marëꞌ nontërin. Napohuachina ataꞌhuantacaso shaꞌhuitaponahuëꞌ, co huachi inapotërinhuëꞌ. Irimiasë tëpahuatëhuasoꞌ, ¡naꞌcon naꞌcon naꞌinarihuaꞌ!” itopi.

²⁰ Simaiasë huiꞌnin Oriasë pënëntonaꞌpintaꞌ, Quiriato-quiarimo ninanoquë yaꞌhuërin. Inanta ca pochachin Siniorori nanan quëtërin niꞌton, iso ninanoꞌ, iso noꞌpaꞌ, inapita taꞌhuantacasoꞌ shaꞌhuirin.

²¹ Ina naporinsoꞌ, Coaquin copirno, catahuarinsopita huaꞌanoꞌsaꞌ, aꞌnapita huaꞌanoꞌsaꞌ, inapitanta natanpi. Ina marëꞌ copirnori yatëparin. Oriasëso napoaponahuëꞌ, ina natantahuaton tëꞌhuanënquë Iquipitoꞌpaꞌ taꞌarin.

²² Napohuachina, copirnosoꞌ Acaporo huiꞌnin Irinatan itopisoꞌ inatohua aꞌparin. Caraya quëmapiꞌsanta ina catahuacaso marëꞌ aꞌparin.

²³ Inapitari Iquipito quëran mamarahuatonaꞌ, copirnoquë quëpi. Inari atëpatahuaton, chimipiroꞌsa tëꞌyatopisoꞌ naninquë atëꞌyatërin.

²⁴ Caso napoaporahuëꞌ, aꞌnara huaꞌan catahuarinco niꞌton, co yaꞌhuëhuanoꞌsaquë tëpainacoso marëꞌ yoꞌninacohuëꞌ. Inaso huaꞌan Sahuano huiꞌnin Aicamo itopi.