Isaías 8 - Chayahuita (Shahui)

Isaiasë huiꞌnin nininën quëran maꞌsona onpocaisoꞌ ninorinsoꞌ

¹ Aꞌna tahuëri Sinioro nontatonco itaponco: “Panca nontë maquëꞌ. Inaquë aꞌninquëchin ninshitapon: ‘Mairo-sararo-aspasoꞌ.’

² Yaninshitohuatan, Oriasë corto huaꞌan niꞌtonënquë ninshitëquëꞌ. Quiripiquiasë huiꞌnin Sacariasë itopisonta niꞌtonënquë ninshitëquëꞌ. Inapitasoꞌ, noꞌtëquën ninshitëransoꞌ shaꞌhuiponaꞌ,” itërinco.

^3-4 Ina piquëran miachin saꞌahuëso cayorahuaton, quëmapiaꞌhua yaꞌhuëtaantarin. Naporoꞌ Sinioro itaponco: “Huiꞌnan nohuitaton, Mairo-sararo-aspasoꞌ, itëquëꞌ. Coꞌhuara ina nonaton, ‘tata, mama,’ toshátërasohuëꞌ, Tamasco, Samaria, inapita ninanoroꞌsa minsëaponaꞌ. Asiria copirno piyapinënpitari napotaponaꞌ. Minsërahuatonaꞌ, huaꞌanëna quëpatontacaiso marëꞌ maꞌshanëna paꞌton nipisopita quiquitaponaꞌ,” itërinco.

⁵ Ina quëran nontaantarinco:

^6-8 “Cota huënton israiroꞌsasoꞌ, Nisin copirno, Nimariasë huiꞌnin, inapita tëꞌhuatopi. Inapita tëꞌhuatatonaꞌ, nocaninaco. Caso Siroiꞌ iꞌsha, sanoiꞌ paꞌninso pochin inapita catahuapirahuëꞌ, nocaninaco. Napopi niꞌquëhuarëꞌ, ca nohuanton Asiria copirno sontaronënpitarë chachin huëcapaipon. Inasoꞌ huëꞌpachin, Iopiratësiiꞌ paquiitërinso pochin yaꞌipi Cota huënton ninanoroꞌsa ahuëapon. Pancaiꞌ paquiitohuachina, conopirataquë huarëꞌ icaninso pochin nisarin. Asiria copirnosoꞌ, panca onian yanponaton, mapinën nocorinso pochin yaꞌipi iso noꞌpaquë yaꞌhuëpisopita ahuëapon. Napoaponahuëꞌ, ca Sinioroco canpitarëꞌco chachin nisarahuë,” itërinco.

⁹ Nisha nisha nacionquë yaꞌhuëramasopita nihuëntoncoꞌ. Inapopiramahuëꞌ, paꞌyan tëpaponquëmaꞌ. Aquë yaꞌhuëramasopita natanco shaꞌhuichinquëmaꞌ: Ahuëtamaso marëꞌ noyá niacocoꞌ. Noyá niacopiramahuëntaꞌ, paꞌpi paꞌyanaramaꞌ. Tëhuënchachin noyá niacopiramahuëntaꞌ, napoaramaꞌ.

¹⁰ Onpo ahuëtamaso yonquihuatamantaꞌ, topinan quëran yonquiaramaꞌ. Maꞌsona nicamasoꞌ nonpatamaꞌ, co napoarinhuëꞌ. Yosëso quiyarëꞌcoi chachin yaꞌhuëarin niꞌton, co inapoaramahuëꞌ.

Sinioro tëhuënchinsoꞌ tëꞌhuatacaso yaꞌhuërin

¹¹ Sinioro chiníquën nanantaton achinirinco. Inapotahuatonco ama aꞌnapita pochin cancantaꞌhuaso marëhuëꞌ, pënëninco:

¹² “Aꞌnapitasoꞌ, tëꞌhuarëꞌna yaꞌhuëpi. Aꞌna huaꞌan ahuëcaiso marëꞌ poꞌoana quëran yonquihuachinara, nanan nahuinin. Napopirinhuëꞌ, co nani napopiquë noꞌtëquën nininhuëꞌ. Napoaton aꞌnapitaso tëꞌhuatopirinahuëꞌ, co canpitaso tëꞌhuatamaso yaꞌhuërinhuëꞌ.

¹³ Caso Sinioroco yaꞌipi nanitaparahuë. Noyasáchin ninahuë. Ca tëhuënchinso tëꞌhuatamacoso yaꞌhuërin. Carimasoꞌ, yaꞌipinquëma niꞌsaranquëmaꞌ.

¹⁴ Israiroꞌsanquëmasoꞌ, cato huënton yaꞌhuëramaꞌ. Natëhuatamaco, carima catahuaranquëma noꞌtëquën chinotamacosoꞌ. Coꞌsoꞌ natëhuatamacohuëꞌ, pëcotan pochin nisarahuë. Iraquë naꞌpi iꞌpatochináchin yaꞌhuërinso pochin nisarahuë. Huënsonquë maꞌsha mapiso pochin, ritiquë sami mapiso pochin, Quirosarinquë yaꞌhuëpisopita anaꞌintarahuë.

¹⁵ Naꞌcon israiroꞌsa iꞌpatona anotopiso pochin nicaponaꞌ. Inapoatona chiminaponaꞌ. Pëcotanquë maꞌsha mapachinara co huachi pipirinsohuë pochin nisapi,” itërinco.

¹⁶ Ina quëran aꞌchintërahuësopita pënënato: “Ipora shaꞌhuitëranquëmasoꞌ, noya natëcoꞌ. Aꞌchintëranquëmasopita, anitotëranquëmasopita, inapitanta ama naniantocosohuëꞌ.

¹⁷ Cacopo quëran pipipisopita, Siniorori co huachi yacatahuarinhuëꞌ. Cariso napoaporahuëꞌ, inasáchin ninarahuë: ‘Catahuarinco mini,’ tënahuë.

¹⁸ Sinioro yaꞌipi nanitaparinsoꞌ, Sion motopiquë yaꞌhuërin. Huiꞌnahuëpita ina quëtërincosopitarëꞌco chachin israiroꞌsa ayonquicaꞌhuaiso marëꞌ acorincoi.

^19-20 Aꞌnaquënsoꞌ, shaꞌhuitëranquëmasopita co natëtatonahuëꞌ: ‘Chimipiroꞌsa apërahuaꞌyantatomaꞌ, natancoꞌ. Pënotonoꞌsanta sacaronquë nonpisopita natahuan. ¡Nisha nisha piyapiꞌsa yosënëna natanacaiso yaꞌhuërin! ¡Chimipiroꞌsa tëranta nanpiarëhuasopita maꞌsona onpocasoꞌ anitotiinpoaso marëꞌ natanacaiso yaꞌhuërin!’ itaponëmaꞌ. Inapitaso napopirinahuëꞌ, co piꞌpian tëranta noya yonquiatona naporapihuëꞌ. Co tahuërianpitërëso pochin nishátërapihuëꞌ.

²¹ Inapoatona piyapiroꞌsa patë patë́rantaponaꞌ. Aparisitaponaꞌ, tana anatanaponaꞌ, napotaponaꞌ. Tana natanápachinaꞌ, noꞌhuitaponaꞌ. Noꞌhuitatonaꞌ, copirnonënaꞌ, yosënënaꞌ, inapita ama huachi noya yaꞌhuëcaiso marëhuëꞌ, shaꞌhuitaponaꞌ. Inápaquë nëꞌpëtahuatonaꞌ, catahuacaiso yonisapi.

²² Isoroꞌpaquënta yonípirinahuëꞌ, co insoari tëranta catahuaponhuëꞌ. Napoaton parisitatonaꞌ, nosorotáponaꞌ. Tashinanquë co napion ancantërëso pochin cancantáponaꞌ. Tahuëripirinhuë tëranta tashirárinso pochin cancantáponaꞌ.