Isaías 55 - Chayahuita (Shahui)

Noya catahuainpoaso Sinioro shaꞌhuirinsoꞌ

¹ Sinioro tënin: “Yamororëso pochin cancantohuatamaꞌ, huëco anoyacancanchinquëmaꞌ. Co coriqui yaꞌhuëtopirinquëmahuëꞌ, catahuararanquëmaꞌ. Nontohuatamaco cosharo achinitërinso pochachin achincancanaranquëmaꞌ. Huino, ohuaca shoꞌshoiꞌ, inapita achinitërinso pochin asanocancanaranquëmaꞌ.

² Noya natanpatamaco, noya coshatërëso pochin acoaranquëmaꞌ. Cosharomia co achinimiatërinquëmahuëꞌ. ¡Co topinan quëran pahuërëtatë maꞌpatacaso yaꞌhuërinhuëꞌ!

³ Huëcapairahuatomaco noya natancoꞌ. Natanpatamaco nanpiaramaꞌ. Tapi nosoroato nani shaꞌhuitërahuë. Ina nanicaso marëꞌ canpitaroꞌco anoyatomiatarahuë.

⁴ Nisha nisha piyapiroꞌsa naporahuësoꞌ shaꞌhuitacaso marëꞌ, cari ina acorahuë. Nisha nisha parti yaꞌhuëpisopita huaꞌanëntaton aꞌchintacaso marëꞌ acorahuë.

⁵ Natanco israiroꞌsanquëmaꞌ. Canpitaso nisha piyapiroꞌsa co nohuitapomarahuëꞌ, përasaramaꞌ. Nisha nisha nacionoꞌsaquë yaꞌhuëpisopita co nohuitopirinëmahuëꞌ, taꞌarëꞌnachin huëcapaiarinënquëmaꞌ. Caso Sinioroco noya niꞌnanquëma niꞌton, napotarinënquëmaꞌ,” tënin Sinioro.

⁶ Siniorosoꞌ, co áquë patërinpoahuëꞌ. Yonipatëhua quënanarihuaꞌ. Nontohuatëhuaꞌ, natanarinpoaꞌ.

⁷ Co noyahuëꞌ nipisopita, co noyahuëꞌ nipisoꞌ aꞌpoinaꞌ. Nitapicancanpisopitantaꞌ, co noyahuëꞌ yonquipisoꞌ aꞌpoinaꞌ. Yosë chachin tahuërëtaantatomaꞌ, natëantacoꞌ. Inaso noya niꞌton, oshanëma inquitarinquëmaꞌ.

^8-9 Sinioro chachin naporin: “Caso co canpita pochin yonquirahuëꞌ. Maꞌpitaso yanipato, co canpita pochin caso ninahuëꞌ. Piꞌiroꞌtëso isoroꞌpa quëran áquë niꞌton, co nincantochináchinhuëꞌ. Inapochachin canpitanta nisha nisha yonquirama niꞌton, co onporonta ca pochin yonquiaramahuëꞌ. Co ca pochin maꞌsha nisaramahuëꞌ,” tënin.

¹⁰ Ina quëran Sinioro taantarin: “Ocaiꞌ, oꞌnan, inapitaso inápa quëran anotërin. Napohuachina co topinan panantarinhuëꞌ. Isoroꞌpaꞌ ashipirotaton anoyatërin, yaꞌpirin apaporin, naporin. Nitohuachina, yaꞌpirin shacacaiso yaꞌhuërin. Cosharonta yaꞌhuërin huachi.

¹¹ Inapochachin nonahuësontaꞌ, co topinan caquë huënantarinhuëꞌ. Inasoꞌ, ca nohuantërahuëso nisarin. Maꞌsona camairahuëso nisarin.

¹² Canpitaso quëparinëma quëran, noya cancantatoma huënantaramaꞌ. Yaꞌhuëramaso noꞌpaquë chachin sano cancan quëran huënantaramaꞌ. Motopiroꞌsaꞌ, motopiaꞌhuaroꞌsaꞌ, inapitanta piyapi pochin capa cancantatona cantaponaꞌ. Yaꞌipi nararoꞌsanta piyapi pochin pincaroponaꞌ.

¹³ Sarsaroꞌsa yaꞌhuërënamën, pino nararoꞌsa aꞌshinapon. Ihuatatëroꞌsa yaꞌhuërënamën, arayan nararoꞌsa aꞌshinapon. Inapohuato: ‘¡Ma noyacha Sinioroso paya!’ tëcaponaꞌ. Ina pochin acorahuësoꞌ, yaꞌhuëmiatapon. Co incari tëranta ataꞌhuantaponhuëꞌ,” tënin Sinioro.