Isaías 60 - Chayahuita (Shahui)

Nasha Quirosarinquë noya noya yaꞌhuëcaiso yaꞌhuëarinsoꞌ

¹ Cota huëntonquë, Quirosarinquë, inaquëpita yaꞌhuëramasoꞌ, noya natancoꞌ: Sinioro noya noya nininsoꞌ, canpitarë nisarin. Inasoꞌ, huënaráchin huënaráchin aꞌpinarin. Napoaton canpitantaꞌ, aꞌpininso ahuënaratarinquëmaꞌ.

² Niꞌquëꞌ. Isoroꞌpasoꞌ, tashiri iꞌcopitapon. Yaráton chitorori nisha nisha piyapiꞌsa imotapon. Canpitataquëso niꞌpirinhuëꞌ, Sinioro aꞌpininso huënaratarin. Inasoꞌ, canpitataquë noya noya yaꞌnoarin.

³ Noyasáchin nicatomaꞌ, tahuëri pochin nisaramaꞌ. Napoaton nisha nisha piyapiꞌsa huëcapayaponëmaꞌ. Tahuërianpitërëso pochin cancantëramaso marëꞌ, nisha nisha copirnoroꞌsa huëcapaiarinëmaꞌ.

⁴ Yaꞌipi tahuitërinquëmasoꞌ, noya niꞌcoꞌ. Niyontonahuatona huëcapaiarinëmaꞌ. Huiꞌnamapita áquë quëran huëcapayaponëmaꞌ. Sanapiꞌsa nipisopitanta noya aꞌpaiatonaꞌ, quësapi. Iporahuatona quësapi.

⁵ Inapita nicaton, capa cancantomiataran. Marë soꞌtonoꞌsaquë yaꞌhuëpisopita, maꞌsha naꞌcon naꞌcon paꞌtërinsoꞌ quëshiarinëmaꞌ. Nisha nisha piyapiꞌsa maꞌhuanatona huaꞌanëntopisoꞌ, quëtáponëmaꞌ.

⁶ Yaꞌipi noꞌpanëma nanirinquë chachin camiyo huëntonoꞌsa pëꞌpëtohuanáchin huëꞌsapiso niꞌsaramaꞌ. Matian parti quëran, Ipa parti quëran, ina quëranpita huëꞌsapi. Yaꞌipi camiyoroꞌsa Sapa parti yaꞌhuëpisontaꞌ, oro quësapi. Yonarin pochin nininsonta quësapi. “Sinioro maꞌsona nipachina, noya noya ninin,” taꞌcaiso marëꞌ napoapi.

⁷ Quitaroquë yaꞌhuëpisopita, pëꞌtahua huëntonoꞌsa quëshiarinënquëmaꞌ. Nipayoquë yaꞌhuëpisopitantaꞌ, carniro huëntonoꞌsa quëshiarinënquëmaꞌ. Yaꞌipi inapita pëꞌtahua huëntonoꞌsa Sinioro artaronënquë ina marëꞌ aꞌnotaramaꞌ. Inapohuatamaꞌ, inaso noya noya niꞌsarinquëmaꞌ. Inapita quëran Siniorosoꞌ, noyápiachin pëinën, noya noya acoapon.

⁸ ¡Niꞌcochi pasopita! ¡Chitoro pochin co osharapihuëꞌ huëcaponaꞌ! Nëpëroꞌsa huaꞌhuatopiquë huëꞌsapiso pochin niriapi. ¿Maꞌpitacha huëcatona naporiacai?

⁹ Panca nancharoꞌsa napopináchin huëcatona naporiapi. Tarsis ninanoquë nipisopita quëchitëriapi. Aquë quëran Quirosarin yaꞌhuëhuanoꞌsa quësapi. Oronënaꞌ, pratanënaꞌ, inapitarë chachin huëꞌsapi. Sinioro noya nicatona quëtacaiso marëꞌ napoapi. Inasoꞌ Yosë noyasáchin ninin. Napoaton Israirori chinotërin Ina mini noya noya acoarinquëma huachi.

¹⁰ Nisharoꞌsari Quirosarin pairanën anoyataantaponaꞌ. Copirnonënapitantaꞌ, canpita marëꞌ sacataponaꞌ. Sinioro noꞌhuitënquëma anaꞌintopirinquëmahuëꞌ, naporoso paꞌpi nosoroarinquëma huachi.

¹¹ Ninanonëma yaꞌcoananënpitantaꞌ, iꞌsoatopiquëranchin nisáponaꞌ. Tahuërintaꞌ, tashintaꞌ, co oncotaponahuëꞌ. Nisha nisha nacionoꞌsaquë yaꞌhuëpisopita maꞌsharoꞌsa naꞌcon naꞌcon paꞌtërinsoꞌ, quëshiinëmaso marëꞌ napoapon. Copirnoroꞌsaꞌ, catahuarinsopita huaꞌanoꞌsaꞌ, inapita yaꞌconacaiso marëꞌ napoapon.

¹² Inso nacionquë tëranta yaꞌhuëpisopita co canpita marëꞌ yasacatohuachinahuëꞌ, taꞌhuantomiataponaꞌ.

¹³ Quirosarinquë yaꞌhuëramasopita Sinioro napotërinquëmaꞌ: “Nipano noꞌpa quëran paꞌton nininsopita quëshiarinëmaꞌ. Pino, apito, siprisë, inapita nararoꞌsa quësapi. Chinotërinacoso pëiꞌ, noya noya tapacaiso marëꞌ quësapi. Huaꞌanëntërahuëso pëiꞌ, noya noya acocaiso marëꞌ napoaponaꞌ.

¹⁴ Aparisitërinëmaso shinpita huëcapairahuatënëmaꞌ, nosorochináchin nontaponëmaꞌ. Yaꞌipi nocaninëmasopitantaꞌ, isonahuatona moshaponëmaꞌ. Quirosarintaꞌ, ‘Sinioro ninanonën,’ itaponaꞌ. Siniorosoꞌ noyasáchin ninin niꞌton, israiroꞌsari inaquë chinotopi.

¹⁵ Ina tahuëri nanihuachin, co huachi pataranquëmahuëꞌ. Co huachi noꞌhuiaranquëmahuëꞌ. Co huachi canpitaora quëparitaramahuëꞌ. Carima noya noya acoaranquëmaꞌ. Co huachi onporonta nishataramahuëꞌ. Napoatoma capa cancantomiatarama huachi.

¹⁶ Noya noya cosharonënaꞌ, nacionoꞌsa quëshiponëmaꞌ. Copirnonënantaꞌ, paꞌton nininsopita maꞌshanëna quëshiponëmaꞌ. Ca Sinioroco niꞌton, nichaꞌëranquëmasoꞌ nitotaponaꞌ. Chiníquën nanantërahuëso marëꞌ iráca Cacopontaꞌ, chinotërinco. Inapochinco niꞌton, nichaꞌëranquëmasoꞌ nitotapi.

¹⁷ Shaꞌpi huaꞌna yaꞌhuërënamën, oro quëtaranquëmaꞌ. Huaꞌnamia yaꞌhuërënamën, prata quëtaranquëmaꞌ. Nontë yaꞌhuërënamën, shaꞌpi huaꞌna quëtaranquëmaꞌ. Naꞌpi yaꞌhuërënamëntaꞌ, huaꞌnamia quëtaranquëmaꞌ. Huaꞌanëntërinquëmasonta noya huaꞌanëntarinquëma niꞌton, sano cancantaramaꞌ. Aꞌnapitanta noꞌtëquënáchin yonquirapitomaꞌ, noya niꞌsaramaꞌ.

¹⁸ Nisha nisha maꞌsha nionpotopisoꞌ, co huachi yaꞌhuëramaquë natantaramahuëꞌ. Noꞌhuitatona ataꞌhuantopisoꞌ, tapitopisoꞌ, inapitanta co huachi natantaramahuëꞌ. Ninanonëma pairanënpitaquë: ‘Yosë nichaꞌërinpoaꞌ,’ taꞌcasoꞌ ninshitaramaꞌ. Yaꞌcoananënpitaquëntaꞌ, ‘Sinioro chinotahuaꞌ,’ taꞌcasoꞌ ninshitaramaꞌ.

¹⁹ Co huachi piꞌi aꞌpintiimasoꞌ, nohuantapomahuëꞌ. Co yoqui tërantaꞌ, aꞌpintiimaso nohuantapomahuëꞌ. Ca Sinioroco chachin aꞌpintomiatáponquëmaꞌ. Yosënëmaco niꞌton, noya noya acoaranquëmaꞌ.

²⁰ Piꞌisoꞌ, co huachi yaꞌconaponhuëꞌ. Yoquinta co huachi ayamaponhuëꞌ. Caso Sinioroco aꞌpintomiataranquëmaꞌ. Inapotatënquëmaꞌ, sëtëramasoꞌ inquitaranquëmaꞌ.

²¹ Yaꞌipi inaquë yaꞌhuëramasopita, noya nicatënëmaꞌ, natëponëmaꞌ. Noꞌpanëma huaꞌanëntomiataramaꞌ. Shanëhuë, papoyantërinso pochin nisaramaꞌ. Chini chiníquën nanantërahuësoꞌ aꞌnocaꞌhuaso marëꞌ carima noya noya acoaranquëmaꞌ.

²² Iporasoꞌ carayanquëma nipomarahuëꞌ, naꞌamiataramaꞌ. Carayanquëma nipomarahuëꞌ, panca nacion taranapomaꞌ. Caso Sinioroco. Ca nohuanton co huaꞌquiya quëranhuëꞌ naporahuësoꞌ nanipon. Tahuëri acorahuësoꞌ nanihuachin nanipon,” itërinquëmaꞌ.