Jeremías 20 - Chayahuita (Shahui)

Pasoro corto huaꞌan maꞌsona onpocasoꞌ shaꞌhuitërahuësoꞌ

¹ Imiri huiꞌnin Pasoro itopisoꞌ corto huaꞌan, pënëntërahuësoꞌ natanin. Inasoꞌ corto huaꞌan, Yosë pëinën aꞌpairoꞌsa huaꞌanën yaꞌconin.

² Ina natanaton camaitërin: “Irimiasë huihuirahuatomaꞌ, nontëroꞌsaquë nantëquën acatëntocoꞌ,” tënin. Napohuachina inapotërinaco. Ina nontëroꞌsasoꞌ, “inapa Mincamin yaꞌcoana” itopiquë yaꞌhuërin. Ina yaꞌcoanasoꞌ, Yosë chinotacaso pëi pirayan yaꞌhuërin.

³ Tahuëririnquë ina nontëroꞌsa quëran ocoinacoso camaitërin. Naporoꞌ cari itapo: “Sinioro nininën canpiatërinquën. Co huachi Pasoro itaponënhuëꞌ. ‘Macoro-misapipi’ itaponën.

⁴ Co topinan ina pochin nohuitarinënhuëꞌ. Sinioro napotërinquën: ‘Ca nohuanton paꞌpi chiníquën parisitaran. Amiconënpitanta napoaponaꞌ. Inapoatoma paꞌpi huëhuëpiro nisaramaꞌ. Quëma niꞌtonënquë chachin amiconënpita inimicoroꞌsari tëpapon. Yaꞌipi Cota huëntonquë yaꞌhuëpisopita Papironia copirnori canapon. Inari aꞌnaquën yaꞌhuërinꞌpaꞌ quëpapon. Aꞌnaquënsoꞌ, cosoroaꞌhuaquë tëpapon.

⁵ Iso ninanoquë maꞌsha paꞌton nininsopita, Cota huënton copirnoroꞌsa paꞌton nininsopita tapapisoꞌ, yaꞌipi inapita ca nohuanton inimicoroꞌsa matarinëmaꞌ. Papironiaꞌpaꞌ yaꞌipi quëpaponaꞌ.

⁶ Quëmanta Pasoro, inátohua quëpaponën. Saꞌan, huiꞌnanpita, quëmopinënpita, inapitarëꞌquën chachin paꞌsaran. Inaquë chiminpatan, paꞌpitaponën. Amiconënpita nonpi nananoꞌsa shaꞌhuitëransopitantaꞌ, quëmarë chachin paꞌpitaponaꞌ,’ tënin Sinioro,” itërahuë.

Co napion ancantato Yosë nontaantarahuësoꞌ

⁷ Sinioro, quëma piyapinën nicaꞌhuaso marëꞌ noyasha nontatonco përaranco. Napotohuatancora carinquënso natëranquën. Quëmasoꞌ chini chiníquën nanantëran niꞌton, canaranco. Quëma nanamën shaꞌhuirahuëso marëꞌ nani tahuëri tëhuarinaco.

⁸ Maꞌsona nonpatëra co maꞌsha shaꞌhuirahuëꞌ: “Inimicoroꞌsa huëꞌsahuatonaꞌ, ahuëarinënquëmaꞌ. Ataꞌhuantarinënquëmaꞌ,” tosárahuë. Ina marëꞌ noꞌhuirárinaco. Tëhuarárinaco. Quëma nanamën shaꞌhuirahuë niꞌton, napotërinaco.

⁹ Amiato: “Ama huachi Sinioro yonquiꞌisohuëꞌ. Nanan quëtopirincohuë tërantaꞌ, ama huachi noinsohuëꞌ,” tënahuë. Taporahuëꞌ, quëma nanamën yaꞌcoancantërinco niꞌton, pën maꞌsha ahuiquitërinso pochin nitárinco. Nansëanaquë huarëꞌ piꞌcarincoso pochin natanahuë. “Chinitato nipachin ama noinsohuëꞌ,” taporahuëꞌ, ¡coꞌchi nanitërahuëꞌ cacotaꞌhuaso paya!

¹⁰ Naní quëran pochin tëhuatonaco: “Yaꞌipi parti paꞌyan yaꞌhuërin” itoninaco. Naporahuaton: “Huëco paꞌahua shaꞌhuirapiahuaꞌ,” tosápi. Amiconëhuëpita quëran huarëꞌ tëhuëcaꞌhuaso ninapi. Monatonaco yacanarinaco. “Canarëhua naporini, iꞌhuërëchitërihuahuëꞌ,” topi.

¹¹ Quëmasoꞌ Sinioro napoaponahuëꞌ, catahuancoso marëꞌ yaꞌhuëaran. Ahuëtonaꞌpi co minsëchináchinhuë pochin ninan. Aparisitërinacosopitasoꞌ, anotërëso pochin nicaponaꞌ. Co minsëinacoso nanitapihuëꞌ. Napoatonaꞌ, taparo nisapi. Quëmari minsëransoꞌ, ama insonta nanianchinsohuëꞌ.

¹² Sinioro quëmasoꞌ yaꞌipi nanitaparan. Maꞌsona onporaisopita noꞌtëquën tantiarancoi. Yonquiraisopitantaꞌ, naniarin quëran huarëꞌ nitotëran. Quëmasáchin caso ninaranquën niꞌton, inimicotërinacosopita anaꞌintëransoꞌ, niꞌi.

¹³ ¡Sinioro paꞌyatatëhua cantahuaꞌ! Co noyahuëꞌ nipisopita aparisitopirinënpoahuëꞌ, inaso nichaꞌërinpoaꞌ.

^14-15 ¡Mamahuë huairincoso tahuëri, paꞌpi co noyahuëꞌ niꞌnahuë! Quëmapiaꞌhua huaꞌhuatërahuëso tatahuë shaꞌhuitaton acapacancaninso quëmapintaꞌ, ¡paꞌpi co noyahuëꞌ niꞌnahuë!

¹⁶ Aꞌnaquën ninanoroꞌsa Siniorori ataꞌhuantomiatërin. Ina ninanoroꞌsa pochin ina quëmapinta niin. Tashiramiachin maꞌsha onpoatona noncaropisoꞌ, nataꞌin. Camotëchinta ahuëtahuachinaꞌ, shaꞌhuitona noncaropisoꞌ, nataantaꞌin.

¹⁷ ¡Maꞌcha Sinioro mamahuë yoꞌnamënquë tëpachinarancohuëꞌ paya! Inapotëranco naporini, co huaꞌhuachitohuëꞌ. Ina quëran chachin paꞌpitërinacoso pochin quëparichitohuëꞌ.

¹⁸ Huaꞌhuatato naꞌcon parisitërahuë, sëtërahuë, taparo nisárahuë, naporahuë. ¡Co huaꞌhuatërahuëꞌ naporini, noya noya niitohuëꞌ! itërahuë.