Jeremías 18 - Chayahuita (Shahui)

Tëshitonaꞌpi naporin quëran pënëninsoꞌ

¹ Aꞌna tahuëri Sinioro nontatonco itaponco:

² “Tëshitonaꞌpi pëinënquë paꞌmaquëꞌ. Inaquë yonquirahuëso shaꞌhuitaranquën,” itërinco.

³ Napotohuachincora, paꞌmarahuato quënamarahuë. Inasoꞌ, tëshito toronanquë tëshitarin nimarahuë.

⁴ Yonsha nisapirinhuëꞌ nitapirin nipachina, ina noꞌpa quëran chachin aꞌna yaꞌhuërë niantarin. Nohuantërinso chachin acoaquë huarëꞌ tananpitërin.

⁵ Naporoꞌ Sinioro shaꞌhuitërinco:

⁶ “Israiroꞌsanquëmaꞌ. Caso chini chiníquën nanantërahuë. Tëshitonaꞌpi noꞌpa quëran nohuantërinsoꞌ ninin. ¡Inapochachin cantaꞌ, canpitaroꞌco nanitërahuë nohuantërahuëso nicaꞌhuasoꞌ! Canpitasoꞌ, tëshiroꞌpa pochin niconamaꞌ. Caso nipirinhuëꞌ, tëshitonaꞌpi pochin ninahuë.

⁷ Nacionoꞌsahuë nipon, copirnoroꞌsa huaꞌanëntopisohuë nipon, aꞌnanaya nanitërahuë huaꞌtahuatë tëꞌyatërëso pochin ataꞌhuantaꞌhuasoꞌ.

⁸ Napoaponahuëꞌ, inaquë yaꞌhuëpisopitaso oshanëna aꞌporahuatona noya yonquiantahuachinaꞌ, co huachi anaꞌintarahuëꞌ.

⁹ Ca nohuanton chachin aꞌna tahuërisoꞌ, nacionoꞌsahuë nipon, copirnoroꞌsa huaꞌanëntopisohuë nipon, noya noya acoaꞌhuaso yonquirahuë. Inapohuachina chini chiníquën nanantapi.

¹⁰ Inapitaso napoaponahuëꞌ, noya nipisoꞌ aꞌporahuatona pënënahuësopita co natëpihuëꞌ. Napopiso marëꞌ noya acoaꞌhuaso yonquirapiporahuëꞌ, co huachi ina pochin catahuapohuëꞌ,” itërinco.

¹¹ Naquëranchin Sinioro nontaantarinco: “Yaꞌipi Cota huënton israiroꞌsa shaꞌhuitëquëꞌ. Quirosarinquë yaꞌhuëpisopitanta shaꞌhuitëquëꞌ: ‘Ca Sinioroco anaꞌintaꞌhuanquëmaso yonquiarahuë. Napoaton co noyahuëꞌ ninamasopita aꞌporahuatomaꞌ, noya noya nicacamaso cancantocoꞌ,’ itëquëꞌ.

¹² Inapitaso napoaponahuëꞌ, napotapënën: ‘Napotápirancoihuëꞌ, co natëarainquënhuëꞌ. Quiyaora nohuantëraisoꞌ nisarai. Co natantochináchinhuëꞌ cancantatoi, co noyahuëꞌ yonquiraiso imapoi,’ itapënën,” itaantarinco.

¹³ Napopiso marëꞌ Sinioro tënin: “¿Inso nacionquë tëranta taꞌma ina pochin nonpiso natanama nicaya? Israiroꞌsasoꞌ, paꞌpi co noyahuëꞌ nipi.

¹⁴ Nipano motopi inápa natëtëroꞌsaquë ocai yaꞌhuërinsoꞌ, ¡co onporonta ayaponhuëꞌ! Inatohuaran tëꞌnaiꞌ iꞌsharoꞌsanta oꞌmarinsoꞌ, ¡co onporonta yaniponhuëꞌ!

¹⁵ Piyapinëhuëpitaso nipirinhuëꞌ, naniantërinaco. Nisha nisha mamanshiroꞌsa moshacaiso marëꞌ yonarin pochin nininsoꞌ aꞌpëpi. Iráca pënëntërahuësopita aꞌpopi niꞌton, chihuëatona nisha ira paꞌtopiso pochin nipi.

¹⁶ Napopiso marëꞌ, yaꞌhuëpiso noꞌpaꞌ tanahuantárin acoarahuë. Inapotërahuëso niꞌpachinaꞌ, piyapiꞌsa paꞌyanaponaꞌ. Yaꞌipi inataquëchin naꞌhuëpisopita, paꞌyanatona huësë huësë́taponaꞌ.

¹⁷ Piꞌi pipirinso parti quëran ihuan huëꞌninso pochin israiroꞌsa aꞌpararahuë. Inimiconënapitari canahuachina taꞌananpiponaꞌ. Anaꞌintaꞌhuaso tahuëri nanihuachin, co huachi catahuapohuëꞌ,” tënin.

Maꞌsha onpotiinacoso marëꞌ yonquipisoꞌ

¹⁸ Aꞌna tahuëri piyapiꞌsa chinotatonaco: “Huëco paꞌahua Irimiasë tëpacaiso marëꞌ shaꞌhuirapiaꞌhuaꞌ. Ama manta naporinso natëahuasohuëꞌ. Corto huaꞌanoꞌsa Yosë nanamën aꞌchintiinpoasoꞌ, co pahuanaponhuëꞌ. Yonquinahuanoꞌsanta pënënainpoasoꞌ, yaꞌhuëapon. Pënëntonaꞌpiroꞌsanta Yosë naporinsoꞌ anitotiinpoasoꞌ, yaꞌhuëapon,” topi.

¹⁹ Napopisoꞌ natantato, Yosë nontërahuë: “Sinioro nontëranquënsoꞌ natanaton, inimicotërinacosopita napotërinacosoꞌ natanquëꞌ.

²⁰ Noya nitohuachinacoira ¡co naponinquë iꞌhuërëtëraihuëꞌ! Inahuaso napoaponahuëꞌ, chimipi paꞌpitacaiso marëꞌ noꞌpaꞌ ihuapiso pochin yatëparinaco. Inapita anaꞌintacaso yonquihuatana, ama inapotacaso marëhuëꞌ, nontëranquën. Noꞌhuitëranso sanoaton noya niꞌcamarëꞌ, napotëranquën.

²¹ Iporaso napoaponahuëꞌ, huiꞌninapita chimiinaꞌ. Tana quëranhuë nipon, sahuëni quëranhuë nipon, chimiinaꞌ. Saꞌinanta quëyoronatona saꞌahuainaꞌ. Quëmapiꞌsanta chiníquën caniori tëpaꞌin. Huiꞌnapinënapitantaꞌ, ahuëtopiquë chimiinaꞌ.

²² Panca sontaroꞌsa huënton inapita ahuëcaiso marëꞌ aꞌnanaya aꞌpatiiquëꞌ. Paꞌyanatona noncaroinaꞌ. Maꞌsha maꞌcaimarëꞌ pison acopiso pochin, caso nonpinapitonaco maꞌsha yaonpotërinaco niꞌton, inapotëquëꞌ.

²³ Quëmaso napoaponahuëꞌ, yaꞌipi yonquirapirinacoso nitotëran. Tëpainacoso marëꞌ napopisontaꞌ, nitotëran. Co noyahuëꞌ nipi niꞌton, ama nichaꞌëquësohuëꞌ. Oshanënanta ama naniantëquësohuëꞌ. ¡Noya noꞌhuitahuaton, anaꞌintomiatëquëꞌ. Iꞌparëso pochin nicatona copichinaꞌ!” itërahuë.