Isaías 63 - Chayahuita (Shahui)

Yosëri inimiconënpita anaꞌintacaso yaꞌhuërinsoꞌ

¹ Aꞌnara huëꞌsarinso nicato: —Itomoroꞌsa copirnonëna yaꞌhuërinso ninanoꞌ, Posora itopi. Inatohuaran aꞌnara quëmapi huëꞌsarin. Quëhuanën quëran aꞌshitahuatë aꞌmorëso pochin huëꞌsarin. Chiníquën nanantonaꞌpi aꞌmorinso pochin aꞌmorin. Co macari tëranta chinitochináchinhuëꞌ, yaꞌnorin. ¿Incha inaso nicaya? tënahuë. Napoasoco chachin: —Ca huëꞌsarahuë. Canatërahuësoꞌ, shaꞌhuitaranquëmaꞌ. Chiníquën nanantato nichaꞌëcaꞌhuasoꞌ nanitaparahuësontaꞌ, shaꞌhuitaranquëmaꞌ, itërinco.

² —Opa toꞌpoihuatëra, aꞌmorëso quëhuanën quëran panshoatërinpoꞌ. ¿Onpoatonta aꞌmoranso ina pochin yaꞌnorin? itërahuë.

³ —Caoraíchin inimiconëhuëpita anaꞌintato opa toꞌpoirëso pochin ninahuë. Co insonta catahuarincohuëꞌ. Paꞌpi noꞌhuitato inimiconëhuëpita toꞌpi toꞌpitërëso pochin nitërahuë. Noꞌhuitonëhuëquë nipincatatë pochin nitato minsërahuë. Inapotërahuë niꞌton, huënainëna quëran panshoatërincosoꞌ, yaꞌipi aꞌmorahuëso sëꞌcotërin.

⁴ Inimiconëhuëpita iꞌhuërëtato, piyapinëhuëpita nichaꞌëcaꞌhuasoꞌ nani iráca chachin yonquirahuë. Ina tahuëri nanirin niꞌton, inapotërahuë.

⁵ Niꞌpirahuëꞌ, co insonta catahuaincoso yaꞌhuërinhuëꞌ. Co yaꞌhuërinhuë nicato, paꞌyanahuë. Paꞌyanpirahuëꞌ, caora ahuëtato canatërahuë. Paꞌpi noꞌhuitërahuë niꞌton, napotërahuë.

⁶ Paꞌpi noꞌhuitërahuë niꞌton, nacionoꞌsa nipincatatë pochin nitërahuë. Noꞌhuitomiatato, ataꞌhuantërahuë. Huënainëna noꞌpaquë paꞌnin. Oꞌnanpachina paꞌirinso pochin ninin, itaantarinco inantaꞌ.

Israiroꞌsa Yosëri nosoroarinsoꞌ

⁷ Onpopinsona Sinioro nosorotërinso yonquiato, shaꞌhuiarahuë. Maꞌpitaquësona catahuarinpoaso yonquiato, cantarahuë. Israiro huënton nosoromiatërinso marëꞌ napoarahuë. Paꞌpi nosoroaton catahuarinso marëꞌ inapoarahuë.

^8-9 Inapita yonquiaton Sinioro tënin: “Inapitasoꞌ piyapinëhuëpita. Co onporonta nonpintarinacohuëꞌ,” tënin. Napoaton maꞌsha onpotohuachinara, inaora chachin maꞌsha onpotapiso pochin ninatanin. Ina pochin cancantaton nichaꞌësarin. Co aꞌna aꞌpaton nichaꞌësarinhuëꞌ. Inaora chachin paꞌsahuaton nichaꞌësarin. Nosoromiataton inapotarin. Opatëahuatë iporëso pochin nitarin. Iráca quëran huarëꞌ napotërinsoꞌ, inachachin nisárin.

¹⁰ Israiroꞌsaso napoaponahuëꞌ, co Sinioro yanatëpihuëꞌ. Inasoꞌ noyasáchin nipirinhuëꞌ, noꞌhuipi. Napotopiso marëꞌ inimiconënpita pochin nicaton, ahuërin.

¹¹ Napotohuachina inapitasoꞌ, iráca Yosëri shimashonënpita catahuarinsoꞌ yonquipi: “Yosëri iráca Moisësë huayonaton, Niroiꞌ quëran nichaꞌërin. Inapotahuaton nohuantërinsoꞌ nicacaso marëꞌ ispiritonën ayaꞌcoancantërin. Inapotohuachina, inaso huaꞌanënpoa pochin nicaton Iquipito quëran ocoirinpoaꞌ. Iporaso napoaponahuëꞌ, ¿Intohuata pacaton co huachi yacatahuarinpoahuëꞌ?

^12-14 Yosëso chini chiníquën nanantaton Moisësë catahuarin. Marëquë nipachina patomairahuaton ira pochin acorin. Napohuachina, co toꞌcoitatonaraihuë noya pëntonpi. Cahuarioroꞌsa inotëro taꞌatohuachina co toꞌcoitopisohuë pochin nipi. Pëꞌtahuaroꞌsanta panën quëran noyaroꞌtëquë chinotacaso marëꞌ paꞌmapiso pochin nipi. Inapoaton chini chiníquën nanantërinsoꞌ, nahuimiatërin huachi. Iporaso napoaponahuëꞌ, ¿Intohuata pacaton co huachi yacatahuarinpoahuëꞌ?” topi Sinioro ispiritonën ira aꞌnotatë pochin nitatonpoaꞌ, piyapinënpitanpoa quëninpoaꞌ. Inapoaton noya noya nininsoꞌ nahuimiatërin.

Israiroꞌsa Yosë nontopisoꞌ

¹⁵ Sinioro quëmasoꞌ, inápaquë yaꞌhuëran. Noya noya nininquë, huënaratërinquë, inaquë yaꞌhuëran. Quëmasoꞌ paꞌpi nosororancoi. Naporahuaton chiníquën nanantëran. Inaporan nichinapon chachin ¿co poꞌsápaꞌhuaisoꞌ nohuanchitonhuë pora? ¡Nosoroatoncoi catahuaantacoi!

¹⁶ ¡Quëmasoꞌ, tatahuëi pochin ninan! Apraanso co aꞌna nohuitomarincoihuëꞌ. Cacoponta co aꞌna yonquimarincoihuëꞌ. Quëmaso Sinioro tatahuëi pochin ninan. Iráca quëran huarëꞌ nichaꞌërancoi.

¹⁷ ¡Ama pëshonatë pochin nicaꞌhuaiso marëhuëꞌ, catahuacoi! Naporahuatoi tëꞌhuatatë pochin nichinquën. Quiyasoꞌ piyapinënpitacoi, huëntonënpitacoi. Nosororancoi nipachinsoꞌ, ¡ama topinan niꞌsácoisohuëꞌ!

¹⁸ Noya nicatoncoi noꞌpaꞌ quëtopirancoihuëꞌ. ¡Co huaꞌquiyátërahuëꞌ huaꞌanëntërai! Inimiconëhuëipitari huëꞌsahuatonaꞌ, quëma pëinën ataꞌhuantopi.

¹⁹ Inapotërinacoi niꞌton, co onporonta huaꞌanëntërancoisohuë pochin nisarai. Co piyapinënpita ninaisohuë pochin nisarai.