Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Isaías 44 - Chayahuita (Shahui)


Siniorori noꞌtëquënáchin nontërinsoꞌ

1-2 Israiroꞌsanquëma noya natancoꞌ. Sinioro naporinso shaꞌhuichinquëmaꞌ: “Canpitaso Cacopo shinpitanquëmaꞌ. Inasoꞌ, piyapinëhuë nicacaso marëꞌ cari huayonahuë. Carima ninanquëmaꞌ. Coꞌhuara nasichátërasënquëmahuëꞌ, acoranquëmaꞌ. Ama paꞌyancosohuëꞌ. Carima catahuaranquëmaꞌ.

3 Ca nohuanton inotëroquë naꞌcon iꞌ yaꞌhuëapon. Yaniroquëntaꞌ, iꞌshanaroꞌsa yaꞌhuëapon. Canpita quëran pipipisopitanta ispiritonëhuë ayaꞌcoancantarahuë. Inapotahuato naꞌcon catahuaarahuë.

4 Pasto noyá oporapitohuatëra, co shia soꞌsorinhuëꞌ. Nararoꞌsantaꞌ, iꞌsha yonsanquë noya noyatërin. Inapochachin inapitanta catahuahuato, noya noya nisapi.

5 Napohuachina aꞌnasoꞌ: ‘Caso Sinioro huaꞌanëntërinco,’ tapon. Aꞌnantaꞌ: ‘Caso Cacopo shiinco,’ tapon. Aꞌnantaꞌ, imirinquë ninshitaton: ‘Yosë caso huaꞌanëntërinco,’ tapon. Aꞌnaquënsoꞌ, nininën ninshitahuaton, ina pirayan Israiro nininën ninshitaantarin,” tënin.


Yosë mamanshiroꞌsa quëran chini chiníquën nanantërinsoꞌ

6 Siniorosoꞌ yaꞌipi nanitaparin. Inasoꞌ, israiroꞌsa nichaꞌësahuaton huaꞌanëntërin. Ina nontatënquëma naporin: “Coꞌhuara isoroꞌpaꞌ yaꞌhuëyátërasohuëꞌ, caꞌton yaꞌhuërahuë. Nani maꞌsha yaꞌhuërinsopita taꞌhuantopiriontaꞌ, caso yaꞌhuëápo. Casáchin Yosëco.

7 Aꞌna ca pochin yaꞌhuëhuachin, huëꞌsahuatona shaꞌhuichinaco. Casáchin caniaritërin quëran huarëꞌ aꞌna tahuëri maꞌsona onpocasoꞌ shaꞌhuirahuë.

8 Ama tëꞌhuacosohuëꞌ, chiníquën cancantocoꞌ. Coꞌta cari iráca quëran huarëꞌ maꞌsona onpoamasoꞌ nani shaꞌhuitëranquëmaꞌ. Canpitaso nani natanamaco. Casáchin Yosëco. Co aꞌna yosë ca pochin paꞌpoyatonaꞌpi yaꞌhuërinhuëꞌ,” tënin.

9 Mamanshi ninaꞌpiroꞌsasoꞌ, co maꞌmarë tëranta paꞌtopihuëꞌ. Mamanshi nipachinara paꞌyatopi. Paꞌyatopirinahuëꞌ inahuanta co maꞌmarë tëranta paꞌtopihuëꞌ. Somaraya pochin cancantopisopita ina chinotopi. Apiroꞌsa nipisopita napopisoꞌ. Napopiso marëꞌ tapanacaisoꞌ yaꞌhuëapon.

10 Huaꞌna asoquirahuatona mamanshi nipachinara, topinan quëran napoapi. Inasoꞌ yosë pochin chinotopirinahuëꞌ, co catahuaponhuëꞌ.

11 Ina moshapisopitasoꞌ, taparo nisapi. Ina ninaꞌpiroꞌsantaꞌ, topinan piyapiroꞌsaꞌ. Napopináchin huëꞌsahuatonaꞌ, napopisoꞌ coisëquë shaꞌhuipi naporini, paꞌpi tapanatona paꞌyaintonahuëꞌ.

12 Mamanshi nicaton huaꞌna camayo naporinso yonquiaꞌahuaꞌ. Inasoꞌ, pënquë huaꞌna ahuënocatërin. Huaꞌna patëtiinanquë martichoquë patëëtápaton yonquirinso chachin atarantërin. Tanpaquën chiníquën niꞌton, noya sacatërin. Inapoaso co coshatohuachinhuëꞌ, co huachi nanitaantarinhuëꞌ. Co iꞌsha oꞌopachinhuëꞌ, sanpatërin.

13 Mamanshi ninaꞌpi naraquë sacatërinsontaꞌ, yonquiaꞌahuaꞌ. Inasoꞌ, mitro pochin nininquë yaꞌipi aꞌniraꞌpiarin. Napisë, conpasë, inapitaquë nonanahuaton sacatërin. Inapotahuaton naꞌpi yachananquë ashimëntërin. Napoin quëran piyapi pochin noyapin noyapin yaꞌnorinso acorin. Nani tënirahuaton, moshatopiso pëiquë acoconin.

14 Aꞌnaquëontaꞌ, nonararoꞌsa shaꞌpi. Oꞌnanápachina noya aꞌshinpi. Nohuantohuachinasoꞌ, siprisë narahuë nipon, nopri narahuë nipon shaꞌpi. Inapotatonaꞌ, aꞌpaipi niꞌton, aaꞌshinpi.

15 Aꞌnëhuachinara, napopinchin pëiquë quëpatona aꞌpëpi. Aꞌpëhuachinara napëntopi. Inaquë chachin paonta anpipi. Inapotápirinahuëꞌ, napopinchin masahuatona yosëroꞌsa nonanpi. Nani tënihuachinara, moshacaiso marëꞌ isonahuatonaꞌ, noꞌpaquë huarëꞌ monshomapi.

16 Ina nara chachin aꞌpërinquë, nosha cancatërinso anpiaton caꞌnin. Nani caꞌpachina natërin. Naporahuaton napëntërarin quëran tapon: “Ma noyacha pënso paya. Nani huënocatarahuë,” tënin.

17 Ina yaꞌsorin quëran chachin mamanshi niantarin. Nani nipachina, isonahuaton noꞌpaquë huarëꞌ monshorin quëran mosharin. Paꞌpi nohuantaton itapon: “Quëmaso yosënëhuënquën niꞌton, nichaꞌëco,” itërin.

18 Napopisopita napoonpi. Co manta yonquipihuëꞌ. Somaraya pochin cancantatona co nanitopihuëꞌ noꞌtëquën yonquicaisoꞌ.

19 Noꞌtëquën yonquipi naporini: “Iso mamanshi ninëhuaso naraquë chachin, aꞌpëtërëhuaꞌ. Inaquë pan anpiatëhua caꞌnëhuaꞌ. Noshanta cancatërëhuasoꞌ, inaquë anpiatëhua caꞌnëhuaꞌ. ¡Napoaton iso mamanshisoꞌ co máquënhuëꞌ! ¡Moshapirëhuahuëꞌ, topinan nara tantontë napotarëhuaꞌ!” chitonahuëꞌ.

20 Napoatonaꞌ, inapitaso huariano caꞌpiso pochin nisapi. Nonpi nanan imatona napopi. Inapitasoꞌ co onporonta chaꞌësapihuëꞌ. Co nanitapihuëꞌ: “Iso mamanshisoꞌ, topinan quëran mosharahuë,” taꞌcaisoꞌ.


Siniorori israiroꞌsa oshanën inquitahuaton, nichaꞌërinsoꞌ

21 Naquëranchin Sinioro taantarin: “Israiroꞌsanquëmaꞌ. Canpitaso Cacopo shinpitanquëmaꞌ. Piyapinëhuëpitanquëma niꞌton, ama naniantocosohuëꞌ. Canpitaso piyapinëhuënquëmaꞌ, carinquëma acoranquëmaꞌ.

22 Tëhuëtatomaco oshahuanamasopita inquitëranquëmaꞌ. Chitoro inquirinso pochin inapita ayatërahuë. Carima nichaꞌëranquëma niꞌton, ca chachin tahuërëtaantaco,” tënin.

23 Piꞌiroꞌtëꞌ, quëmanta piyapi pochin nicaton cantaquëꞌ. Sinioro naporinso yonquiaton cantaquëꞌ. Capa cancantaton, inapoquëꞌ. Noꞌpaꞌ acoporonta piyapi pochin nicaton, “yai, yai,” charaꞌin. Motopiroꞌsaꞌ, tananoꞌsaꞌ, yaꞌipi nararoꞌsaꞌ, canpitanta capa cancantocoꞌ. Nichaꞌësahuatonpoaꞌ, Sinioro chiníquën nanantërinsoꞌ aꞌnotërinpoaꞌ.


Siro copirno quëran aꞌna tahuëri piyapinënpita nichaꞌësarinsoꞌ

24 Siniorosoꞌ nichaꞌërinquëmaꞌ. Coꞌhuara nasichátërasënquëmahuëꞌ acorinquëmasoꞌ, naporin: “Ca mini Sinioroco. Yaꞌipi maꞌsha cari acorahuë. Cari piꞌiroꞌtë nëꞌmëtë pëi pochin ótënahuë. Ca nohuanton isoroꞌpanta chinirin. Caoraíchin acorahuë. Co insonta catahuarincohuëꞌ.

25 Nonpin nanan pënëntonaꞌpiroꞌsa maꞌsona onpocasoꞌ shaꞌhuihuachinara, ca nohuanton co inachachin nininhuëꞌ. Ninotonoꞌsanta ca nohuanton huaꞌyantopi. Yonquinahuanoꞌsantaꞌ, ca nohuanton itohuara capini nipatëtopi. Nitotopirinahuë tërantaꞌ, napoonin yonquiapi.

26 Piyapinëhuëpita maꞌsona onpocaisoꞌ shaꞌhuipisopitaso nipirinhuëꞌ, ca nohuanton naniarin. Maꞌsona yonquipisontaꞌ, ca nohuanton nanipon. Quirosarinquë yaꞌhuëantacaisoꞌ, carima shaꞌhuitaranquëmaꞌ. Cota huënton ninanoroꞌsantaꞌ, nashaquëranchin acoantaponaꞌ. Inapitasoꞌ ataꞌhuantopirinahuëꞌ, naquëranchin acoantaponaꞌ.

27 Cariso marë camairahuë naporini, aꞌnaroáchin yaniitonhuëꞌ. Iroꞌsantaꞌ napoꞌitonhuëꞌ.

28 Cari Pirsia copirno Siro itopiso shaꞌhuitërahuë: ‘Ohuicanëhuëpita huaꞌanën pochin nicacamaso marëꞌ carinquën acoranquën. Maꞌsona nohuantërahuëso quëma nisaran,’ itërahuë. Quirosarinta shaꞌhuitërahuë: ‘Quëmaso ataꞌhuantopirinënquënhuëꞌ, naquëranchin anoyataantarinën,’ itërahuë. Chinotëramacoso pëinta shaꞌhuitatë pochin: ‘Naquëranchin simintonën acotaantaponën,’ itërahuë,” tënin.

© 2011, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ