Jeremías 23 - Chayahuita (Shahui)

Aꞌna tahuëri piyapinënpita noya acoantacasoꞌ shaꞌhuirinsoꞌ

¹ Aꞌna tahuëri Sinioro nontaantarinco: “Huaꞌanoꞌsasoꞌ, piyapinëhuëpita aꞌpaicaiso marëꞌ acorahuë. Inapitasoꞌ, aꞌpaitonaꞌpi ohuicaroꞌsa noya aꞌpairinso pochin nitacaiso yaꞌhuërin. Yaꞌhuëpirinhuëꞌ, co inapotopihuë niꞌton, piyapinëhuëpitasoꞌ, chihuëatona yanquëëpiso pochin nipi. Huaꞌanoꞌsa napopisopitasoꞌ, ¡maꞌhuántacha nisapi paya!” itërinco.

² Siniorosoꞌ Yosë. Yaꞌipi israiroꞌsanpoa chinotërëhuaꞌ. Inari chachin huaꞌanoꞌsanquëma anitotarinquëmaꞌ: “Canpitaso piyapinëhuëpita co noya aꞌpaitomahuëꞌ, ayanquëëramaꞌ. Aꞌpaitonaꞌpi ohuicanënpita co noya aꞌpairinsohuë pochin niconamaꞌ. Napoatoma co noyahuëꞌ ninama niꞌton, anaꞌintaꞌhuanquëmaso yaꞌhuërin. Ca Sinioroco shaꞌhuitaranquëmaꞌ.

³ Huaꞌqui quëran napoaponahuëꞌ, piyapinëhuëpita ayontoantarahuë. Nisha nisha parti aꞌparahuë quëran huënantaponaꞌ. Ohuicaroꞌsa pastonënquë chachin quënantahuatëra, naꞌantarinso pochin inapitanta nitarahuë.

⁴ Piyapinëhuëpita huënantahuachinaꞌ, noya huaꞌanoꞌsari aꞌpaicaiso marëꞌ acotarahuë. Inapitari aꞌpaihuachinaꞌ, co manta tëꞌhuatapihuëꞌ. Napoatona co aꞌnaya tëranta pahuanaponahuëꞌ. Ca Sinioroco shaꞌhuitaranquëmaꞌ,” tënin.

⁵ Ina quëran Sinioro taantarin: “Ca nohuanton aꞌna tahuëri Tapi shiin yaꞌhuëapon. Ina huaꞌanëntohuachin, yonquínahuan copirno nisarin. Noyasáchin nicaton, noya coisë pochin nicapon.

⁶ Ina copirno nicasoꞌ, Cota huënton israiroꞌsa chaꞌëponaꞌ. Aꞌnapita israiroꞌsantaꞌ, sano cancan quëran yaꞌhuëaponaꞌ. Nininën nohuitatonaꞌ, ‘Sinioro nichaꞌërinpoasoꞌ,’ itaponaꞌ,” tënin.

^7-8 Sinioro chachin shaꞌhuitaantarinquëmaꞌ: “Ca nohuanton aꞌna tahuëri Yoscoarëꞌ topatamaꞌ, nisha nonapomaꞌ. Iporasoꞌ nonpatamara: ‘Sinioro niꞌsárinpoaꞌ. Inasoꞌ, israiroꞌsanpoa Iquipito quëran ocoirinpoaꞌ,’ tënamaꞌ. Naporoso nipirinhuëꞌ: ‘Sinioro niꞌsárinpoaꞌ. Inasoꞌ israiroꞌsanpoa norti parti, nisha nisha parti ayanquëëpirinpoahuëꞌ, ocoiantarinpoaꞌ,’ tapomaꞌ. Inapoatoma yaꞌhuëramaquë chachin yaꞌhuëantapomaꞌ,” tënin.

Nonpinatona pënëntopisopita pënëninsoꞌ

⁹ Nonpi nanan pënëntopisopita pënënaꞌhuaso marëꞌ Sinioro anitotërinco. Ina yonquiato co napion ancantarahuë. Yaꞌipi nonëhuë quëran huarëꞌ ropatërahuë. Noꞌpito yanotatárahuëso pochin ninatanahuë. Sinioro noyasáchin noninsopita yonquiato naporahuë.

¹⁰ Yaꞌipi Israiro noꞌpaquë monshihuantëroꞌsa pochin cancantopisopita naꞌamiatërin. Co noyahuëꞌ nicacaisoráchin cancantopisopita naꞌamiatërin. Co noyahuëꞌ ninicatona co nipaꞌpoyapihuëꞌ. Napoaton Siniorosoꞌ ama huachi isoroꞌpaꞌ noyatacaso marëhuëꞌ, shaꞌhuitërin. Inapotërin niꞌton, yanitë pochin ninin. Inotëroquë pastoroꞌsa yaꞌhuërinsopitantaꞌ, huëyarin.

¹¹ Napoaton Sinioro naporin: “Pënëntonaꞌpiroꞌsaꞌ, corto huaꞌanoꞌsa inapitaso noya noya nicacaiso nipirinhuëꞌ, inapitaꞌton paꞌpi co noyahuëꞌ nipi. Pëinëhuëquë chachin co noyahuëꞌ nipisoꞌ, quënayatërahuë.

¹² Napoaton cari chachin inapita anaꞌintarahuë. Aꞌnanaya maꞌsha onpocaisoꞌ cantiipon. Co incari tëranta nichaꞌëponhuëꞌ. Ca Sinioroco shaꞌhuitaranquëmaꞌ.

¹³ Iráca Samariaquë pënëntonaꞌpiroꞌsa yaꞌhuëpisopita napopisoꞌ niꞌnahuë. Paꞌpi noꞌhuípiro niꞌnahuëso nipi. Paaro marëꞌ pënëntopi. Inapoatona piyapinëhuëpita israiroꞌsa itopisoꞌ achihuëpi.

¹⁴ Quirosarinquë pënëntonaꞌpiroꞌsa yaꞌhuërinsontaꞌ, napopisoꞌ niꞌnahuë. Paꞌpi co noyahuëꞌ nicatona saꞌina tëhuananpitopi, nonpinpi, napopi. Co noyahuëꞌ nipisopita achinicancanpi niꞌton, co insonta co noyahuëꞌ nininsoꞌ yaaꞌporinhuëꞌ. Ina pënëntonaꞌpiroꞌsaꞌ, yaꞌhuëhuanoꞌsaꞌ, inapitaso sotomaroꞌsaꞌ, comoraroꞌsaꞌ, inapita pochin niꞌnahuë.

¹⁵ Caso Sinioroco yaꞌipi nanitaparahuë. Inapita napopiso marëꞌ noꞌtëquën shaꞌhuitarahuë. Máin nininsoꞌ aꞌcatë pochin nitarahuë. Iꞌsha noniapinan oꞌshitatë pochin nitarahuë. Quirosarinquë pënëntonaꞌpiroꞌsa yaꞌhuërinso aꞌchinin quëran yaꞌipi co noyahuëꞌ nipisoꞌ cotioroꞌsa yaꞌhuëpiquë yanquëërin,” tënin.

¹⁶ Siniorosoꞌ yaꞌipi nanitapaton israiroꞌsanpoa pënëninpoaꞌ: “Ina pënëntonaꞌpiroꞌsa maꞌsona pënënpachinquëmaꞌ, ama natëtocosohuëꞌ. Inahuara yonquinëna quëran shaꞌhuitatënëma nonpintárinëmaꞌ. Co cari anitotërahuëso shaꞌhuitërinënquëmahuëꞌ.

¹⁷ Nanamëhuë nocanpisopita pënënpachinara: ‘Yaꞌipi ninamasopita noya pipitarinquëmaꞌ,’ itopi. Co noyahuëꞌ yonquipiso imapisopita pënënpachinarantaꞌ: ‘Co manta maꞌsha onpoaramahuëꞌ,’ itopi.

¹⁸ Napoaponahuë yonquirahuësopitasoꞌ, ¡co ina pënëntonaꞌpiroꞌsa nitotopihuëꞌ! ¡Co insonta nicatonco nonahuësoꞌ nataninhuëꞌ! ¡Co aꞌnaya tëranta noya natanatonco, natëcasoꞌ nohuantërinhuëꞌ!

¹⁹ Napoaton inapita noꞌhuirahuësosoꞌ, ihuaiꞌ pochin nisarin. Panca ihuan quiquitërinso pochin nisarin. Ina quiquitërinso pochin co noyahuëꞌ nipisopita nitarin.

²⁰ Ca Sinioroco noꞌhuitërahuësoꞌ, co copi tapohuëꞌ. Nohuantërahuësoꞌ naniquëhuarëꞌ, inachachin nisápon. Tahuëri nanihuachin, inapita canpitanta yonquiapomaꞌ. Ina yonquiatomaꞌ: ‘Tëhuënchachin noꞌtëquën Sinioro sacatërin,’ tëcapomaꞌ.

²¹ Ina pënëntonaꞌpiroꞌsasoꞌ, co cari aꞌparahuëꞌ. Co piꞌpian tëranta nonchátërarahuëꞌ. Inahuaso napoaponahuëꞌ, mano manorahuatë paꞌnëso pochin ‘Sinioro nanan quëtërincoi niꞌton, nontarainquëmaꞌ,’ toconpi.

²² Tëhuënchachin piyapinëhuëpita nipi naporini, imarinacosopita nanamëhuë anitochitonahuëꞌ. Piyapinëhuëpitanta ina nitotatonaꞌ: ‘Tëhuënchachin co noyahuëꞌ ninëhuaꞌ. Huëco paꞌahua ina aꞌporahuatëhuaꞌ, Sinioro natëahuaꞌ,’ niichitonahuëꞌ.

^23-24 Caso Yosëco niꞌto, isëquë yaꞌhuërahuë. Aquënta nipirinhuëꞌ, yaꞌhuëarahuë chachin. Co inquëma tëranta nanitëramahuëꞌ naꞌpitamacosoꞌ. Inápaquë, isoroꞌpaquë, yaꞌipi parti yaꞌhuëarahuë.

^25-26 Ina pënëntonaꞌpiroꞌsa nonpintatënëmaꞌ: ‘Sinioro huëꞌëhuëquë yánontërinco,’ topiso natanahuë. Inahuara yonquinëna quëran naporápi. ¿Onporo huarëcha napopisoꞌ copi tënëꞌpoiya?

²⁷ Huaꞌnapiso shaꞌhuitonaꞌ, piyapinëhuëpita naniantiinacoso yonisapi. Iráca shimashonënapitantaꞌ, Paaro mamanshi moshacaiso marëꞌ naniantërinaco. Inapita pochachin ipora piyapinëhuëpitanta nisapi.

^28-29 Aꞌna pënëntonaꞌpi huaꞌnatohuachina, ‘huaꞌnarahuë taꞌa,’ chin. Nanamëhuë chachin natanpachinso napoaponahuëꞌ, ama nisha shaꞌhuiinsohuëꞌ. Tricorayasoꞌ co piꞌpitën pochin nininhuëꞌ. Nanamëhuësoꞌ, tricoraya pochin ninin. Nanamëhuësoꞌ, pën maꞌsha ahuiquitërinso pochin ninin. ¡Panca martichoquë natëtë nipoatërëso pochin ninin antaꞌ! Ca Sinioroco shaꞌhuitaranquëmaꞌ.

^30-32 Napoaton nonpi nanan pënëntopisopita inimicotërahuë. Inahuara capini ninonpintaponaraihuëꞌ, aꞌnapita shaꞌhuitohuachinara: ‘Sinioro anitotërincoi,’ toconpi. Napopiso marëꞌ inapita inimicotërahuë. Inapitasoꞌ co cari aꞌparahuëꞌ, co piꞌpian tëranta camairahuëꞌ. Niponahuëꞌ, huaꞌnapisopita shaꞌhuitatënënquëma pënënarinënquëmaꞌ. Pënënpirinquëmahuëꞌ, co manta noya cancantamaso catahuaponquëmahuëꞌ. Anishacancantarinquëma tëhuënchinsoꞌ. Caso Sinioroco shaꞌhuitaranquëmaꞌ,” tënin.

^33-40 (-)