Isaías 7 - Chayahuita (Shahui)

Acasoꞌ copirno Isaiasëri yaꞌnan shaꞌhuitërinsoꞌ

¹ Osiasë copirno huiꞌninsoꞌ, Cotamo itopi. Ina huiꞌnintaꞌ, Acaso itopi. Ina yaꞌhuërë Cota huënton copirno nicasoꞌ, Siria copirnosoꞌ, Israiro copirnorëꞌ nicatahuatonaꞌ, Quirosarin ahuëcaiso marëꞌ huëcapaipi. Napoaponaraihuëꞌ, co nanitopihuë minsëcaisoꞌ. Siria copirnosoꞌ, Nisin itopi. Yaꞌhuërëꞌ Israiro copirnosoꞌ, Nimariasë huiꞌnin Pica itopi.

² Naporoꞌ Acasoꞌ copirno quëmopinënpitarë chachin shaꞌhuitacaiso marëꞌ paaparahuatonaꞌ: “Siriaroꞌsa israiroꞌsarë nicatahuatonaꞌ, huëcapaiarinënpoaꞌ,” itopi. Napohuachinara, piyapinënpitarë chachin paꞌyanpi. Paꞌyanatona nararoꞌsa ihuani paꞌtan paꞌtantërinso pochin ropatopi.

³ Naporoꞌ Siniorori Isaiasë itapon: —Huiꞌnan Siaro-iasopo itëranso masahuaton, Acasoꞌ copirno nacapiontaquëꞌ. Inasoꞌ, panënquë iꞌsha paꞌshintopisoꞌ yonsanquë quënaontaran. Ina iꞌsha paꞌshintopisosoꞌ, pëꞌsainaꞌpi camayo noꞌpaꞌ huaꞌanëntërinso ira paꞌninꞌpaꞌ, yaꞌhuërin.

^4-5 Quënaontarahuaton shaꞌhuitëquëꞌ: “Niyátainpichin yaꞌhuëquëꞌ. Napoaponahuëꞌ, ama paꞌyanquësohuëꞌ. Cato copirnoroꞌsa paꞌpi noꞌhuitënquën huëcapaiarinquënso yonquiaton, ama tëꞌhuatëquësohuëꞌ. Inahuasoꞌ, cato pënamocha yatacopirinso pochin tomontapi. Nisin siriaroꞌsarë chachin huëꞌsarin. Nimariasë huiꞌnionta israiroꞌsarë chachin huëcapaiarinënquën. Inapitasoꞌ nani anoyatopi nicatahuatonaꞌ, maꞌsha onpotiinënquënso marëꞌ. Inapoatonaꞌ:

⁶ ‘Cota huëntonoꞌsa yaꞌcontatëhuaꞌ, aꞌpayanhuaꞌ. Inapotatëhua noꞌpanëna matahuaꞌ. Naporahuatëhuaꞌ, Tapiiri huiꞌnin inahua copirnonëna nicacaso marëꞌ acoaꞌahuaꞌ,’ niitopi,” itëquëꞌ, itërin.

⁷ Napopirinahuëꞌ, Sinioroso taantarin: “Co onporonta inapoarinhuëꞌ.

^8-9 Siria copirno ninanonënsoꞌ, Tamasco itopi. Inaquë Nisin copirno huaꞌanëntërin. Israiro copirno ninanonëntaꞌ, Samaria itopi. Inaquë Nimariasë huiꞌnin huaꞌanëntërin. Napopirinhuëꞌ, saota shonca aꞌnatërápo piꞌipiya quëran israiroꞌsaso co huachi nacion nicaponahuëꞌ. Coꞌsoꞌ canpitantaꞌ, cancanëma quëran huarëꞌ natëhuatamacohuëꞌ, inapita pochachin nisaramaꞌ,” tënin Sinioro, itërin Isaiasëri.

Naquëranchin shaꞌhuitërinquë, Imanino huaꞌhuatacaso shaꞌhuitërinsoꞌ

¹⁰ Siniorori Isaiasë quëran naquëranchin Acasoꞌ nontaantarin:

¹¹ “Napotëranquënso chachin mini nisarin. Ina nitotacaso marëꞌ Yosë nontëquë maꞌsona aꞌnochinquën. Aco acoporoquë yaꞌhuërin quëranhuë nipon, ina inápaquë yaꞌhuërin quëranhuë nipon aꞌnochinquën,” tënin Sinioro, itërin Isaiasëri.

¹² Napotohuachina Acasosoꞌ tapon: “Inca, co nontarahuëꞌ. Co Sinioro tënicaso yaꞌhuërinhuëꞌ,” tënin.

¹³ Naporoꞌ Isaiasëso taantapon: “Tapi copirno shinpitanquëma huaꞌan yaꞌconamasoꞌ, noya natancoꞌ. Canpitaso piyapiꞌsa maꞌsha onpotatomaꞌ, apinamaꞌ. ‘Co ina nanirinhuëꞌ,’ tënëso pochin cancantatomaꞌ, ¿Yosë chachinta yaapinamaꞌ ti?

¹⁴ Sinioro chachin napoahuarëꞌ maꞌsona aꞌnotarinquëma nitotamaso marëꞌ: Niꞌquëꞌ. Ca nohuanton nanon cayoapon. Inapoaton quëmapiaꞌhuaya huaipon. Inasoꞌ huaꞌhuin nohuitaton, Imanino itapon.

¹⁵ Inasoꞌ huaꞌhuatapon, ohuaca shoꞌshoiꞌ atachirotopiso capon. Ninoiꞌ iroapon, napoapon.

¹⁶ Ina huaꞌhuasha coꞌhuara chinotoaꞌhua nishátërasohuëꞌ, ipora cato copirnoroꞌsa aꞌpayaninquënsopita noꞌpanënaꞌ, ataꞌhuantapona huachi.

¹⁷ Sinioro nohuanton quëmanta tahuëri cantiarinquën. Piyapinënpitanta cantiipon. Quëmá quëran pipipisopitanta cantiarin. Iráca shimashonëmapita israiroꞌsarë niaꞌpopiso pochachin paꞌpi parisitamasoꞌ cantiarinquëmaꞌ. Naporosoꞌ, Asiria copirno quëran napoaramaꞌ.

¹⁸ Ina tahuëriꞌsa nanihuachin, Sinioro nohuanton inimicoroꞌsa huëꞌsapi. Iquipito iroꞌsa quëran yon tomontërinso pochin huëcaponaꞌ. Asiria parti quëraonta ninora sanantërinso pochin huëcaponaꞌ.

¹⁹ Canquihuachina, motopi casonantëroꞌsaquë, yaꞌhuëintaponaꞌ. Natëtëanaroꞌsaquë, shihuarinoroꞌsaquë, ohuacaroꞌsa oꞌorinquë, inaquëpita yaꞌhuëintaponaꞌ.

²⁰ Ina tahuëriꞌsa nanihuachin, Asiria copirno quëran Sinioro anaꞌintarinquëmaꞌ. Inasoꞌ, sontaronënpitarë chachin quëpainëmaso marëꞌ ihuimotoarinëmaꞌ. Shinonëmaꞌ, shinoratënëmaꞌ, inapitanta ihuitaponënquëmaꞌ.

^21-22 Ina tahuëriꞌsa nanihuachin, inso tëranta aꞌnara ohuacaꞌ, cato ohuica, inaíchin pëꞌtahuaponahuëꞌ, notohuaroꞌ shoꞌshoiꞌ ocoiapon. Atachirotatonpita capon. Ninoiꞌ iroapon, napoapon. Inimicoroꞌsari quiquicaiso nipirinhuëꞌ chaꞌëpisopitasoꞌ, tëhuënchachin inapoaponaꞌ.

²³ Ina tahuëriꞌsa nanihuachin, iminoꞌsa pantatápon. Aꞌnaquën oparo huaranca yaꞌhuë yaꞌhuëtërinsoꞌ, huarancatë coriqui paꞌtopirinhuëꞌ, pantataton, shihuarino niantapon.

²⁴ Inaquë yayaꞌconpachinaꞌ, pëꞌchinan, shinërë, inapitarë chachin yaꞌcontatona maꞌsha inanaponaꞌ. Yaꞌipi noꞌpanëma nahuan nonitëraro niantapon.

²⁵ Panënoꞌsaquë sacatohuachinara, noyaroꞌpaꞌ niꞌton, topinan nanpaquë ohuërëpi. Inapopirinahuëꞌ, pantatatonaꞌ nahuan nonitëraro niꞌton, tëꞌhuatapona yaꞌcontacaisoꞌ. Tororoꞌsaꞌ, ohuicaroꞌsaꞌ, inapitaráchin yaꞌconatona coshataponaꞌ,” itërin.