Isaías 6 - Chayahuita (Shahui)

Isaiasë pënëntacaso marëꞌ acorinsoꞌ

¹ Osiasë copirno chimininso piꞌiquë, huaꞌnarëso pochin Sinioro niꞌnahuë. Huaꞌanëntacaso shiranën paꞌpi inápaquë acorahuaton, huënsëarin niꞌnahuë. Aꞌmorinsontaꞌ, chinotacaso pëi yaꞌipi mëntatërin.

² Nisha anquëniroꞌsa pën pochin yaꞌnopisontaꞌ, Sinioro huënsërinso aipi yanpoápopi. Aꞌnaya aꞌnaya saota saota anpiantëhuanpi: Cato anpiantëna quëran, yaꞌpirina nipaꞌcopirayatopi. Cato quërantaꞌ, taparonëna parti quëran, nonëna paꞌcopitopi. Cato quëransoꞌ yanponpi.

³ Naporahuatona inahua capini nonatona naporápi: “Siniorosoꞌ noyasáchin nicaton, noya noya ninin. Yaꞌipi nanitaparin. Yaꞌipi isoroꞌpaquë maꞌsha acorinsopita, Yosë chini chiníquën nanantërinsoꞌ anitotërinpoaꞌ,” tosápi.

⁴ Napopisoꞌ yaꞌcan topachina, Yosë chinotacaso pëi yaꞌcoananënpita nacon nacontapi. Naporahuaton yaꞌipiana chachin conairi mëntatërin.

⁵ Ina yonquiato: “¡Maꞌhuantacha caso nicato chiminarahuë paya! ¡Caso co noyahuëꞌ cancantato naponi nonahuë! ¡Aꞌnapitanta ca pochachin cancantopi nipirinhuëꞌ, inapitarëꞌco yaꞌhuërahuë! ¡Napoaporahuëꞌ, Sinioro yaꞌipi nanitapaton yaꞌipi huaꞌanëntërinso quënanahuë!” tënahuë.

⁶ Naporo chachin pën pochin yaꞌnorinso anquëni, huëcapairinco. Artaro aipi pënaya yaꞌhuërinso naquëtinanquë aquëtahuaton, quëshiantërinco.

⁷ Ina pënayaquë carianantonco: “Niꞌquëꞌ. Nani pënayaquë carianananquën. Napoaton co noyahuëꞌ ninansoꞌ Yosë inquitërinquën. Co noyahuëꞌ ninansopita naꞌintopirinquënhuëꞌ, inquitërinquën,” itërinco.

⁸ Naporoꞌ Sinioro noninsoꞌ natanahuë: “¿Inta iporaso aꞌpaꞌi? ¿Incha yaꞌhuërënamënpoa nanan shaꞌhuicaso marëꞌ paꞌnëꞌpoya?” tënin. “Maꞌta Sinioro ca yaꞌhuëarahuë. Ca nipachin aꞌpaco,” itërahuë.

⁹ Napotohuatora: “Paaton nipachin piyapinëhuëpita shaꞌhuitëquëꞌ: ‘Onponta nanamëhuë natanpiramahuëꞌ, co natëtaramahuëꞌ. Maꞌpitaso ninahuëso niꞌsápomarahuë tërantaꞌ, co yonquiaramahuëꞌ,’ tënin Sinioro, itonquëꞌ.

¹⁰ Piyapinëhuëpita yonquinëna tapitëquëꞌ. Nëꞌhuëya pochin cancanchinaꞌ. Somarayapiso pochin cancantatonaꞌ, ama manta noꞌtëquën yonquiꞌinasohuëꞌ. Shaꞌhuitërahuësoꞌ noꞌtëquën yonquipi naporini, oshanëna aꞌpoitonahuëꞌ. Inapopi naporini, co huachi anaꞌintaꞌhuasoꞌ yaꞌhuëitonhuëꞌ,” itërinco.

¹¹ Napotohuachincora, natanahuë: “¿Onporo huaꞌquita Sinioro ina pochin cancantaponaꞌ?” itohuatora: “Ninanoroꞌsa ataꞌhuantohuachinaꞌ, tanahuantápai huarëꞌ napoapi. Pëiroꞌsaꞌ, iminoꞌsaꞌ, inaquëpitanta sacorápona huachi.

¹² Naporoꞌ ca Sinioroco nohuanton piyapinëhuëpita inimicoroꞌsari quiquiaponaꞌ. Inapotohuachinaꞌ, yaꞌhuëpiso noꞌpaꞌ tanahuantápon.

¹³ Pasayaꞌpi quëran shonca tëranta quëparitohuachina, inapitanta taꞌhuantaponaꞌ. Napoaponahuëꞌ, aꞌnaquën nara aꞌnëhuatëra papotaantarinso pochin, Sinioro marëꞌ nipisopitasoꞌ, yaꞌhuëantaponaꞌ,” itërinco.