Jeremías 14 - Chayahuita (Shahui)

Piꞌi imarinsoꞌ

¹ Piꞌisárinso marëꞌ Sinioro itaponco:

² “Cota huëntonquë yaꞌhuëpisopita sëtatona naꞌnërápi. Ninanonënaquë co napion ancantápi. Yaꞌipi piyapiꞌsa moꞌcárantapi. Quirosarinquënta parisitatonaꞌ, noncaropi.

³ Maꞌhuanoꞌsasoꞌ, piyapinënpita iꞌsha macai marëꞌ aꞌpapi. Inapitasoꞌ iꞌsha tapainanoꞌsaquë paꞌpirinahuëꞌ, co quënanpihuëꞌ. Yonshanënaquë co manta iꞌsha quëpihuëꞌ. Napohuachina co napion ancantatonaꞌ, motoꞌ sëꞌmopi.

⁴ Imin camayoroꞌsantaꞌ, co napion ancantopi. Oꞌnan pahuanin quëran noꞌpaꞌ huëncharo huëncharo toconin. Napoaton inapitanta motoꞌ sëꞌmopi.

⁵ Yo payaroꞌsanta tananquë nasha huaiaponaraihuëꞌ, huaꞌhuina patopi. Capa cosharonëna niꞌton, napopi.

⁶ Tanan moraroꞌsanta tomaroꞌtë panënoꞌsaquë huanitonaꞌ, asaniroꞌsa pochin ihuansaꞌ oꞌhuaconpi. Capa pasto niꞌton, tana tapinantopitërapi,” tënin.

Piyapiꞌsa marëꞌ Sinioro nontërahuësoꞌ

⁷ Sinioro tëhuënchachin quiyasoꞌ oshahuancoi niꞌton, co catahuancoiso inashitëraihuëꞌ. Napopiraihuëꞌ, noyanquën ninanso nitotacaiso marëꞌ catahuacoi. Nisha nisha cancantatoi naꞌaro tëhuëtërainquën. Inapoatoi naꞌcon oshahuanai.

⁸ Maꞌsha onporaiso tahuëriꞌsa nichaꞌërancoi niꞌton, quëmasáchin israiroꞌsacoisoꞌ ninarainquën. Naꞌhuëroꞌsa aꞌna tashiíchin huëꞌëpatërinso pochin ninan. ¡Ama ina pochin nicatonhuëꞌ, catahuacoi!

⁹ Catahuancoiso marëꞌ co manta ninanhuëꞌ niꞌton, quëmapi huaꞌyantërinso pochin yaꞌnoran. Ahuëtonaꞌpisoꞌ, noya paꞌpoyatërin. ¡Quëmaso nipirinhuëꞌ, co nanitërinsohuë pochin niconan! Quëmaso Sinioro napoaponahuëꞌ, yaꞌhuëraiso huáncana nisaran. Piyapinënpitacoi ninaisoꞌ, yaꞌipiya quëran nitotopi. Ama patocoisohuëꞌ, itërahuë.

¹⁰ Israiroꞌsa yonquiaton Sinioro tapon: “Canpitasoꞌ nisha nisha mamanshi mosharama niꞌton, co noyahuëꞌ niꞌnanquëmaꞌ. Napoaton oshanëma yonquiato anaꞌintaranquëmaꞌ,” tënin.

¹¹ Ina quëran Sinioro itaantarinco: “Ama isopita noya yaꞌhuëcaiso marëꞌ nontocosohuëꞌ.

¹² Onponta ayonapirinahuëꞌ, nontërinacoso co natanarahuëꞌ. Oshanëna marëꞌ onponta maꞌsha yaꞌipi ahuiquitopirinahuëꞌ, trico pochin nininsopitanta onponta quëshipirinacohuëꞌ, quëshirinacosopita co noya niꞌsarahuëꞌ. Nani yonquirahuë quira quëran, tanaro quëran, canio quëran, ina quëranpita ataꞌhuantaꞌhuasoꞌ,” itërinco.

¹³ Napotohuachincora, cari itapo: “Sinioro quëmaso napopiranhuëꞌ, aꞌnaquën pënëntonaꞌpiroꞌsari: ‘Isëquë chachin sano cancantápomaꞌ, co quira yaꞌhuëaponhuëꞌ, co tanaro yaꞌhuëaponhuëꞌ, Sinioro chachin inapochin yaꞌhuëcaso quëtarinpoaꞌ,’ itápi,” itërahuë.

¹⁴ Napotohuatora Sinioro taantarin: “Co cari aꞌpapirahuëꞌ, naporápi. Nonpinatona naporápi. Co piꞌpian tëranta ina pochin camairahuëꞌ. Co nonchatërarahuëꞌ. Inahuara yonquinëna quëran ina pochin shaꞌhuitárinëmaꞌ.

¹⁵ Nonpinatona pënëninënquëmasopitasoꞌ, ‘co quira yaꞌhuëaponhuëꞌ. Co tanaro yaꞌhuëaponhuëꞌ,’ toconpi. Napopirinahuëꞌ, inahuanta quira quëran, tanaro quëran, inaquëranpita chiminaponaꞌ.

¹⁶ Pënënpisopitanta ina quëran chachin chiminaponaꞌ. Saꞌinaꞌ, huiꞌninpita, inapitanta chiminaponaꞌ. Nonënanta Quirosarin cachiroꞌsaquë topinan tëꞌyataponaꞌ. Co incari paꞌpitacasoꞌ yaꞌhuëaponhuëꞌ. Inapotato co noyahuëꞌ nipiso marëꞌ, anaꞌintarahuë.

¹⁷ Isontaꞌ, piyapinëhuëpita shaꞌhuitacaso marëꞌ nanan quëtaranquën: ‘Piyapinëhuëpita nosororahuësoꞌ, panca maꞌsha onpopi. Paꞌpi huëhuëpiro maꞌsha onporëso pochin nipi. Ina marëꞌ tahuëri tashirë chachin, naꞌnërápahuaso yaꞌhuërin.

¹⁸ Ninano aipiran paꞌpatora, niahuëpiquë chimipiroꞌsa quëhuënantapi quënanahuë. Acoana yaꞌconpatorantaꞌ, piyapiꞌsa tanari tiquirarin niꞌnahuë. Pënëntonaꞌpiroꞌsaꞌ, corto huaꞌanoꞌsaꞌ, inapitanta intoasona quëparamarai,’ itëquëꞌ,” tënin.

Sinioro nontaantarahuësoꞌ

¹⁹ Sinioro, co pora Cota huënton israiroꞌsacoi aꞌpomiatërancoihuëꞌ. Co pora Quirosarinquë yaꞌhuëraisopita amimiatërancoihuëꞌ. ¿Onpoatonta nipachin co nimiriohuanhuë pochin nitërancoi? Noya yaꞌhuëcaꞌhuaiso ninapiraihuëꞌ, maꞌsha onpocaꞌhuaisoraꞌ, cantiirincoi. Sano yaꞌhuëcaꞌhuaiso ninapiraihuëꞌ, paꞌpi paꞌyansaꞌ, cantiirincoi.

²⁰ Tëhuënchachin Sinioro co noyahuëꞌ ninai. Shimashonëhuëipitantaꞌ, co noyahuëꞌ nipi. Inapoatoi oshahuanai.

²¹ Quëmaso noyanquën. Naporanso nitotacaiso marëꞌ, ama aꞌpocoisohuëꞌ. Huaꞌanëntëranso shiranën huënaráchin huënaráchin Quirosarin ninanoquë yaꞌhuërin. Ina yonquiaton iso ninanosoꞌ nosoroquëꞌ. Iráca quiyarëꞌquën anoyatëran. Ama ina naniantaton, nonpinatë pochin niquësohuëꞌ.

²² Inpioroꞌsasoꞌ, nisha nisha mamanshiroꞌsa moshapi. Co inapita nohuanton oꞌnaninhuëꞌ. ¡Co piꞌiroꞌtë tëranta nohuanton oꞌnaninhuëꞌ! Quëma Sinioro Yosënëhuëinquën niꞌton, oꞌnan aꞌpaimaran. Quëma nohuanton yaꞌipi inapita yaꞌhuërin. Napoaton quëmasáchin ninarainquën, itërahuë.