Isaías 61 - Chayahuita (Shahui)

Sinioro piyapinëni israiroꞌsa nichaꞌësarinsoꞌ

¹ Sinioro piyapinën naporin: “Sinioro ispiritonën yaꞌcoancantërinco niꞌton, noya catahuarinco. Ina chachin acorinco popriyaroꞌsa noya nanan shaꞌhuitaꞌhuaso marëꞌ. Aparisitopisopita catahuacaꞌhuaso marëꞌ acorinco. Yaꞌhuëpi quëran quëparahuatona huaꞌanëntapirinahuëꞌ, yaꞌhuëpiquë chachin paantacaiso shaꞌhuitarahuë. Tashinan pëiquë pochin yaꞌhuëapisopitantaꞌ, ina quëran pipicaisoꞌ shaꞌhuitarahuë.

² Ipora tahuëriꞌsa Yosë nosoroatënquëma nichaꞌësarinquëmasoꞌ, shaꞌhuitaranquëmaꞌ. Inimiconëmapitantaꞌ, Yosëri iꞌhuërëtacasoꞌ shaꞌhuitaranquëmaꞌ. Yaꞌipi sëtopisopita achinicancanaꞌhuaso marëꞌ aꞌparinco.

³ Quirosarinquë yaꞌhuëpisopita canapi niꞌton sëtápirinahuëꞌ, inahua yaꞌhuërëꞌ canatohuachinaꞌ, yancotë yancopiso pochin acoarahuë. Naꞌnërápirinahuëꞌ, noya acancantaantarahuë. Co napion ancantápirinahuëꞌ, catahuarahuë niꞌton, Sinioro chinotatona cantaponaꞌ. Nisha nisha piyapiꞌsari: ‘Ma noyacha Siniorosoꞌ nanitapaton, piyapinënpita shacatë pochin nitërin. Noyanpinanyanchin nopri nararoꞌsa pochin acorin,’ taꞌcaiso marëꞌ ina pochin catahuapo.

⁴ Ninanoroꞌsa iráca ohuatopisoꞌ anoyataantaponaꞌ. Pëiroꞌsanta iráca ataꞌhuantopirinahuëꞌ, acoantaponaꞌ. Ninanoroꞌsa tapipisopitantaꞌ, anoyataantaponaꞌ.

⁵ Pëꞌtahua huëntonëmapita, iminëmapita, oparonëmapita, inapita nisharoꞌsari aꞌpaiapon.

⁶ Inapitasoꞌ nohuitatënquëmaꞌ: ‘Sinioro marëꞌ sacatopisopita corto huaꞌanoꞌsaꞌ,’ itaponëmaꞌ. Nisha nisha nacionoꞌsa quëran noya noya cosharo quëpisoꞌ capomaꞌ. Inapita noya noya nitapapisopitaquë, canpitanta nitapapomaꞌ.

⁷ Canpitasoꞌ inimiconëmapita naꞌcon naꞌcon noꞌhuitënëmaꞌ, taparo nitërinëmaꞌ. Paninanoꞌsa naꞌcon naꞌcon maꞌsha quëtopiso pochin nitërënëmaꞌ. Napoaton yaꞌhuëramaso noꞌpaquë chachin naꞌcon naꞌcon capa cancantomiatapomaꞌ. Paninanoꞌsa naꞌcon naꞌcon paꞌton nininsopita quëtopiso pochin nitaponëmaꞌ,” tënin.

⁸ Ina quëran Sinioro taantarin: “Noꞌtëquënáchin nipisopita nosororahuë. Ihuatopisoꞌ, aꞌnaratipita nicatona tëpatopisoꞌ, inapitaso co quëꞌyarahuëꞌ. Ina pochinco niꞌto piyapinëhuëpitasoꞌ, noꞌtëquënáchin acanapo. Inapitarëꞌco anoyatohuato, anoyatërahuëso yaꞌhuëmiatapon.

⁹ Inahua quëran pipipisopitasoꞌ, nisha nisha nacionquë nahuinaponaꞌ. Yaꞌipi niꞌpisopitari: ‘Tëhuënchachin isopitasoꞌ Siniorori catahuarin,’ taponaꞌ,” tënin.

¹⁰ ¡Sinioro yonquiato, capa cancantërahuë! Inasoꞌ Yosënëhuë niꞌton, acapacancaninco. Nichaꞌërinco niꞌton, naporahuë. Noꞌtëquën yonquinaꞌpi pochin acorinco. Saꞌanaꞌpi yancotë ayancotopiso pochin ninahuë. Nanonta soꞌyacaso marëꞌ nisha nishaquë nitaparinso pochin ninahuë.

¹¹ Sharoꞌsa noꞌpaquë pichopitërin. Yanco namënën iꞌtorohuatëra, papoyantërin. Inapochachin Sinioronta noꞌtëquënáchin nininsoꞌ aꞌnoarin. Ina marëꞌ yaꞌipi nacionoꞌsaquë: “¡Ma noyacha Sinioroso paya!” taꞌtonaꞌ, cantaponaꞌ.