Isaías 42 - Chayahuita (Shahui)

Sinioro piyapinën napoarinsoꞌ

¹ Sinioro naporin: “Natanco shaꞌhuichinquëmaꞌ. Piyapinëhuë nohuitocoꞌ. Cari chachin ina achiniapo. Huayonahuëso niꞌton, nóya niꞌnahuë. Ispiritonëhuë nani ayaꞌcoancantërahuë. Noya coisë pochin nicaton, yaꞌipi nacionoꞌsa noꞌtëquën shaꞌhuitapon.

² Nonpachin co chiníquën yaitosáponhuëꞌ. Co cachiroꞌsaquë iquianan quëran pënëntaponhuëꞌ.

³ Aꞌnaquën piquira yanopantërinso pochin co huachi nanitopirinahuëꞌ, inari achiniantarin. Nanparin yatacopirinso pochin Yosë yaaꞌpopirinahuëꞌ, catahuaantarin noya imaantacaisoꞌ. Noya coisë pochin yaꞌipi piyapiꞌsa noꞌtëquën shaꞌhuitapon.

⁴ Co amichináchinhuë sacataton, isoroꞌpaquë noya nicatona yaꞌhuëcaiso catahuatapon. Marë yonsanquë yaꞌhuëpisopitantaꞌ, inari aꞌchintacaso ninaponaꞌ,” tënin.

⁵ Siniorosoꞌ Yosë niꞌton, piꞌiroꞌtë acorin. Ina acoaton nëꞌmëtë pëi ótënëso pochin nitërin. Isoroꞌpantaꞌ, nani maꞌsha yaꞌhuërinsopitarë chachin acorin. Ina nohuanton piyapiꞌsa inaquë nanpipi. Inari chachin niinta acotërin.

⁶ Ina chachin piyapinën nontaton itaantapon: “Carinquën acoranquën nohuantërahuësoꞌ nicacaso marëꞌ. Imirahuë quëran sëꞌquëatë pochin, carinquën achiniaranquën. Quëmá quëran piyapiroꞌsa nichaꞌëcaꞌhuaso marëꞌ acoranquën. Inapitaroꞌco anoyatërahuëso ayonquiamaso marëꞌ acoranquën. Yaꞌipi nacionoꞌsa aꞌpintatë pochin noꞌtëquën anitotaran.

⁷ Somarayaroꞌsa anoyarayataran. Sopairi minsëaton huaꞌanëntërinsopita, paꞌpi tashinan pëiquë pochin ichiyaꞌhuërin. Inapitanta ocoiatë pochin nitacaso marëꞌ acoranquën,” itërin.

⁸ Ina quëran Sinioro taantarin: “Caso Sinioroco. Ina mini nininëhuë. Casáchin noya noyaco niꞌton, paꞌyatiinacoso yaꞌhuërin. Co mamanshiroꞌsasoꞌ noya nicatona natëcaiso yaꞌhuërinhuëꞌ.

⁹ Niꞌcoꞌ. Yaꞌnan shaꞌhuirahuësopitasoꞌ nani nanirin. Iporaso coꞌhuara naniyátërasohuëꞌ, nasha nininsopita yaꞌhuërëꞌ, shaꞌhuitaantaranquëmaꞌ,” tënin.

Yosëri nichaꞌërinso marëꞌ cantapisoꞌ

¹⁰ Nasha canta cantatomaꞌ, Sinioro chinotocoꞌ. Aquë noꞌparoꞌsaquë yaꞌhuëpisopita, ina chinochinaꞌ. Marë paꞌtopisopitantaꞌ, ina chinochinaꞌ. Inaquë maꞌsharoꞌsa yaꞌhuërinsopita, marë yonsanoꞌsaquë yaꞌhuëpisopita, yaꞌipi inapitantaꞌ, ina chinochinaꞌ.

¹¹ Ninanoroꞌsa inotëroquë yaꞌhuërinsopita, ina chinotatona capa cancanchinaꞌ. Quitaro huënton piyapiroꞌsantaꞌ, nëꞌmëtë pëinënaquë capa cancanchinaꞌ. Sira ninanoquë yaꞌhuëpisopitantaꞌ, capa cancantatona cantainaꞌ. Motopiroꞌsa huiꞌnimotëna quëran huarëꞌ chiníquën cantainaꞌ.

¹² “¡Ma noyacha Sinioroso paya!” taꞌtonaꞌ, Marë yonsanquë yaꞌhuëpisopita ina chinochinaꞌ.

¹³ Míso ahuëtonaꞌpi pochin Siniorosoꞌ paꞌsarin. Ahuëtonaꞌpi chiníquën ahuëtërinso pochin nisarin. “Yai,” tahuaton caniaritarin. Inaporahuaton inimiconënpita minsëarin.

¹⁴ Ina quëran Sinioro taantapon: “Huaꞌqui tahuëri pochin taꞌtërahuë. Noꞌhuípiro nipirinahuëꞌ, ahuantërahuë. Iporaso napoaporahuëꞌ, sanapi yahuaihuachina ‘huiyo,’ tosárinso pochin nisarahuë. ‘Sëco sëcoꞌ,’ taꞌton canotarinso pochin nisarahuë.

¹⁵ Motopiroꞌsaꞌ, motopiaꞌhuaroꞌsaꞌ, inapita ataꞌhuantarahuë. Yaꞌipi canincharárinso ayanisarahuë. Iroꞌsa yaꞌhuërinquë, yaniro atarantarahuë. Sonoroꞌsantaꞌ, ayanisarahuë.

¹⁶ Somarayaroꞌsanta ira co nohuitopisohuëꞌ, quëpatarahuë. Inapita marëꞌ tashinantërinsoꞌ, tahuëriya pochin atarantarahuë. Naꞌpiro iraroꞌsantaꞌ, siminto ira pochin atarantarahuë. Onpopionta inapochin acotarahuë.

¹⁷ Mamanshi chinotatonaꞌ: ‘Canpitaso yosënëhuënquëmaꞌ,’ topisopitaso nipirinhuëꞌ, tapanatona taꞌananpiponaco,” tënin.

Israiroꞌsa somaraya pochin cancantopisoꞌ

¹⁸ Israiroꞌsa pënënaton Siniorori napotërin: “Canpitaso nëꞌhuëya pochinquëma nipomarahuëꞌ, natancoꞌ. Canpitaso somaraya pochinquëma nipomarahuëꞌ, noya niꞌcoꞌ.

¹⁹ Israiroꞌsanquëmasoꞌ, piyapinëhuëpitanquëmaꞌ. Cari huayonanquëma nanamëhuë shaꞌhuicamaso marëꞌ. Carima huayonpiranquëmahuëꞌ, canpitaso aꞌnapita piyapiroꞌsa quëran soma somaraya pochin, nëꞌhuë nëꞌhuëya pochin niconamaꞌ.

²⁰ Naꞌcon catahuaranquëmaso nicapomarahuëꞌ, co yanatëramacohuëꞌ. Noya natantapomarahuëꞌ, shaꞌhuitëranquëmasopita co natëtëramahuëꞌ.

²¹ Sinioroso Yosë nichaꞌëtonaꞌpi niꞌton, aꞌchininso noya noya niꞌcaiso marëꞌ naꞌcon naꞌcon nohuantërëhuaso chachin aꞌchinin.

²² Napoaponahuë israiroꞌsasoꞌ, inimiconënpitari yaꞌipi huaꞌanëntopiso matopi. Aꞌnaquënsoꞌ, tëꞌhuanënaquë motopi naninoꞌsaquë naꞌpirápi. Aꞌnaquëontaꞌ, macatona tashinan pëiquëtopi pahuërëapitatona ocoicaiso marëꞌ aꞌnaquën inapotopirinahuëꞌ, co macari tëranta pahuërapitaton nichaꞌërinhuëꞌ,” itërin.

²³ Inapotopiranquëmahuëꞌ, ¡co inso Israiro tërantaꞌ, yanatëtërinhuëꞌ! Naporahuaton co inquëma tëranta maꞌsha onporama quëran cancan yonquicamaso nohuantëramahuëꞌ.

²⁴ Canpitaso Cacopo shinpitanquëmaꞌ, nani noyá nitotërama insosona nohuanton huëcapairahuatënënquëma minsërinënquëmasoꞌ. Inapotahuatënënquëma quiquirinënquëmasontaꞌ, ¡nani nitotëramaꞌ! ¡Sinioro mini nohuanton napotërinënquëmaꞌ! Co ina natëtomahuëꞌ oshahuanama niꞌton, napotërinquëmaꞌ. Onpopinsona nanpicasoꞌ nani pënënpirinquëmahuëꞌ, co ina pochin ninamaso marëhuëꞌ napotërinquëmaꞌ.

²⁵ Napoaton Sinioro noꞌhuitënquëma anaꞌintërinquëmaꞌ. Ina nohuanton inimicoroꞌsa ahuërinquëmaꞌ. Inapoaton pën quëran anaꞌintërëso pochin nitërinquëmaꞌ. Napotopirinquëmahuëꞌ, co naporo tëranta yonquiramahuëꞌ.