Isaías 49 - Chayahuita (Shahui)

Sinioro piyapinën, nisha nisha piyapiꞌsa aꞌpintatë pochin nitarinsoꞌ

¹ Sinioro piyapinën naporin: “Marë soꞌtonoꞌsaquë yaꞌhuëramasopita natancoꞌ. Aquë nacionoꞌsaquë yaꞌhuëramasopita noya natancoꞌ. Caso Sinioro marëꞌ pënëntërahuë. Coꞌhuara nasichátërasocohuëꞌ, ina marëꞌ Sinioro acorinco. Yoꞌnanquë nicasoco chachin nininëhuë acotochinarinco.

² Sahuëni noyá toꞌnarëso pochin chiníquën nanantato nanamën shaꞌhuicaꞌhuaso marëꞌ acorinco. Ama maꞌsha onpotiinacoso marëhuëꞌ imirin quëran chachin paꞌpoyararinco. Sontaro pëꞌchinan shinërë taparinquë acorinso pochin, ina marëꞌ sacataꞌhuasoꞌ acorinco.

³ Sinioro chachin nontatonco: ‘Quëmasoꞌ Israironquën. Piyapinëhuënquën. Quëmá quëran noya noya ninahuësoꞌ aꞌnoarahuë,’ itërinco.

⁴ Caso nipirinhuë napopirahuëꞌ: ‘Topinan quëran caso chiníquën sacatato canotomarahuë,’ topirahuë. Napopirahuë Siniorosoꞌ, onpopinsona sacatërahuëso nitotërin. Tëhuënchachin Siniorosoꞌ, chiníquën nanantërin. Chiníquën nanantaton, noꞌtëquën acanararinco.

⁵ Siniorosoꞌ Yosënëhuë niꞌton, noya nicaꞌhuaso marëꞌ achinirinco. Ina marëꞌ noya niꞌninco. Mamahuë yoꞌnamënquë nicasoco quëran huarëꞌ, ina piyapinën nicaꞌhuaso marëꞌ acorinco. Israiroꞌsa ca quëran Sinioro chachin tahuërëtaantatonaꞌ, imaantacaiso marëꞌ acorinco. Inapitaso Cacopo quëran pipipisopita niꞌtonaꞌ, inapocaiso marëꞌ inapotërinco.

⁶ Ina Sinioro chachin shaꞌhuitaantarinco: ‘Cacopo quëran pipipisopita huëntonoꞌsaꞌ, quëmari anoyataantapon. Inimicoroꞌsari quëpapirinahuëꞌ, quëmari ayontoantapon. Napoaponahuëꞌ, co inaíchin nicacaso marëꞌ acoranquënhuëꞌ, nisha piyapiꞌsanta aꞌchintaton, anohuitaancoso marëꞌ acoranquën. Aꞌpintërëso pochin nanamëhuë anitotaran. Yaꞌipi parti piyapiꞌsa chaꞌëcaiso marëꞌ aꞌchintëraꞌpiapon,’ itërinco,” tënin.

⁷ Siniorosoꞌ nichaꞌëtonaꞌpi. Siniorosoꞌ noyasáchin ninin niꞌton, Israirori chinotërin. Ina chachin piyapinën nontaton: “Quëmasoꞌ nisha piyapiꞌsa nocamiatarinquën. Nisha nisha piyapiꞌsa noꞌhuiarinquën. Noꞌhuitërayaroꞌsa huaꞌanëntatënquën asacatarinquën. Inapotopirinënquënhuëꞌ, copirnoroꞌsaꞌ, huaꞌanoꞌsa inapita niꞌsarinënquën. Noya nicatënënquën huaniponaꞌ. Huanipi quëran moshapënën. Caso Sinioroco. Noyasáchin ninahuë niꞌton, Israiro chinotërinco. Carinquën huayonanquën. Napoaton shaꞌhuitëranquënsopita ananiarahuë,” itërin.

⁸ Siniorori chachin napotaantarin: “Nohuantasënquën chachin catahuaranquën. Nontohuatanco natanaranquën. Yanichaꞌëranquën niꞌton, catahuaranquën chaꞌëcaso marëꞌ. Quëmá quëran israiroꞌsarëꞌco anoyataꞌhuaso marëꞌ carinquën paꞌpoyararanquën. Inapohuato, yaꞌhuëpiso noꞌpaꞌ noya noya acoantarahuë. Inimiconënapitari noꞌpanëna tapitopirinahuëꞌ, piyapinëhuëpitari chachin huaꞌanëntaantaponaꞌ.

⁹ Minsërahuatona quëpapisopita, quëmari shaꞌhuitapon: ‘Ipora quëran huarëꞌ noya paco huachi,’ itaran. Tashinanquë pochin yaꞌhuëpisopitantaꞌ: ‘¡Yaꞌnoco huachi!’ itaran. Inapotohuatan, nani ira pirayan pastoroꞌsa quënanaponaꞌ. Tomaroꞌtë motopiroꞌsaquëntaꞌ, pëꞌtahuanëna cosharo yaꞌhuëtapon.

¹⁰ Co huachi tanaponahuëꞌ. Co huachi yamoroaponahuëꞌ. Co piꞌiri tëranta piꞌcaton aparisitaponhuëꞌ. Cari nosoroato insëchinsona pacacaisoꞌ, aꞌnotapo. Huinanoꞌsa yaꞌhuërinquë cari quëpapo.

¹¹ Motopiroꞌsataquëchin ira acoarahuë. Iraroꞌsanta yaꞌhuërinsoꞌ, noya noya acoarahuë.

¹² ¡Niꞌcochi huachi! ¡Paꞌpi áquë quëran huëꞌsapi! Aꞌnaquën norti parti quëran, aꞌnaquëonta piꞌi yaꞌconinso parti quëran, aꞌnapitanta Sinin noꞌpa quëran huëꞌsapi.

¹³ Piꞌiroꞌtëquë yaꞌhuëpisopita, capa cancanchinaꞌ. Capa cancantatonaꞌ: ‘yai,’ charaꞌinaꞌ. Isoroꞌpaquëntaꞌ, inapochachin capa cancanchinaꞌ. Motopiroꞌsa quëran huarëꞌ piyapiꞌsa pochin capa cancantatonaꞌ, ‘yai,’ charaꞌinaꞌ. Sinioro piyapinënpita parisitapisoꞌ, inari noya acoantarin. Nosoroaton napotarin niꞌton, ina pochin nicoꞌ,” itërin.

Yaꞌhuëpiquë chachin israiroꞌsa huënantacaisoꞌ, shaꞌhuirinsoꞌ

^14-15 Quirosarin yonquiaton Yosë naporin: “Canpitaso Quirosarinquë yaꞌhuëramasopita naporamaꞌ: ‘Sinioro aꞌporincoi. Yosënëhuëi nipirinhuëꞌ, naniantërincoi huachi,’ tënamaꞌ. Napopiramahuëꞌ, sanapiso co onporonta huaꞌhuin nanaiantërinhuëꞌ. ¡Co onporonta nosororinso tananpitërinhuëꞌ! Inaso huaꞌhuin naniantopirinhuë tërantaꞌ, carimaso co onporonta naniantaranquëmahuëꞌ.

¹⁶ Carima huaꞌanëntatënquëmaꞌ, nininëma imirahuëquë ninshitërahuë. Nahuanquë ninshitopinan pochin yaꞌhuërárin. Ninanonëma pairapiramasontaꞌ, yonquirárahuë.

¹⁷ Ninanonëma ataꞌhuantacaiso marëꞌ manorahuatona huëcapairinëmaꞌ. Noya acoantacaiso marësoꞌ, mano manorahuatona huëcapaiponëmaꞌ. Ataꞌhuantërinquëmasopita, nani paꞌpi huachi.

¹⁸ Quirosarinquë yaꞌhuëramasopita itohuaran itohuaran noya notëtocoꞌ. Nisha nisha parti israiroꞌsa quëpapisopita huëantarapi. Caso Sinioroco yaꞌhuëárahuë niꞌton, noꞌtëquën shaꞌhuitaranquëmaꞌ: Yaꞌipi israiroꞌsa huëꞌpachina, nitapaantaranso pochin acoarinën. Nanon yasoꞌyaton nitaparinso pochin nitarinën.

¹⁹ Canpitaso noꞌpanëma tapimiatopi. Inapotopirinahuëꞌ, notohuaro naꞌasarama niꞌton, noꞌpanëma pahuan pahuantaponquëmaꞌ. Ninanonëma ataꞌhuantopisopitasoꞌ, nani áquë huëshiramaꞌ.

²⁰ Aꞌnaquën yaꞌhuëhuanoꞌsa quëpapi niꞌton, ayatatë pochin nitopiranhuëꞌ, huënantarahuatonaꞌ, quëmaora chachin shaꞌhuitaponën: ‘Iso noꞌpanënpoa co onpopinchin pancanayahuëꞌ. Onpopinquë tërantaꞌ, yaꞌhuëcaꞌhuaiso marëꞌ acocoi,’ itaponën.

²¹ Napotohuachinëmaꞌ, canpitaso yonquinëmaquë napoapomaꞌ: ‘¡Isopitasoꞌ, co yaꞌhuëhuanoꞌsahuëꞌ! Quirosarinquë yaꞌhuëraisopitasoꞌ, quiquirinacoi. Inapoatoi Quirosarinsoꞌ, tananhuantárin patërai. Co onpo naꞌacaꞌhuaisohuëꞌ nitërinacoi. Isopita huëꞌpisopitasoꞌ, co isëquë soꞌsopihuëꞌ. ¡Intohuaranso aꞌna huëꞌmaraiꞌ!’ tosaramaꞌ,” tënin.

²² Sinioro naporin: “Niꞌquëꞌ. Nisha nisha piyapiꞌsa nisha nisha parti yaꞌhuëpisoꞌ, camaiato shaꞌhuitarahuë. Imirahuë quëran aꞌnotërëso pochin inapita nitarahuë. Quirosarin yaꞌhuëhuanoꞌsa iporahuatona quëcacaiso marëꞌ napotarahuë. Sanapi nipisopitanta paꞌmosorahuatonaꞌ, quëcacaiso marëꞌ napotarahuë.

²³ Copirnoroꞌsanta huiꞌninpita pochin nitarinquëmaꞌ. Inahua huiꞌninpita sanapi nipisopitantaꞌ, nocomatënquëma asoꞌsoarinquëmaꞌ. Inapitasoꞌ noya nicatënëmaꞌ, moshaponëmaꞌ. Isonpi quëran noꞌpaquë huarëꞌ monshorahuatonaꞌ, canpitasáchin natëinëmasoꞌ anitotarinënquëmaꞌ. Inapoatonaꞌ: ‘Tëhuënchachin Siniorosoꞌ chini chiníquën nanantërin. Naporahuaton inasáchin ninapisopitasoꞌ, co onporonta taparo nisapihuëꞌ,’ tëcaponaꞌ,” tënin.

²⁴ Canpitaso quëparinëmaquë napoaramaꞌ: “Chiníquën piyapi ahuëtaton maꞌsha maninsoꞌ, ¿incarita nanitërin osërëtacasoꞌ? Noꞌhuitëraya nininsontaꞌ, piyapi mapachina, ¿nanitërin inari taꞌananpicaso ti?” tosaramaꞌ.

²⁵ Siniorosoꞌ, naporin: “Nanitopi mini. Chiníquën piyapi maꞌsha maninso nipirinhuëꞌ, aꞌnari nanitërin osërëtacasoꞌ. Noꞌhuitërayanta canatërinsoꞌ, aꞌnari nanitërin matacasoꞌ. Inapochachin canta nisarahuë. Aꞌnaquën maꞌsha yaonpotohuachinquëmaꞌ, cari chinitarahuë. Cari chachin Quirosarin yaꞌhuëhuanoꞌsa nichaꞌësarahuë.

²⁶ Aparisitërinëmasopita, cari camaiarahuë inahuara noshinëna capatë pochin inahuara capini nitëpacaisoꞌ. Huënainënantaꞌ, huino oꞌotona noꞌpipiso pochin noꞌhuitonënaquë co nitënorocaisohuëꞌ camaiarahuë. Inapotohuato, yaꞌipi piyapiroꞌsa nichaꞌëranquëmasoꞌ nitotaponaꞌ: ‘Sinioro niꞌton, Cacopo quëran pipipisopita nichaꞌërin. Chiníquën nanantaton naporin,’ tosapi,” tënin.