Isaías 9 - Chayahuita (Shahui)

¹ Napoaponahuëꞌ parisitopisopitasoꞌ, co inachachin parisitáponahuëꞌ,” itërahuë. Cariria parti yaꞌhuëpisopitaꞌton Yosëri anaꞌintërin. Inapotaton atapanin. Inaquë saporonoroꞌsaꞌ, nipitariroꞌsaꞌ, inapita yaꞌhuëpi. Inapitasoꞌ inpioroꞌsarë niyaꞌyoranpi. Inapita noꞌpanënasoꞌ, Cortaniiꞌ quëran piꞌi yaꞌconinso parti huaꞌanëntopi. Inataquëchin tëquën ira marëꞌpaꞌ paꞌninso yaꞌhuërin. Inapitaso Yosëri anaꞌintaton atapanpirinhuëꞌ, aꞌna tahuëri noya nicaton catahuaantapon.

Yosëri acorinso nasitaton, huaꞌanëntarinsoꞌ

^2-3 Inapitasoꞌ co noyahuëꞌ nicatonaꞌ, tashinanquë iratërëso pochin cancantopi. Inapopirinahuëꞌ, panca aꞌpintërëso pochin noya nicacaiso anitotaponaꞌ. Sinioro quëma chachin capa cancantaꞌhuaisoꞌ, quëshirancoi. Shaꞌnaiso mapatoira, capa cancantërai. Canatatona notohuaroꞌ maꞌsha nipatomatohuachinarantaꞌ, capa cancantopi. Inapochachin quiyantaꞌ, quëma niꞌtonënquë capa cancantomiatarai.

⁴ Piyapinënpita huaꞌanëntatona aparisitopirinahuëꞌ, quëmari nichaꞌëran. Inapotahuaton co huachi inimiconënpitari aparisitápaiso quëtëranhuëꞌ. Matianoꞌsa iráca ataꞌhuantëranso pochin inimiconënpita minsëran.

⁵ Inimicoroꞌsasoꞌ, sapatë poꞌmotona taꞌcaca taꞌcacacharapi. Aꞌmopisontaꞌ, huënaisáchin acopi. Inapopirinahuëꞌ, sapatëroꞌsaꞌ, aꞌmopisoꞌ, yaꞌipi inapita ahuiquitohuachinaꞌ, pëni caꞌsarin.

⁶ Canpoa marëꞌ aꞌnara quëmapiaꞌhua nasitërin. Huiꞌnanpoa Yosë quëtërinpoaso pochin aꞌnara yaꞌipiya marëꞌ quëtërinpoaꞌ. Ina mini huaꞌanëntacaso marëꞌ acorinsoꞌ. Nisha nisha quëran nohuitaponaꞌ: “Paꞌyapiro yonquirinsoꞌ.” “Co minsëchináchinhuëꞌ Yosë.” “Yaꞌhuëmiatonaꞌpi tata.” “Sano cancantonaꞌpi huaꞌan.” Ina pochinpita nohuitaponaꞌ.

⁷ Tapi copirno iráca huaꞌanëntërinso shiraquë huënsëaton huaꞌanëntapon. Chiníquën nanantaton, yaꞌipi parti camaitapon. Ina huaꞌanëntarin niꞌton, sano yaꞌhuëmiatapi. Co onporonta huaꞌanëntërinso nitiquiaponhuëꞌ. Noꞌtëquënáchin yonquiaton, noyasáchin nicapon. Ipora quëran huarëꞌ naporinsoꞌ, co onporonta nishataponhuëꞌ. Siniorosoꞌ yaꞌipi nanitaparin. Nosoromiatatonpoa napoarin.

^8-21 (-)