Isaías 50 - Chayahuita (Shahui)

^1-2 Ina quëran Sinioro napoantarin: “Israiroꞌsanquëmaꞌ. Carimaso naꞌcon yaaꞌchintatënquëma yonípiranquëmahuëꞌ, co quënananquëmahuëꞌ. Përápiranquëmahuëꞌ, co aꞌpaniramacohuëꞌ. ‘Nihuitërinsoꞌ pahuërëtacaso marëꞌ paꞌanatë pochin nitërinpoaꞌ,’ topiramahuëꞌ. Oshahuanama niꞌton, paꞌanatë pochin nitëranquëmaꞌ. Co natantochináchinhuëꞌ cancantëramaso marëꞌ aꞌpoatë pochin nitëranquëmaꞌ. ¡Natëramaco naporini, carima nichaꞌëitënquëmahuëꞌ! Marënta camaihuatora, aꞌnaroáchin yanirin. Iꞌrosanta yanitonaꞌ, inotëro taranapi. Napohuachina, samiroꞌsanta yamorori tëpapon. Inapoatona chiminpachinaꞌ, chanataponaꞌ.

³ Ca nohuanton piꞌiroꞌtëntaꞌ, sëtohuachinara aꞌmopiso pochin ayaꞌnorahuë. Saꞌcatën nëꞌmëtë quëran aꞌmotatë pochin nitërahuë,” tënin.

Sinioro piyapinën parisitaponahuëꞌ, ahuantërinsoꞌ

⁴ Sinioro piyapinën naporin: “Canotërëso pochin cancantopisopita achinicancanacaso marëꞌ, Sinioro aꞌchintërinco. Nani tashiramiachin taꞌtato natantaꞌhuaso marëꞌ catahuarinco.

⁵ Yonquínahuan nicaꞌhuaso marëꞌ Sinioro catahuarinco. Anitotohuachincora, natërahuë. Natëtochináchin cancantërahuë.

⁶ Yahuihuihuachinacora, co pinëhuë apirarahuëꞌ. Shinoratënta yahuaꞌtohuachinacora co apirarahuëꞌ. Noꞌhuitonaco ipirayatohuachinacora, co niquë tahuërërahuëꞌ.

⁷ Sinioro catahuarinco niꞌton, noꞌhuipirinacohuëꞌ, co manta tënahuëꞌ. ‘Co atapanarinacohuëꞌ,’ taꞌto chiníquën cancantërahuë.

⁸ Paꞌpoyarincosoꞌ, ca pirayan nisarin. ¡Co inso tëranta maꞌsha onpotërahuëꞌ! Inso tëranta maꞌsha onpotohuatosoꞌ, napopináchin coisëquë paꞌitoihuëꞌ. ¡Co insonta shaꞌhuirapiincoso yaꞌhuërinhuëꞌ! Yashaꞌhuirapihuachinacosoꞌ, huëꞌsahuatona shaꞌhuichinaco.

⁹ Sinioro chachin catahuarinco niꞌton, ¡co insonta anaꞌintiincoso shaꞌhuiponhuëꞌ! Aꞌmorësoꞌ, aꞌshini pëꞌyarinso pochin, inimicotërinacosopitasoꞌ, taꞌhuantaponaꞌ,” tënin.

^10-11 (-)