Jeremías 2 - Chayahuita (Shahui)

Co Sinioroíchin cancantatonaraihuëꞌ, panca tëhuëpisoꞌ

¹ Naquëranchin Sinioro nontatonco:

² “Quirosarinquë yaꞌhuëpisopita nontoonquëꞌ. Chiníquën nonaton ca Sinioroco naporahuësoꞌ shaꞌhuitëquëꞌ: ‘Iráca casáchin cancantëramaco. Niꞌquëꞌ. Nanon nasha soꞌyahuachina, soꞌin naꞌcon nosororin. Ina pochin canpitanta cancantatomaꞌ, inotëro parti imaquiramaco. Inaquëso co maꞌsha tëranta shaꞌnëhuë nipirinhuëꞌ, naporamaꞌ.

³ Naporoꞌ canpitasoꞌ, carima huaꞌanëntëranquëmaꞌ. Sharoꞌsa yaꞌnan cayarinso pochin ca marëꞌ ninamaꞌ. Inpitasona maꞌsha onpotërinquëmasoꞌ, cari anaꞌintërahuë. Nisha nisha quëran anaꞌintato iꞌhuërëtërahuë. Ca Sinioroco shaꞌhuitaranquëmaꞌ,’ tënin,” itërinco.

^4-5 Israiroꞌsanquëmasoꞌ, Cacopo quëran pipiramaꞌ. Yaꞌipinquëma Sinioro nontërinquëmasoꞌ natancoꞌ: “¡Caso co maquë tëranta shimashonëmapita tëhuëtërahuëꞌ! Napoaponahuë inapitasoꞌ, aꞌporinaco. Mamanshiroꞌsa co máquënhuë nipirinhuëꞌ, ina imapi. Napoaton inahuara chachiontaꞌ, nitapiatë pochin nipi.

⁶ Naniantatonaco, co yonirinacohuëꞌ. Cari Iquipito quëran ocoiato, inotëro parti quënahuë. Inaso noꞌpaꞌ, yaniroꞌ. Notohuaroꞌ ohuatë yaꞌhuërin. Inaquëso co iꞌsha yaꞌhuërinhuëꞌ, paꞌpi huëhuëpiro yaꞌhuërin. Co insonta inaquë yaꞌhuërinhuëꞌ. Co insonta inaëchin iratërinhuëꞌ.

⁷ Ina piquëran iso noyaroꞌpaquë nitërinsopita capacaiso marëꞌ quënahuë. Noya noyatërinsopita capacaiso marëꞌ quëpirahuëꞌ, huëꞌsahuatonaꞌ, noꞌpanëhuë tapipi. Cari iso noꞌpaꞌ huaꞌanëntopirahuëꞌ, amirotochináchin acotërinaco.

⁸ Corto huaꞌanoꞌsa co yonirinacohuëꞌ. Piyapinëhuëpita aꞌchinaꞌpiroꞌsantaꞌ, co nohuitërinacohuëꞌ. Huaꞌanënapita co yanatërinacohuëꞌ. Pënëntonaꞌpiroꞌsanta Paaro marëꞌ pënëntonpi. Mamanshiroꞌsa co máquënhuë nipirinhuëꞌ, inapita imapi.

⁹ Naporamaso marëꞌ coisëroꞌsaquë quëparëso pochin nitaranquëmaꞌ. Huiꞌnamapita, shiparimapita, inapitanta napotarahuë.

¹⁰ Piꞌi yaꞌconinso parti soꞌtonoꞌsaquë paꞌsahuatoma niꞌconcoꞌ. Sitaro partinta noya niꞌcamarëꞌ comision aꞌpacoꞌ. Tapona inaquëpitanta canpita pochin nipi.

¹¹ ¡Co inso nacionquë tërantaꞌ, yosënëna aꞌporahuatonaꞌ, aꞌna chinotaantapihuëꞌ! Inapitasoꞌ nonpin yosëroꞌsa imaponaraihuëꞌ, ¡co onporonta inapochinpihuëꞌ! Piyapinëhuëpitaso nipirinhuëꞌ, aꞌporinaco. Noya noya nipirahuëꞌ, mamanshiroꞌsa co manta catahuatopisopitahuëꞌ, imacaiso marëꞌ aꞌporinaco.

¹² Ina yonquiaton piꞌiroꞌtënta piyapi pochin ropachin. ¡Paꞌpi paꞌyanaton ropachin! Ca Sinioroco shaꞌhuitaranquëmaꞌ.

¹³ Piyapinëhuëpitasoꞌ naꞌcon naꞌcon oshahuanpi. Caso inapita marëꞌ nanpirin iꞌsha huinan pochin nipirahuëꞌ, aꞌporinaco. Naporahuatona iꞌsha tapainanoꞌsa acopirinahuëꞌ, nopoatonpi niꞌton, co iꞌsha yaꞌhuëirinhuëꞌ. Ina pochin niconinsoꞌ imacaiso marëꞌ aꞌporinaco niꞌton, napopi.

¹⁴ Israiroꞌsasoꞌ, co patrohuanpihuëꞌ. Co patronëna pëinënaquë huaꞌhuatopihuëꞌ. ¡Co yaꞌhuëpi quëran quëpacaisohuë nipirinhuëꞌ!

¹⁵ Paꞌpiniꞌ yamapintohuachina, përaantahuaton niitërin. Inapochachin israiroꞌsantaꞌ, inimiconënpitari nitërin. Inapotatona yaꞌipi noꞌpanëna tapitopi. Ninanonënapitantaꞌ, pënquë ahuiquitëraꞌpiapi. Napoaton tanahuantárin acopi.

¹⁶ Minpisi ninanoꞌ, Tapinisi ninanoꞌ, inapita sontaroꞌsari huaꞌanëmapita tiquirin.

¹⁷ Caso Yosënëmaco niꞌto, ira aꞌnotërëso pochin nitápiranquëmahuëꞌ, aꞌporamaco. Napoaton naporamaꞌ.

¹⁸ Napoapomarahuë canpitasoꞌ: ‘Iquipitoquë paꞌsahuatoi, Niroiꞌ oꞌosarai. Asiriaquënta paꞌsahuatoi Iopiratisiiꞌ oꞌosarai. Inapoatoi chiníquën cancantërëso pochin inapita catahuainacoiso ninaarai,’ tënamaꞌ. Napopiramahuëꞌ, inapitaso co catahuaponquëmahuëꞌ.

¹⁹ Co noyahuëꞌ ninamasoꞌ naꞌintarinquëmaꞌ. Co casáchin cancantëramacohuë niꞌton, parisitamaso yaꞌhuërin. Napoaton: ‘Sinioroso Yosënënpoa niꞌton, noya nicatëhua natëcaso yaꞌhuërin. Napopirinhuëꞌ, co natërëhuahuëꞌ. Naporahuaton aꞌpomantarëhuaꞌ. Noꞌtëquën chachin iporasoꞌ, co huachi noya yaꞌhuërëhuahuëꞌ. Parisitatëhua co napion cancantárëhuaꞌ,’ toco yonquiatomaꞌ. Caso Sinioroco yaꞌipi nanitaparahuë. Carima shaꞌhuitaranquëmaꞌ.

²⁰ Iráca quëran huarëꞌ noꞌhuitë pochin nitëramaco. Iráca quëran huarëꞌ co natëamacosoꞌ nohuantatomarahuëꞌ: ‘Co nohuantëraihuëꞌ natëtaꞌhuaisoꞌ,’ toconamaꞌ. Yaꞌipi panca panënoꞌsaquë, yaꞌipi panca taꞌan narasoquë, inaquëpita mamanshi moshatomaꞌ, monshihuantë sanapiꞌsa pochin ninamaꞌ.

²¹ Noya noya opa shaꞌnëso pochin canpitaso acoranquëmaꞌ. Huayonatë shaꞌnëso pochin nitëranquëmaꞌ. Inapotopiranquëmahuëꞌ, canpitaso coꞌchachin nishatëramaꞌ. Napoatoma co huachi onpo nohuitochináchinhuëꞌ ninamaꞌ.

²² Yaquiquë coton tapirëso pochin, canpitanta naꞌcon oshahuanatoma nitapiramaꞌ. Onponta lejiaquë pëꞌsapiramahuëꞌ, onpo shapon tiquiantopiramahuëntaꞌ, oshahuanatoma coton tapipinan pochin ninamasoꞌ, co inquiramahuëꞌ. Inachachin nisárin caso niꞌnahuë.

²³ Canpitaso naporamaꞌ: ‘Quiyasoꞌ co mamanshiroꞌsa mosharaihuëꞌ. Co coton tapipinan pochin ninaihuëꞌ,’ toconamaꞌ. ¡Co ina pochin nonamaso yaꞌhuërinhuëꞌ! ¿Maꞌta nipachin Pini-inon motopiananquë onporamaꞌ? ‘Tëhuënchachin co noyahuëꞌ ninai,’ tocoꞌ. Camiyo paya huënaitohuachina itohua itohua taꞌarinso pochin niconamaꞌ.

²⁴ Tanan mora huënaitërinso pochin canpitanta niconamaꞌ. Quëmapinën yoniton paꞌsápachina, imë imëtërantarin. Inapoasosoꞌ, co incari tëranta asanoarinhuëꞌ. Quëmapinëni yonípachina, co sacai nicaponhuëꞌ. Inapoasoꞌ aꞌnaroáchin quënanapon.

²⁵ Canpitasoꞌ, mamanshiroꞌsa paꞌyatonëmaquë patë patë́rantaramaꞌ. Inapoatoma sapatë toꞌquiramaꞌ, yaniconopiraramaꞌ, naporamaꞌ. Ama inapocamaso marëhuëꞌ pënënpiranquëmahuëꞌ: ‘Co naporinhuëꞌ, nisharoꞌsa nosoroato, inapita imasarahuë,’ toconamaꞌ.

²⁶ Ihuatë quënayatohuachinara, tapanin. Inapochachin israiroꞌsantaꞌ, tapanaponaꞌ. Topinan piyapiroꞌsaꞌ, copirnonënapita, huaꞌanoꞌsaꞌ, corto huaꞌanoꞌsaꞌ, pënëntonaꞌpiroꞌsaꞌ, inapita napoaponaꞌ.

²⁷ Nara nipirinhuëꞌ, ‘quëmaso tatahuëinquën,’ itëramaꞌ. Naꞌpinta nipirinhuëꞌ, ‘quëmasoꞌ mamahuëinquën,’ itëramaꞌ. Inapoatoma caso co huachi tahuërëtëramacohuëꞌ. Napoapomarahuëꞌ maꞌsha onpohuatamara: ‘¡Nichaꞌëcoi Sinioro!’ itaantaramaco.

²⁸ Cota huënton israiroꞌsanquëmaꞌ: ¿Yosëroꞌsa chinotëramasopita poꞌ? ¿Nani ninanonëmaquë aꞌnara acorama pora? Inapita nipachin huëcatonaꞌ, maꞌsha onporama quëran nichaꞌëinquëmaꞌ.

²⁹ Co carimasoꞌ ¿maquë tëranta tëhuëtëranquëmahuë pora? Canpita mini tëhuënchinsoꞌ yaꞌipinquëma noꞌhuitë pochin nitëramaco. Ca Sinioroco shaꞌhuitaranquëmaꞌ.

³⁰ Topinan quëran huiꞌnamapita anaꞌintërahuë. Cancan yonquicaiso marëꞌ napotopirahuëꞌ, co yanitotopihuëꞌ. Paꞌpiniroꞌsa tëꞌhuatoro yaꞌnopiso pochin nicatomaꞌ, pënëntonaꞌpiroꞌsa tëparamaꞌ.

³¹ Canpitanta ipora yaꞌhuëramasopita, Sinioro shaꞌhuitërinpoasoꞌ noya natancoꞌ. Israiroꞌsanquëmaꞌ: Inotëroquësoꞌ, paꞌpi chiníquën piꞌi piꞌcatërin. ¡Co carimasoꞌ, inapochin aparisitëranquëmahuëꞌ! Noꞌpaꞌ nanin acopontaꞌ, huëhuëpiro tashinantërin. ¡Co carimaso ina pochin aꞌpayananquëmahuëꞌ! Canpitaso piyapinëhuëpitanquëma nipomarahuë napotëramaco: ‘Nani huachi quëmá quëran chaꞌërai. Co huachi onporo tërantaꞌ, tahuërëtarainquënhuëꞌ,’ itëramaco.

³² Nanon soꞌyarinso tahuëri nitaparinsopita, ¡co onporonta naniantërinhuëꞌ! Piyapinëhuëpitaso napoaponahuëꞌ, ¡nani huaꞌqui naniantërinaco!

³³ Canpitasoꞌ, noyá nitotërama monshihuanamasoꞌ. Canpita quëran aꞌnapitantaꞌ, co noyahuëꞌ nicacaisoꞌ nitotapi.

³⁴ Popriyaroꞌsaꞌ, co manta tëhuëpisopitahuëꞌ, inapita tëparamaꞌ. Co maꞌsha tëranta onpoasoi quënayatapomarahuëꞌ, inapotëramaꞌ. Huënainëna quëran, aꞌmoramaso tapitatë pochin nitërinquëmaꞌ.

³⁵ Inapoapomarahuëꞌ: ‘Co manta tëhuëraihuëꞌ. Co maꞌmarë tëranta Yosë noꞌhuiincoiso yaꞌhuërinhuëꞌ,’ toconamaꞌ. Noyapaꞌ. ‘Co manta oshahuanaihuëꞌ,’ tënamaso marëꞌ coisëquë niquëpapiso pochin nitaranquëmaꞌ.

³⁶ ¡Catahuainëmaso marëꞌ ama aꞌna aꞌna yonícosohuëꞌ! Iquipitoroꞌsanta yonípiramahuëꞌ, co manta catahuaponquëmahuëꞌ. Asiriaroꞌsa napotërinquëmaso pochachin inapitanta nitarinquëmaꞌ.

³⁷ Catahuainëmaso marëꞌ yoniramasopita cari nocanato aꞌporahuë. Napoaton Iquipitoquë paꞌpiramahuë tërantaꞌ, huënantatoma taparo nisaramaꞌ. Co manta catahuainëmaso nanitapihuëꞌ,” tënin Sinioro.