Isaías 46 - Chayahuita (Shahui)

Papironia mamanshiroꞌsa quëran Yosë chini chiníquën nanantërinsoꞌ

¹ Piri mamanshi itopisoꞌ, nopanpitërin. Nipo mamanshi itopisontaꞌ, noꞌpaquë anotërin. Pëꞌtahuaroꞌsa aipi mamanshiroꞌsasoꞌ quëpapi. Paꞌpi quëquënpi niꞌton, pëꞌtahuaroꞌsa canotopi.

² Mamanshiroꞌsasoꞌ, nonpin yosëroꞌsaꞌ. Napoaton nanitopi nopanpitacaisoꞌ, noꞌpaquë anotacaisoꞌ, inapocaisoꞌ. Co inahuara tëranta nanitopihuëꞌ chaꞌëcaisoꞌ. Inimicoroꞌsari inahuanta quëpaponaꞌ.

³ Yosë chachin naporin: “Cacopo quëran pipiramasopita natancoꞌ. Yaꞌipi israiroꞌsa quëparitëramasoꞌ natancoꞌ: Coꞌhuara nasichátërapomahuëꞌ, carima pëꞌpëatë pochin quëparanquëmaꞌ. Ipoatë pochin quëpatënquëma aꞌpairanquëmaꞌ.

⁴ Mashotohuatamantaꞌ, inachachin nitáponquëmaꞌ. Acasáchin nipomarahuëntaꞌ, inachachin nitáponquëmaꞌ. Carima ninanquëmaꞌ. Carima chachin pëꞌpëatë pochin quëparáponquëmaꞌ. Carima achiniaranquëmaꞌ. Carima chachin nichaꞌësaranquëmaꞌ.

⁵ ¡Co inso tëranta ca pochin aꞌna yaꞌhuërinhuëꞌ! ¡Co aꞌna ca pochin nininso yaꞌhuërinhuëꞌ!

⁶ Aꞌnaquën, tanpanantëna quëran naꞌa oro ocoipi. Pratanta ocoiatona pëꞌtënanquë pëꞌtënpi. Ina quëran huaꞌnaquë sacatërinsoꞌ yonípi. Inari mamanshi nitohuachina, monshorahuatona moshapi.

⁷ Ina quëran pitënahuatonaꞌ, acopiquë acocaiso marëꞌ quëpapi. Inapotohuachinara, inaquëranchin yaꞌhuëárin. Chiníquën nontopirinahuëꞌ, co aꞌpanitërinhuëꞌ. Parisitatona co napion ancantopirinahuëꞌ, co nanitërinhuë nichaꞌëcasoꞌ.

⁸ Canpitaso oshahuanoꞌsanquëmaꞌ. Ama ninonpintocosohuëꞌ, noya yonquicoꞌ.

⁹ Iráca quëran huarëꞌ nani maꞌsha onpopisoꞌ yonquicoꞌ. Casáchin Yosëco. ¡Co aꞌna ca pochin yaꞌhuërinhuëꞌ! Caso Yosëco. ¡Co insonta aꞌna ca pochin yaꞌhuërinhuëꞌ!

¹⁰ Tahuëri caniaritërin quëran huarëꞌ taꞌhuantacaisoꞌ shaꞌhuitërahuë. Aꞌna tahuëri maꞌsona onpocaisoꞌ iráca quëran huarëꞌ shaꞌhuitërahuëꞌ. Maꞌpitasona nicaꞌhuasoꞌ yonquihuatora, ina inachachin nisarin. Maꞌsona nicaꞌhuasoꞌ yonquirahuësopita, nisarahuë.

¹¹ Piꞌi pipirinso parti aꞌnara quëmapi yaꞌhuëapon. Tahuëri nanihuachin, përápato huëꞌsarin. Inasoꞌ huëꞌpachin, panca onian áquë quëran huëꞌsarinso pochin nisarin. Yaꞌipi yonquirahuësopita inari nicapon. Maꞌsona nicaꞌhuasoꞌ nani yonquirahuë. Yonquirahuëso chachin yaꞌhuëapon.

^12-13 Canpitasoꞌ, co natantochináchinhuëꞌ cancantëramaꞌ. Napoapomarahuëꞌ, noya natancoꞌ. Canpitaso naporamaꞌ: ‘Co nimara aꞌnaroáchin Yosë nichaꞌësarinpoahuëꞌ,’ tënamaꞌ. Napopiramahuëꞌ, co huaꞌquiya quëranhuëꞌ, nichaꞌëcaꞌhuanquëmaso marëꞌ maꞌsha nisarahuë. Co huaꞌquiya quëranhuëꞌ, nichaꞌësaranquëmaꞌ. Quirosarinquë yaꞌhuëpisopita cari nichaꞌësarahuë. Yaꞌipi Cota huëntonquë yaꞌhuëpisopitantaꞌ, napotarahuë. Israiro noꞌpaquë yaꞌhuëpisopita noya noya yaꞌnorahuësoꞌ, aꞌnotarahuë,” tënin.