Isaías 64 - Chayahuita (Shahui)

¹ Maꞌcha Sinioro piꞌiroꞌtë osharëso pochin nitaton oꞌmaranhuë paya. Inaporan naporini, motopiroꞌsa anaconchitonhuëꞌ.

² Sarsa naraaꞌhuaroꞌsa pëni ahuiquitërinso pochin, iꞌshahuë nipon ainpiitërinso pochin nicaton, inimiconënpita anaꞌintëran naporini, nohuichitënënhuëꞌ. Nisha nisha nacionoꞌsaquë yaꞌhuëpisopitantaꞌ, quëma notënanquë ropachitonahuëꞌ.

³ Co manta yonquiasocoihuëꞌ, huëhuëpiro nininsoꞌ nipatana, paꞌyanai. Inápa quëran oꞌmahuatana, motopiroꞌsanta quëma notënanquë nacontopi.

⁴ Quëmasoꞌ, ninarinënquënsopita catahuacaso marëꞌ nani maꞌsha ninan. Ina pochin aꞌnanta nininsoꞌ, co onporonta natanchinpihuëꞌ. Co niꞌchinpihuëꞌ.

⁵ Noya cancantatona noya nipisopita, nohuantëransoráchin nipisopita, inapita quëmarisoꞌ noya niꞌnan. Iporaso nipirinhuëꞌ, oshahuanai niꞌton, noꞌhuirancoi. Nani huaꞌqui co quëma costaransohuëꞌ ninai.

⁶ Yaꞌipicoi quiyasoꞌ, amirotochináchin quëmapi pochin ninai. Yaꞌipi noya ninaisopitantaꞌ, amiro nëꞌmëtë pochin niconin. Naramë ahuiton shitatërinso pochin ninai. Paꞌpi co noyahuëꞌ ninaisoꞌ naꞌintërincoi niꞌton, ihuan maꞌsha quiquirinso pochin nitërincoi.

⁷ Co incoi tëranta chinotërainquënhuëꞌ. Quëmasáchin cancantaꞌhuaisoꞌ, co nohuantëraihuëꞌ. Napoaton naꞌpitatë pochin nitërancoi. Co noyahuëꞌ ninai niꞌton, aꞌporancoi.

⁸ Napopiraihuëꞌ, quëmaso Sinioro tatahuëi pochin ninan. Quiyaso tëshiroꞌpa pochin ninai. Quëmaso tëshitonaꞌpi pochin ninan. ¡Quëmasáchin yaꞌipicoi ninancoi!

⁹ Sinioro ama huachi aquëtë noꞌhuitëquësohuëꞌ. Paꞌpi co noyahuëꞌ ninaisoꞌ, ama yonquiráquësohuëꞌ. ¡Piyapinënpitacoi niꞌton, ama naniantocoisohuëꞌ!

¹⁰ Ninanonënpitasoꞌ noya noya nipirinahuëꞌ, iporasoꞌ tanahuantápi. Inimicoroꞌsari Quirosarin ninano ataꞌhuantatona tapipi.

¹¹ Chinotëranquënso pëiintaꞌ, noya noya niꞌton, inaquë shimashonëhuëipita chinotërinën. Inapopirinhuëꞌ, pën quëran ataꞌhuantopi. Naꞌcon naꞌcon paꞌyatëraisopita, tapitërinacoi.

¹² Inaporai niꞌton, ¡onpopionta catahuaantacoi! Coꞌsoꞌ inapoaton catahuaantahuatancoihuëꞌ, atapamiatarancoi huachi. Napoaton, ¡onpopionta catahuaantaponcoi! tënai.