Jeremías 19 - Chayahuita (Shahui)

Yonsha paꞌquirëso pochin nitarinsoꞌ

^1-3 Aꞌna tahuëri Sinioro itaponco: “Paaton aꞌnara yonsha paꞌanconquëꞌ. Naporahuaton aꞌnaya aꞌnaya corto huaꞌanoꞌsaꞌ, ansianoꞌsaꞌ, inapita përasahuaton Pini-inon motopianaquë quëpaquëꞌ. Inasoꞌ motopiana: ‘Socatëroꞌsa yaꞌcoana,’ itopisoꞌ notënanquë yaꞌhuërin. Inaquë nipatamaꞌ nanan anitotaranquënso shaꞌhuiton napotëquëꞌ: ‘Cota huënton copirnoroꞌsaꞌ, Quirosarinquë yaꞌhuëramasopita, yaꞌipinquëma Sinioro nanan anitotarinquëmasoꞌ, natancoꞌ. Inasoꞌ, yaꞌipi nanitapaton israiroꞌsanpoa huaꞌanëntërinpoaꞌ. Isoporinquë yaꞌhuëramasopita paꞌpi chiníquën maꞌsha onpotaranquëmaꞌ. Inso tëranta natanpachin, paꞌyanaton shaꞌpi shaꞌpitapon.

⁴ Yaꞌipinquëma aꞌporamaco niꞌton, noꞌpaꞌ quëtëranquëmaso tapiatomaꞌ, nisharoꞌpaꞌ pochin atarantëramaꞌ. Nisha nisha mamanshiroꞌsa moshacamaso marëꞌ yonarin pochin nininsoꞌ aꞌpëramaꞌ. Inapita mamanshiroꞌsasoꞌ co nohuitëramahuëꞌ. Shimashonëmapitarintaꞌ, co nohuitopihuëꞌ. Co Cota huënton copirnoroꞌsa tëranta nohuitopirinahuëꞌ, mosharamaꞌ. Naporahuaton naꞌa piyapiꞌsa co manta onpopirinahuëꞌ, tëparamaꞌ.

⁵ Artaroroꞌsantaꞌ ninamaꞌ, Paaro moshatoma huiꞌnamapita yaꞌipi ahuiquitamaso marëꞌ. Inapocamasosoꞌ, co piꞌpian tëranta camaitërahuëꞌ. Co yonquiyatërarahuëꞌ.

⁶ Naporamaso marëꞌ tahuëri nanihuachin ina motopianasoꞌ, co huachi Tohuito itaponahuëꞌ. Co Pini-inon motopiana, itaponahuëꞌ. “Israiroꞌsa tiquipiquë motopiana,” itaponaꞌ. Ca Sinioroco shaꞌhuitaranquëmaꞌ.

⁷ Cota huëntonquë, Quirosarinquë, inaquëpita maꞌsona nicacamasoꞌ yonquipiramahuëꞌ, carima tapitaranquëmaꞌ. Ca nohuanton tëpararinëmasopita huëꞌsahuatonaꞌ, minsërahuatënënquëma tiquiarinënquëmaꞌ. Inapotohuachinënquëma nonëmasoꞌ, chanaro caꞌtëroꞌsaꞌ, niꞌniroꞌsaꞌ, inapitari caꞌsarin.

⁸ Inapotohuatënquëma iso ninanosoꞌ, tanahuantápon. Piyapiꞌsari niꞌpachina paꞌyanaponaꞌ. Yaꞌipi isëchin naꞌhuëpisopita ataꞌhuantomiatërinënquëmaso niꞌpachinaꞌ, paꞌyanaponaꞌ.

⁹ Ca nohuanto tananëmaquë, huiꞌnamantaꞌ capomaꞌ. Inimiconëma tancapitohuachinënquëmaꞌ, tana yatëparáponquëmaꞌ. Napoaton amiconëma nipirinhuëꞌ, tëpatoma capomaꞌ, tënin Sinioro,’ itëquëꞌ,” itërinco.

¹⁰ Nani ina shaꞌhuihuatan, yaꞌipi caꞌtaninënsopita niꞌtërantapaiquë, yonsha quëparansoꞌ paꞌquiquëꞌ.

¹¹ Inapotahuaton napotaantaquëꞌ: “Siniorosoꞌ yaꞌipi nanitapaton napotërinquëmaꞌ: ‘Ca nohuanto iso ninanoquë yaꞌhuëpisopita, paꞌquiatë pochin nitarahuë. Yonsha paꞌquihuatëra, co huachi noyatacasohuëꞌ niconin. Inapochachin iso ninanoquë yaꞌhuëpisopitanta nitarahuë. Napoaton chiminpisopitasoꞌ, Tohuitoquëáchin paꞌpitaponaꞌ. Co intohua aquëtë paꞌpitacaisohuë niꞌton, napoaponaꞌ.

¹² Inapotapo mini isëquë yaꞌhuëpisopita. Tohuitoquë chimipiroꞌsa paꞌpitatona amëntatopiso pochin iso ninanonta nitarahuë. Ca Sinioroco shaꞌhuitaranquëmaꞌ.

¹³ Quirosarinquë pëiroꞌsa yaꞌhuërinso aipi, yonarin pochin nininsoꞌ tayoraroꞌsa moshacaiso marëꞌ aꞌpëpi. Nisha nisha mamanshiroꞌsa marëntaꞌ, huino opopi. Copirnoroꞌsa huaꞌanëntopiso pëiroꞌsa aipinta inapopi niꞌton, amirotochináchin niꞌnahuë. Yaꞌipi inapita pëiroꞌsaꞌ, Tohuito amirotochináchin niꞌnahuëso pochachin niꞌsarahuë, tënin Sinioro,’ itaantaquëꞌ,” itërinco.

¹⁴ Napotohuachincora, ina inachachin ninahuë. Tohuitoquë Sinioro nanamën nani shaꞌhuihuatora huëantarahuë. Ina quëran Yosë chinotacaso pëi iꞌiratë huáncana huanirahuato, piyapiꞌsa shaꞌhuitaantarahuë:

¹⁵ “Sinioroso yaꞌipi nanitaparin. Inasoꞌ, israiroꞌsanpoa huaꞌanëntatonpoa naporin: ‘Canpitasoꞌ, pënënanquëmasopita co natëtochináchinhuëꞌ cancantëramaꞌ. Napoaton iso ninanoquë yaꞌhuëramasopita, anaꞌintaranquëmaꞌ. Aꞌnapita ninanoquë yaꞌhuëpisopitantaꞌ, anaꞌintarahuë. Yaꞌipi maquëranpitasona anaꞌintaꞌhuanquëmasoꞌ, nani shaꞌhuitëranquëmaꞌ. Shaꞌhuitëranquëmaso chachin nitaranquëmaꞌ,’ tënin Sinioro,” itërahuë.