Jeremías 1 - Chayahuita (Shahui)

Caniaritaꞌhuaso marëꞌ aninshitërahuësoꞌ

^1-3 Caso Irimiasëco. Tatahuësoꞌ, Iriquiasë itopi. Tatahuë, shimashonëhuëpita, inapitaso Corto huaꞌanoꞌsaráchin. Anatoto ninanoquë yaꞌhuërai. Inaso ninanoꞌ, Mincamin huënton noꞌpanënquë yaꞌhuërin. Pënëntaꞌhuaso marëꞌ Sinioro anitotërincosopita iso quiricaquë aninshitërahuë. Amon huiꞌnin Cosiasë itopisoꞌ Cota huëntonquë shonca cara piꞌipi copirno nicasoꞌ, anitotërinco. Cosiasë huiꞌninpitanta copirno yaꞌconpachinara, anitotaantarinco. Coaquin itopisoꞌton yaꞌconin. Ina quëran Sitiquiasëntaꞌ, yaꞌcoantarin. Ina, shonca aꞌna piꞌipi, aꞌnatërápo yoqui huaꞌanëntasoꞌ, Quirosarinquë yaꞌhuëpisopita quiquipi huachi.

Pënëntaꞌhuaso marëꞌ Yosë acorincosoꞌ

⁴ Aꞌna tahuëri Sinioro nontatonco:

⁵ “Coꞌhuara nasichátërasënquënhuëꞌ, huayonanquën. Naporo chachin acoranquën pënëntacaso marëꞌ. Yaꞌipi nisha nisha piyapiꞌsa nipisopita pënënaran,” itërinco.

⁶ Napotohuachincora: “¡Maꞌhuantacha Sinioro yanitëranco paya! Caso huiꞌnapico niꞌto, co nito nonahuëꞌ,” itërahuë.

⁷ Siniorosoꞌ taantarin: “Ama, ‘caso huiꞌnapico,’ tëquësohuëꞌ. Ipora quëran huarëꞌ quëmasoꞌ, intohuaso aꞌparanquë paꞌsaran. Maꞌsona camairanquënsoꞌ, shaꞌhuiaran.

⁸ Ama insonta tëꞌhuatëquësohuëꞌ. Carinquën paꞌpoyaranquën. Caso Sinioroco niꞌto, noꞌtëquën shaꞌhuitaranquën,” itërinco.

⁹ Ina quëran imirin ihuësahuaton cariananinco. Inapotahuatonco nontaantarinco:

¹⁰ “Ca nohuanto nanamëhuë noꞌtëquën shaꞌhuiaran. Nisha nisha piyapiꞌsaꞌ, nisha nisha copirnoroꞌsari huaꞌanëntopisoꞌ, inapita pënënacaso marëꞌ nanan quëtaranquën. Pënënpatan co natëtohuachinahuëꞌ, pacatoro huaꞌtahuatë ataꞌhuantërëso pochin, noꞌpapi pëi ohuatahuatë ninomotërëso pochin anaꞌintarahuë. Noya natëhuachinaso nipirinhuëꞌ, sharoꞌsa shacatë pochin nitato, noya noya nicacaisoꞌ catahuararahuë,” itërinco.

¹¹ Naquëranchin Sinioro shaꞌhuitaantarinco: “¿Maꞌta niꞌnan?” itohuachincora: “Niꞌto sëꞌpa quëran huara nipisoꞌ niꞌnahuë,” itërahuë.

¹² “Noꞌtëquën niꞌnan. Nonahuësopita aꞌnaroáchin ananicaꞌhuaso marëꞌ carinta yonquirápo,” taantarin.

¹³ Naquëranchin Sinioro nataantarinco: “¿Maꞌta niantaran?” itaantarinco. “Huëꞌëtaquë inpitaponahuëꞌ, norti parti quëran tahuanahuaton yanoporin,” itërahuë.

¹⁴ Napotohuatora Sinioro taantapon: “Norti parti quëran mini oꞌmatona iso noꞌpaquë yaꞌhuëramasopita maꞌsha onpotaponënquëmaꞌ.

¹⁵ Ca Sinioroco noꞌtëquën shaꞌhuitaranquëmaꞌ. Norti parti copirnoroꞌsa huaꞌanëntopisoꞌ, piyapinënpitarë chachin oꞌmaponaꞌ. Canquimarahuatonaꞌ, Quirosarin yaꞌcoananëntaquë chachin huaꞌanëntacaiso shiranëna acoaponaꞌ. Yaꞌipi pairanënpita notënanquë, Cota huënton ninanoroꞌsa notënanquë, inaquëpita huaꞌanëntopiso shiranëna acoaponaꞌ.

¹⁶ Piyapinëhuëpitasoꞌ, oshahuanápatona aꞌporinaco. Nisharoꞌsari moshapiso nonanahuatonaꞌ, inapita moshacaiso marëꞌ yonarin pochin nininsoꞌ, aꞌpëpi. Napopiso marëꞌ inapo anaꞌintarahuë.

¹⁷ Quëmasoꞌ, chiníquën cancantaton paꞌsaran. Carinquën shaꞌhuitëranquënsoꞌ shaꞌhuicoanan. Ama manta inapita tëꞌhuatëquësohuëꞌ. Tëꞌhuatohuatan inapita niꞌtonënaquë aropátaranquën.

¹⁸ Ipora tahuëri carinquën acoranquën pairahuan ninano noyá niacorapipiso pochin nicacaso marëꞌ. Huaꞌnamia quëran onë nipiso pochin, shaꞌpi huaꞌna quëran paira nipiso pochin acoranquën. Inapoaton yaꞌipi Cota huëntonquë yaꞌhuëpisopita chinitaran. Copirnonënapita, huaꞌanënapita, corto huaꞌanoꞌsanënapita, inapitanta chinitaran.

¹⁹ Inapitaso ahuëapirinënhuëꞌ, co minsëarinënhuëꞌ. Carinquën caꞌtanatënquën aꞌpaiaranquën niꞌton, co minsëarinënhuëꞌ. Ca Sinioroco noꞌtëquën shaꞌhuitaranquën,” itërinco.