Isaías 43 - Chayahuita (Shahui)

Sinioroíchin nichaꞌërinpoasoꞌ

¹ Israiroꞌsanquëmaꞌ, nininquëmasoꞌ nontarinquëma natancoꞌ. Canpitaso Cacopo shinpitanquëma niꞌtomaꞌ, noya natancoꞌ: “Carinquëma nichaꞌëranquëma niꞌton, ama tëꞌhuacosohuëꞌ. Carima nininëma quëran përaranquëma niꞌton, huaꞌanëntëranquëmaꞌ.

² Pëntoitamasoꞌ nipachin, carima aꞌpaiaranquëmaꞌ. Pancairoꞌsaquë tëranta pëntoitohuatamaꞌ, co paꞌitaramahuëꞌ. Pën tënëntarintaquëchin pëntonpatamaꞌ co huiquitaramahuëꞌ. Co pën tëranta ahuiquitarinquëmahuëꞌ.

³ Caso Sinioroco niꞌto, napoarin. Carima nichaꞌësaranquëmaꞌ. Caso Yosëco noyasáchin ninahuë niꞌton, Israiro chinotërinco. Aꞌnapita huaꞌanëntapirinënquëmahuëꞌ, cari paꞌananquëmaꞌ. Iquipito, Itiopia, Sapa, inapita nacionoꞌsa pahuërë pochin quëtato, paꞌananquëmaꞌ.

⁴ Noya nicatënquëma nosororanquëmaꞌ. Canpitasoꞌ, maꞌsha naꞌcon paꞌtërinso pochin ninamaꞌ. Nichaꞌëtënquëmaꞌ, huaꞌanëntaꞌhuanquëmaso marëꞌ piyapiroꞌsaꞌ, nacionoꞌsaꞌ, inapita yoꞌsarahuë.

⁵ Ama tëꞌhuacosohuëꞌ, carinquëma caꞌtanaranquëmaꞌ. Piꞌi pipirin parti quëran, yaꞌconin parti quëran, inaquëranpita yaꞌhuëramaquë chachin quëantaranquëmaꞌ.

⁶ Norti parti inimiconëmapita yaꞌhuëpisoꞌ, sor partinta yaꞌhuëpisoꞌ, inapita camaiapo: ‘Ama huachi piyapinëhuëpita huaꞌanëntocosohuëꞌ. Yaꞌhuëpiquë chachin aꞌpainantacoꞌ. Iporasoꞌ áquë nisapi. Isoroꞌpaꞌ nanirinquë huarënta nisapirinahuëꞌ, huiꞌnahuëpita quëcoꞌ. Quëmapiꞌsaꞌ, sanapiꞌsaꞌ, inapita quëcoꞌ.

⁷ Inapitasoꞌ ca pochachin ninintopi. Cari chachin inapitaso acorahuë. Catahuarahuëso nicatonaꞌ, yaꞌipiya quëran paꞌyatiinacoso marëꞌ acorahuë.

⁸ Piyapinëhuëpitaso yaꞌpirahuanaponaraihuëꞌ, somaraya pochin cancantopi. Huëratëhuanaponaraihuëꞌ, nëꞌhuërinso pochin cancantopi. Ina pochin nipirinahuëꞌ, quëantacoꞌ.

⁹ Yaꞌipi nacionquë yaꞌhuëramasopita niyontoncoꞌ. Nisha nisha piyapiroꞌsanquëma niyontonatomaꞌ, shaꞌhuicoꞌ: ¡Co insonquëma tëranta aꞌna tahuëri maꞌsona onpocasoꞌ, shaꞌhuichinamahuëꞌ! Iracanta naporinsopita, co insonta inapocaso shaꞌhuichininhuëꞌ. Co noꞌtëquën nonahuë nipachinsoꞌ, niꞌpisopitari noꞌtëquën shaꞌhuiinaꞌ,’ itarahuë.

¹⁰ Israiroꞌsanquëmaso nipirinhuëꞌ, nani niꞌnamaco. Piyapinëhuëpita nicacamaso marëꞌ huayonatënquëma acoranquëmaꞌ. Nohuitatomaco chinotamacoso marëꞌ acoranquëmaꞌ. Maꞌninsoꞌ ninahuësontaꞌ, nitotamaso marëꞌ acoranquëmaꞌ. Coꞌhuara ca yaꞌhuëyátërasocohuëꞌ, co aꞌna yosë yaꞌhuërinhuëꞌ. Ca piquërantaꞌ co aꞌna yaꞌhuëaponhuëꞌ.

¹¹ Casáchin Yosëco. Casáchin nanitërahuë nichaꞌëtaꞌhuasoꞌ,” itërinquëmaꞌ.

¹² Ina quëran Sinioro taantarin: “Iráca chachin nichaꞌëcaꞌhuanquëmasoꞌ anitotëranquëmaꞌ. Napoaton nichaꞌëranquëmaꞌ. Co aꞌna mamanshi tëranta ina pochin nininhuëꞌ. Canpita nani niꞌnamaco.

¹³ Coꞌhuara tahuëri yaꞌhuëyátëraponhuëꞌ, caso Yosëco yaꞌhuërahuë. Insosona anaꞌintaꞌhuasoꞌ yonquihuato, co insoari tëranta nichaꞌësarinhuëꞌ. Maꞌsona nisahuato co insonta yaꞌcopiarincohuëꞌ,” tënin.

¹⁴ Sinioro nichaꞌërinquëmaso naporin: Inaso Yosë, noyasáchin ninin niꞌton, Israirori chinotërin: “Canpita nichaꞌëcaꞌhuanquëmaso marëꞌ piyapiroꞌsa Papironiaꞌpaꞌ aꞌpaarahuë. Ina ninano yaꞌcoananënpita yaꞌipi iꞌsoataponaꞌ. Cartioroꞌsa inaquë yaꞌhuëpiso capa cancantapirinahuëꞌ, parisitapona huachi.

¹⁵ Caso Sinioroco. Ca nohuanton israiroꞌsanquëma yaꞌhuëramaꞌ. Caso Yosëco noyasáchin nicato huaꞌanëntëranquëmaꞌ,” tënin.

¹⁶ Siniorosoꞌ, marëquënta ira aꞌparëso pochin ninin. Paꞌpi anpo nipirinhuëꞌ, naporin.

¹⁷ Ina nohuanton panca sontaroꞌsa huënton ina paꞌtopi. Cahuarioroꞌsaꞌ, toronanoꞌsaꞌ, inapitarë chachin paꞌsapirinahuëꞌ, ataꞌhuantërin. Marë huancoanaiꞌ iiri imotohuachina, yaꞌipi taquiitopi. Nanparin tacopirinso pochin nipi.

¹⁸ Inari chachin piyapinënpita nontaton: “Ama huachi iráca naporahuësoꞌ yonquicosohuëꞌ.

¹⁹ Aꞌna huachi nasha nisarahuë. Ipora chachin naporahuësoꞌ niꞌsaramaꞌ. Naquëranchin inotëroquë ira aꞌpatë pochin nisarahuë. Co manta maꞌsha noyatërinquëhuëꞌ, iroꞌsa acoarahuë.

²⁰ Tanan maꞌsharoꞌsa noya niꞌsarinaco. Asaniroꞌsaꞌ, apistroroꞌsaꞌ, inapitanta noya niꞌsarinaco. Co manta maꞌsha noyatërinquëhuëꞌ, iroꞌsa acoarahuë. Piyapinëhuëpita huayonahuëso oꞌocaiso marëꞌ inapoarahuë niꞌton, noya niꞌsarinaco.

²¹ Piyapinëhuëpitasoꞌ, chinotiinacoso marëꞌ cari acorahuë.

²² Israiroꞌsanquëmaꞌ. Canpitaso Cacopo shinpitanquëma nipomarahuëꞌ, co chinotëramacohuëꞌ. Amitomaco tëhuënchinsoꞌ, aꞌporamaco.

²³ Co ohuicaroꞌsa ca marëꞌ tëpatoma yaꞌipi ahuiquitëramahuëꞌ. Aꞌnaquën maꞌsharoꞌsanta tëparahuatoma piꞌpian ahuiquitacaso nipirinhuëꞌ, co inaporamahuëꞌ. Co yonarin pochin nininso tëranta natananquëmahuëꞌ. Co inapita quëshiamacosoꞌ natanatënquëma apiranquëmahuëꞌ.

²⁴ Co pimo nashinan paꞌanahuatomaꞌ, quëshiamacosoꞌ natananquëmahuëꞌ. Noya nicaꞌhuanquëmaso marëꞌ co maꞌsharoꞌsa tëpatoma tomaquën ahuiquitamaso tërantaꞌ, natananquëmahuëꞌ. Co noyahuëꞌ nicatoma oshahuanamaso tëhuënchinsoꞌ, amiaquë huarëꞌ niꞌnahuë.

²⁵ Inapopiramahuëꞌ, Yosënëmaco niꞌto, paꞌpi co noyahuëꞌ ninamasopita, inquitaranquëmaꞌ. Co yanatëtatomahuëꞌ anoꞌhuitopiramacohuëꞌ, co huachi inapita yonquiarahuëꞌ.

²⁶ Tëhuëtëranquëma nipachinsoꞌ, anoyatahuaꞌ. Canpitanta shaꞌhuicoꞌ, tapona co manta tëhuëápiramahuëꞌ.

²⁷ Yaꞌnan shimashonëmaꞌ, aꞌchintërinquëmasopita, inapitanta tëhuëtatonaco oshahuanpi.

²⁸ Corto huaꞌanoꞌsantaꞌ, pëinëhuëquë sacatopi. Inapopirinahuëꞌ, co noyahuëꞌ nipiso marëꞌ nocanahuë. Napoaton israiroꞌsanquëmaso Cacopo quëran pipipiramahuëꞌ, inimiconëmapitari ataꞌhuantatënënquëmaꞌ, atapanaponënquëmaꞌ,” itërin.