Isaías 54 - Chayahuita (Shahui)

Yosë nosoromiatërinpoasoꞌ

¹ Quirosarin ninanoquë yaꞌhuëramasopitasoꞌ, sanapi co huaꞌhuanaꞌpihuë pochin nipiramahuëꞌ, capa cancantatomaꞌ, noncarocoꞌ. Capa cancantatoma cantacoꞌ. Co huaitoma iquin natanpiramahuëꞌ, Sinioro chachin naporin: “Aꞌpopiso sanapi, soꞌyahuanoꞌsa quëran, naꞌcon naꞌcon huaꞌhuinpita yaꞌhuëtapon,” tënin.

² Nëꞌmëtë pëi apancanatohuachinara, isopopi: Co tëꞌhuatonaraihuëꞌ nëꞌmëtëroꞌsa otënpi. Noninënpita anaporopitopi. Nara paintopisopitantaꞌ, noyá paꞌhuacoraꞌpiapi. Inapopi. Inapochachin canpitantaꞌ, yaꞌhuëramaso noꞌpaꞌ apancanatocoꞌ.

³ Inchinan quëran, apancanataramaꞌ. Ahuënan quëraonta inapotaramaꞌ. Canpita quëran pipipisopita naꞌa nacionoꞌsa canaponaꞌ. Ninanoroꞌsa tanahuantapisopitantaꞌ, yaꞌhuëtaantaponaꞌ.

⁴ Ama tëꞌhuacosohuëꞌ. Co tapanamasoꞌ yaꞌhuëaponhuëꞌ. Co noꞌhuiponënquëmahuëꞌ. Nanon pochin nicapoma tapanamasoꞌ, naniantaramaꞌ. Quëyoron pochin nicapoma taparo ninamasoꞌ, co huachi yonquiaramahuëꞌ.

⁵ Nininquëmasoꞌ, saꞌatatë pochin nitarinquëmaꞌ. Inasoꞌ nininën, Sinioro yaꞌipi nanitaparinsoꞌ. Inasoꞌ Yosë, noyasáchin ninin niꞌton, Israirori chinotërin. Ina nichaꞌërinquëmaꞌ. Yaꞌipi isoroꞌpaꞌ huaꞌanëntaton napotarinquëma niꞌton, yaꞌipi inapita naniantaramaꞌ.

⁶ Nanon soꞌyahuan soꞌini aꞌpohuachina, naꞌcon parisitërin. Ina pochachin canpitanta Yosë marëꞌ nipiramahuëꞌ, inaso nosoroatënquëma huaꞌanëntaantaꞌinquëmaso marëꞌ përaantarinquëmaꞌ:

⁷ “Co huaꞌqui marëꞌ aꞌporanquëmahuëꞌ. Inapotopiranquëmahuëꞌ, nosoromiatatënquëma naquëranchin maantaranquëmaꞌ.

⁸ Aꞌnanaya noꞌhuitó tënahuëquë, naꞌpitatë pochin nitëranquëmaꞌ. Napoaporahuëꞌ, co huaꞌqui marëꞌ naporahuëꞌ. Nosoromiatatënquëmaꞌ, yonquiantaranquëmaꞌ,” tënin Sinioro nichaꞌërinquëmasoꞌ.

⁹ Ina quëran Sinioro taantarin: “Pacon paꞌninso piquëran iráca Noi shaꞌhuitërahuë: ‘Caso Yosëco niꞌto, noꞌtëquën shaꞌhuitaranquën. Ipora quëran huarëꞌ co huachi iso pochin pacon isoroꞌpaꞌ imotaantaponhuëꞌ,’ itërahuë. Ina napotërahuëso chachin canpitanta shaꞌhuitaranquëmaꞌ. Co huachi noꞌhuiantaponquëmahuëꞌ. Co huachi maꞌsha onpotaꞌhuanquëmasoꞌ, shaꞌhuitaantaponquëmahuëꞌ.

¹⁰ Motopiroꞌsa nacontopirinahuë tërantaꞌ, motopiaꞌhuaroꞌsanta nipaꞌtanpirinahuë tërantaꞌ, nosororanquëmasoꞌ, inachachin nisápon. Noya ninicatëhua yaꞌhuëcaso marëꞌ, nani canpitaroꞌco anoyatërahuë. Naporëhuasoꞌ, co onporo tapiarahuëꞌ. Sinioro nosororinquëmaso naporin,” tënin.

Onpopinsona nasha Quirosarin acoarinsoꞌ

¹¹ Sinioro naporin: “Quirosarin ninanosoꞌ, sëtoro nisárin. Panca ihuani tëꞌyatërinso pochin ninin. Co incari tëranta noya nontatë achinincancanëso pochin nitërinhuëꞌ. Napoápirinhuëꞌ, anoyataantacaso marëꞌ yara naꞌpi paꞌton nininsoquë anoyataantarahuë. Pairanën paquëmarinsontaꞌ, sapiro naꞌpi quëran acoarahuë.

¹² Torinënpitantaꞌ, nopi itopisoꞌ naꞌpi quëran, acoarahuë. Yaꞌcoananënpitantaꞌ, piriro itopiso naꞌpiroꞌsa quëran acoarahuë. Pairanënpitanta nisha nisha paꞌton nininsopita naꞌpiroꞌsa quëran acoarahuë.

¹³ Yaꞌipi inaquë yaꞌhuëcaiso nipisopita cari aꞌchintarahuë. Yaꞌipi inaquë yaꞌhuëpisopitasoꞌ, noya yaꞌhuëatona sano yaꞌhuëaponaꞌ.

¹⁴ Noꞌtëquënáchin nicatona chiníquën nanantaponaꞌ. Co inso tëranta huaꞌanëntarinquëmahuëꞌ niꞌton, co tëꞌhuaramahuëꞌ. Co tëꞌhuaatoma nisha nisha yonquiaramahuëꞌ.

¹⁵ Insosona yaahuëhuachinquën, co ca nohuanton napoarinhuëꞌ. Pashitaꞌpapirinënquëontaꞌ, quëmari minsëaran.

¹⁶ Niꞌquëꞌ. Cari huaꞌna camayo ninahuë. Inasoꞌ, pënaya ahuënarataton sacatërin. Huaꞌna asoquirahuaton, ahuëtacaiso marëꞌ ohuarapiso ninin. Ahuëtaton tiquitonaꞌpintaꞌ, cari ninahuë. Tiquitohuachina, naꞌcon tapitërin.

¹⁷ Napoaponahuëꞌ, co inso tëranta ataꞌhuantiinquëmaso marëꞌ huaꞌna acoaponhuëꞌ. Insosona shaꞌhuirapihuachinquën, quëmari acopitëraꞌpiapon. Inpitasona natëhuachinaco, ca nohuanton minsëtaponaꞌ. Sinioro chachin naporin,” tënin.