Jeremías 15 - Chayahuita (Shahui)

Anaꞌintacaso shaꞌhuitërinsoꞌ

¹ Aꞌna tahuëri Sinioro nontatonco itaponco: “Israiroꞌsa nichaꞌëahuaso marëꞌ Moisësë, Samoiro, inapita nontopirinacohuë tërantaꞌ, co nosoroꞌitohuëꞌ. Shaꞌhuitëquë noꞌpanëhuë quëran pipiinaꞌ.

² ‘Intohuata nipachin paꞌi,’ itohuachinën, carinquën nanan quëtaranquën iso pochin shaꞌhuitëquëꞌ: ‘Canio quëran chiminacaiso nipisopita, ina quëran chiminacaiso yaꞌhuërin. Quira quëran chiminacaiso nipisopitantaꞌ, ina quëran chimiinaꞌ. Tana quëran chiminacaiso nipisopitasoꞌ, ina quëran chachin chimiinaꞌ. Aꞌna parti quëpacaiso nipisopitantaꞌ, aꞌna parti quëpaꞌinaꞌ.

³ Ca Sinioroco shaꞌhuitaranquëmaꞌ: Catapini nisha nisha quëran anaꞌintaranquëmaꞌ. Quira quëran chiminpatamaꞌ, niꞌniraroꞌsa pëꞌyapënquëmaꞌ. Chanaro caꞌtëroꞌsahuë nipon, tanan niꞌniroꞌsahuë nipon, pëꞌyapënquëmaꞌ.

⁴ Nisha nisha nacionoꞌsa yaꞌhuëpisoꞌ, canpita inapotaranquëmaso nitotatonaꞌ, huëhuëtaponaꞌ. Isiquiasë huiꞌnin Manasisi itopiso Quirosarinquë naporinso marëꞌ, inapo anaꞌintaranquëmaꞌ.

⁵ Quirosarinquë yaꞌhuëramasopita, ¡co huachi insonta nosoroinquëmaso yaꞌhuërinhuëꞌ! Inapotëranquëmaso marëꞌ ¡co insonta sëtëyainquëmaso yaꞌhuërinhuëꞌ! Onpoinsona nisaramasoꞌ, ¡co insonta yanitotaponhuëꞌ!

⁶ Canpitaso aꞌporahuatomaco, co huachi tahuërëtëramacohuëꞌ. Ca Sinioroco napotaranquëmaꞌ. Noya yonquiantamacoso marëꞌ ninarápiranquëmahuëꞌ, amirahuë. Napoaton anaꞌintatënquëma ataꞌhuantaranquëma huachi.

⁷ Pintiatohuatëra, naponinso ihuani quiquirin. Inapochachin canpitantaꞌ, yaꞌipi ninanonëma quëran ocoiaranquëmaꞌ. Yaꞌhuëramaso noꞌpaꞌ tanahuantárin acoarahuë. Co noyahuëꞌ ninamasoꞌ co yaaꞌporamahuë niꞌton, napotaranquëmaꞌ.

⁸ Paꞌpi notohuaroꞌ quëyoronoꞌsa anaꞌatarahuë. Marë yonsanquë inotë naꞌarinso pochin acoarahuë. Camotëchin nipirinhuëꞌ chimirin anoantarinquëmaꞌ. Sanapiꞌsa huaꞌhuinpitarë chachin tiquiarin. Aꞌnanaya maꞌsha onpohuachinaꞌ, paꞌpi paꞌyanatona co napion ancantaponaꞌ.

⁹ Canchisë huaꞌhuanpisopitantaꞌ, co huachi chiniapihuëꞌ. Huaꞌhuina tiquitopi niꞌton, paꞌyanënaquë tapinanpitëraponaꞌ. Inapoatona tapanaponaꞌ. Piꞌinta aꞌpiánpirinhuëꞌ, tashitërëso pochin cancantaponaꞌ. Aꞌnaquën chaꞌëpisopitantaꞌ, ca nohuanto inimiconënpitari tëpapon. Ca Sinioroco shaꞌhuitaranquëmaꞌ,’ tënin, itëquëꞌ,” itërinco.

Co napion ancantato Yosë nontaantarahuësoꞌ

¹⁰ Ina quëran caso paꞌpi sëtato, mamahuë yonquirahuë: “¡Maꞌhuántacha caso mama ninahuë paya! Quëma huaꞌhuanpirancohuëꞌ, naní quëran co natantonhuë pochin nohuitërinaco. Napoatona co quëꞌyarinacohuëꞌ. Co onporonta coriqui aꞌnanatonaco maꞌpachininacohuëꞌ. Co carintaꞌ, aꞌnapita coriqui aꞌnanchinahuëꞌ. Co inapopirahuëꞌ, yaꞌipiya quëran ama huachi noya yaꞌhuëcaꞌhuaso marëhuëꞌ, shaꞌhuitërinaco,” tënahuë.

¹¹ Ina quëran Yosë nontato: “Sinioro. Co noꞌtëquën natëhuatënquënsohuëꞌ, inapo shaꞌhuitërinacosoꞌ naniꞌin nipachin. Inimicotërinacosopita maꞌsha onpoatona parisitapirinahuëꞌ, coꞌsoꞌ inapita marëꞌ nontohuatënquëontaꞌ, naniꞌin,” itërahuë.

Israiroꞌsa anaꞌintacaso shaꞌhuitërinsoꞌ

¹² Ina quëran Sinioro taantapon: “¡Asiria, Papironia, inapita sontaroꞌsasoꞌ, co incari tëranta minsëcasoꞌ nanitaponhuëꞌ!

¹³ Israiroꞌsaꞌ, canpitaso naꞌcon oshahuanamaꞌ. Ina naꞌin quëran maꞌshanëma paꞌton nininsopita, inimiconëmapita quëtarahuë. Yaꞌipi noꞌpanëmaquë yaꞌhuërinsoꞌ, topinan quiquitaponëmaꞌ.

¹⁴ Ca nohuanto inimiconëmapita huaꞌanëntatënquëmaꞌ, co nohuitëramasohuëꞌ noꞌpaquë asacataponëmaꞌ. Anoꞌhuitëramaco niꞌton, pën huëchimitërinso pochin ataꞌhuantaranquëmaꞌ,” tënin.

Yosë nontaantarahuësoꞌ

¹⁵ Ina quëran Yosë nontato itapo: “Sinioro. Quëmasoꞌ yaꞌipi nitotëran. Yonquirahuatonco catahuancoso marëꞌ huëquëꞌ. Aparisitërinacosopita ama tënoroatonhuëꞌ, iꞌhuërëtëquëꞌ. Inapita tënoroápatansoꞌ, tëpaponaco. Quëma natëranquënso marëꞌ naꞌcon noꞌhuirinaco.

¹⁶ Quëma nontohuatancora, paꞌyátërahuë natanaꞌhuasoꞌ. Huaꞌanëntëranco niꞌton, quëma nanamën acapacancamiatërinco. Quëmaso Sinioro Yosënquën, yaꞌipi nanitaparan.

¹⁷ Aꞌnaquën capa cancantacaisoáchin yonquipi. Caso inapitarëꞌco co nipayacaꞌhuasoꞌ nohuantërahuëꞌ. Yaꞌcoancantëranco quëran huarëꞌ caoraíchin pochin paꞌnahuë. Piyapiꞌsa co noyahuëꞌ nipachinara, quëmariso noꞌhuiran. Inapochachin canta cancantërahuë.

¹⁸ ¿Onpoatoncha parisitërahuësoꞌ co copi tëcahuëꞌ nicaya? Apirahuëso pochin nininsoꞌ, ¿onpoatoncha co noyatëcahuëꞌ? Co maꞌsha nonën tëranta natërinsohuë pochin niconin. Yamoromiatohuachinara huaꞌyantorayaquë iꞌsha quënanpitërapi. Ina pochin quëmanta catahuancoso marëꞌ ninapiranquënhuëꞌ, co catahuarancohuëꞌ,” itërahuë.

Sinioro aꞌpanirincosoꞌ

¹⁹ Naporoꞌ Siniorosoꞌ, aꞌpaniantarinco: “Cachachin tahuërëtaantahuatanco, huaꞌanëntaantaranquën. Ama maꞌton maꞌton nonquësohuëꞌ. Noya nininsoráchin nonquëꞌ. Inapohuatan, pënëntamaso marëꞌ carinquën nanan quëtaranquën. Chinitërinënquënsopita ama natëquësohuëꞌ. Quëma tëhuënchinsoꞌ, natëinënquënso yaꞌhuërin.

²⁰ Ca nohuanton chiníquën huaniaran. Shaꞌpi huaꞌna quëran paira nipiso pochin nisaran. Ahuëapirinënquëontaꞌ, co nanitapihuë minsëinënquënsoꞌ. Carinquën inapita quëran paꞌpoyatënquën nichaꞌësaranquën. Ca Sinioroco napotaranquën.

²¹ Co noyahuëꞌ nipisopita maꞌsha yaonpotopirinënquënhuëꞌ, nichaꞌësaranquën. Chiníquën nanantopirinahuë tërantaꞌ, inapita quëran nichaꞌësaranquën,” itërinco.