Isaías 65 - Chayahuita (Shahui)

Siniorori aꞌpaniton napotërinsoꞌ

¹ Sinioro naporin: “Co manta cancantërinacosopitahuëꞌ, quënaninaco. Co yonípirinacohuëꞌ, quënaninaco. Co nontopirinacohuëꞌ: ‘Nontoco catahuainquëmaꞌ,’ itërahuë.

² Co natantochináchinhuëꞌ cancantopisopita catahuacaꞌhuaso marëꞌ, nani tahuëri imirahuë ihuëtatë pochin nitërahuë. Inahuara nohuantopisoꞌ nicatona pëshonpirinahuëꞌ, inapotërahuë.

³ Inapitasoꞌ, niꞌtonëhuëquë chachin co noyahuëꞌ nicatonaꞌ, anoꞌhuitërinaco. Mamanshiroꞌsa marëꞌ maꞌsha tëpatonaꞌ, yancororoꞌsaquë aꞌnopi. Natëricho quëran artaroroꞌsa nipiquë, yonarin pochin nininsoꞌ, aꞌpëpi.

⁴ Inapitasoꞌ poꞌororoꞌsaquë huënsëconpi. Co paꞌshantopiquëhuëꞌ tahuërianpitápi. Inapitasoꞌ, coshi nosha caꞌconpi. Nisha nisha maꞌsha amirotochináchin niꞌnahuësoꞌ, poꞌmotona caꞌpi.

⁵ Napoaponaraihuë nonpachinara: ‘Ama yaꞌcaricosohuëꞌ. Inaquëranchin huaniquëꞌ. Quëmá quëran noya noyaco niꞌton, co cariancoso yaꞌhuërinhuëꞌ,’ toconpi. Napoatonaꞌ, pën nani tahuëri orotárinso pochin nipi. Conai imëhuatëra, apininposo pochin nipi,” tënin.

^6-16 (-)

Noya noya Quirosarin nininsoꞌ

¹⁷ Ina quëran Sinioro taantarin: “Niꞌquëꞌ. Aꞌna tahuëri nasha piꞌiroꞌtë acoarahuë. Isoroꞌpantaꞌ, nasha acoarahuë. Ipora yaꞌhuërinsopitasoꞌ, co huachi insonta yonquiaponhuëꞌ.

¹⁸ Inapoarahuëso yonquiatomaꞌ, capa cancantomiatocoꞌ. Noya noya yaꞌhuëcaiso marëꞌ aꞌna Quirosarin acoarahuë. Ina yaꞌhuëhuachin, capa cancantatona inaquë yaꞌhuëaponaꞌ.

¹⁹ Ina ninano yonquiato capa cancantarahuë. Piyapinëhuëpitanta yonquiato, capa cancantarahuë. Inaquësoꞌ, co huachi onporonta naꞌnëponahuëꞌ. Co huachi napion ancantatonaꞌ, nontaponacohuëꞌ.

²⁰ Inaquëso huaꞌhuaroꞌsantaꞌ, co huachi ipora huaꞌhuatapona chiminaponahuëꞌ. Mashoyaroꞌsaꞌ, paiyaroꞌsaꞌ, inapitanta tahuërinëna naniquëhuarëꞌ, chiminaponaꞌ. Pasa piꞌipitasoꞌ chiminpachina, ‘huiꞌnapi nipirinhuëꞌ chiminin,’ taponaꞌ. Co pasa piꞌipichátërasohuëꞌ chiminpachinasoꞌ, ‘ama huachi noya yaꞌhuëꞌinsohuëꞌ, itopi niꞌton, chiminin,’ taponaꞌ.

²¹ Inaquë pëirahuatona yaꞌhuëaponaꞌ. Oparotatonaꞌ, nitërinsoꞌ caponaꞌ.

²² Iporaso pëipirinahuëꞌ, aꞌnapitasa yaꞌhuëconpi. Shaꞌtopirinahuëꞌ, aꞌnapitasa nitërinso caꞌpi. Naporosoꞌ, co huachi ina pochin nisapihuëꞌ. Piyapinëhuëpitasoꞌ, huaꞌqui tahuëri nicaponaꞌ. Nararoꞌsa pochin huaꞌqui nanpiponaꞌ. Huayonahuësopitasoꞌ, sacatonëna quëran maꞌsha quënanpachinaꞌ, co incari osërëtaponhuëꞌ.

²³ Co topinan quëran sacatapihuëꞌ. Huiꞌnahuanpachinarantaꞌ, co topinan quëran huiꞌnahuanaponahuëꞌ. Tahuërinën naniquë huarëꞌ chiminaponaꞌ. Siniorori noya yonquirapirinso shiina niꞌton, napoaponaꞌ. Inahuanta huiꞌnahuaantahuachinaꞌ, ina chachin niantaponaꞌ.

²⁴ Coꞌhuara përashátëraponacohuëꞌ, aꞌpaniarahuë. Nontërinacosonta co tiquiátërasoihuëꞌ, natanahuato aꞌpaniarahuë.

²⁵ Asaniroꞌsa carniroaꞌhuaroꞌsarëꞌ, napopináchin coshataponaꞌ. Paꞌpinintaꞌ, toro pochin pasto capon. Yaꞌhuaontaꞌ, amocan capaton nanpipon. Yaꞌipi huaꞌanëntërahuëquë noyasáchin nicaponaꞌ. Co insonta maꞌsha onpotaton tapitaponhuëꞌ,” tënin. Sinioro chachin naporin.