Isaías 41 - Chayahuita (Shahui)

Nisha nisha nacionoꞌsaquë yaꞌhuëpisopita pënëninsoꞌ

¹ Naquëranchin Sinioro taantarin: “Marë yonsanquë nacionoꞌsa yaꞌhuëramasopita, taꞌtatoma nontaranquëmasoꞌ natancoꞌ. Chiníquën cancantatoma huëco noanhuaꞌ. Chiníquën nanan yaꞌhuërin niꞌton, niyontonatëhua noanhuaꞌ.

² ¡Ca nohuanton piꞌi pipirinso parti aꞌnara copirno yaꞌconapon! Inasoꞌ, yaꞌipi inimiconënpita minsëapon. Cari catahuarahuë niꞌton, nisha nisha nacionoꞌsa huaꞌanëntapon. Nisha nisha copirnoroꞌsa camaiapon. Sahuëninën, pëꞌchinanën, inapita quëran ahuëaton, trico toꞌnorahuatëra piꞌpitën paꞌsarëso pochin nitapon.

³ Inimiconënpita imapachin, yanponatë pochin pacaton co oshataponhuëꞌ icantacasoꞌ.

⁴ Casáchin Yosëco niꞌto, inapita acorahuë. Ca nohuanton nani maꞌsha isoroꞌpaquë onpopi. Ca Sinioroco naporahuë. Coꞌhuara isoroꞌpaꞌ yaꞌhuëyátërasohuëꞌ, caꞌton yaꞌhuërahuë. Nani maꞌsha yaꞌhuërinsopita taꞌhuantopiriontaꞌ, caso yaꞌhuëápo.

⁵ Marë yonsanoꞌsaquë nacionoꞌsari Siro copirno sontaronënpitarë chachin huëꞌsarinso nicatonaꞌ, paꞌyanaponaꞌ. Isoroꞌpantaꞌ, yaꞌhuërinso nani chachin nacontarin. Nani huëꞌsapi, nani yaꞌcaritëriapi. Nisha nisha parti quëran huëcatona niyontonapi,” tënin.

⁶ Mamanshi ninaꞌpiroꞌsasoꞌ, maꞌsha ninaꞌpi capini nicatahuatonaꞌ, niachinicancanpi.

⁷ Nara patëtonaꞌpiri, nitapacaisoꞌ ninaꞌpi achinicancanin. Marticho quëran papincatonaꞌpintaꞌ, papiotiinanquë sacatonaꞌpi achinicancanin: “Nani noyá achinpitërëhuaꞌ,” itërin. Napotahuaton naoquë mamanshi noyá payontërin. Chiníquën huanicaso marëꞌ napotërin.

⁸ Piyapinënpitanpoaso napoaponahuëꞌ Sinioro chachin achinicancaninpoaꞌ: “Natanco israiroꞌsanquëmaꞌ: Canpitasoꞌ piyapinëhuë Cacopo itopisoꞌ shinpitanquëmaꞌ. Amiconëhuë Apraan itopisonta shimashonëmaꞌ.

⁹ Noꞌpaꞌ nanirinso parti quëran pochin ocoiranquëmaꞌ. Paꞌpi áquë yaꞌhuëapiramahuëꞌ, acoranquëma piyapinëhuëpita nicacamaso marëꞌ. Carinquëma huayonanquëma niꞌton, co aꞌporanquëmahuëꞌ.

¹⁰ Ama manta tëꞌhuacosohuëꞌ, caꞌtanaranquëmaꞌ. Ama paꞌyancosohuëꞌ. Caso Yosëco niꞌsáranquëmaꞌ. Carinquëma achiniatënquëma catahuaranquëmaꞌ. Chiníquën nanantato inchinanëhuë quëran sëꞌquëaranquëmaꞌ.

¹¹ Noꞌhuirinënquëmasopita atapanarahuë. Chinitërinënquëmasopitantaꞌ, ataꞌhuantarahuë.

¹² Inimicotërinënquëmasopita yonípatamaꞌ, co huachi quënanaramahuëꞌ. Quira nicatona yaminsëpirinënquëmahuëꞌ, ca nohuanton taꞌhuantaponaꞌ.

¹³ Caso Sinioroco niꞌto, Yosënëmaco. Imirahuë quëran sëꞌquëatë pochin quëpáranquëmaꞌ. Napoaton: ‘Ama tëꞌhuacosohuëꞌ, catahuaranquëmaꞌ,’ itaranquëmaꞌ.

¹⁴ Canpitaso israiroꞌsanquëmaꞌ, co naꞌashanquëmahuëꞌ. Chaꞌcho co chinirinsohuë pochin nipiramahuëꞌ, carima chachin catahuaranquëmaꞌ. Caso Yosëco noyasáchin ninahuë niꞌton, chinotëramaco. Carinquëma nichaꞌësaranquëmaꞌ.

¹⁵ Carima catahuaranquëma niꞌton, inimiconëmapita minsëaramaꞌ. Nasha toꞌnoratiinan cato panshin natëhuaninso pochin nisaramaꞌ. Motopiroꞌsa papatatë amocan atarantërëso pochin nitaramaꞌ. Motopiaꞌhuaroꞌsanta papatatomaꞌ, trico shaꞌhuëtë atarantatë pochin nitaramaꞌ.

¹⁶ Trico pintiarëso pochin nitohuatamaꞌ, panca ihuani quiquirinso pochin yaꞌipi inimiconëmapita ataꞌhuantapomaꞌ. Canpitaso napoaponahuëꞌ, Sinioro yonquiatoma capa cancantaramaꞌ. Naporahuatomaꞌ: ‘Ma noyacha Sinioro imarai paya,’ tosaramaꞌ. Caso noyasáchin ninahuë niꞌton, Israiro chinotërinco.

¹⁷ Popriroꞌsaꞌ, sano piyapiroꞌsaꞌ, inapitaso iꞌsha yonípirinahuëꞌ, co quënanpihuëꞌ. Paꞌpi yamorotonaꞌ, yaniconopirapi. Napopirinahuëꞌ, ca Sinioroco niꞌto, catahuarahuë. Ca Yosënëmaco niꞌto, inapitanta co aꞌpoapohuëꞌ.

¹⁸ Tomaroꞌtë motopiroꞌsaquë iroꞌsa ocoiarahuë. Motopianaroꞌsaquëntaꞌ, iꞌshanaroꞌsa ocoiarahuë. Inotëroroꞌsantaꞌ, sonoantëroꞌsa atarantarahuë. Yaniroroꞌsaquëntaꞌ, huinanoꞌsa acoarahuë.

¹⁹ Inotëroquë nonararoꞌsa shaꞌsarahuë. Acasiaroꞌsaꞌ, mirtoroꞌsaꞌ, oriporoꞌsaꞌ, inapitanta shaꞌsarahuë. Yaniroquëntaꞌ, siprisëroꞌsaꞌ, pino nararoꞌsaꞌ, apitoroꞌsaꞌ, inapita shaꞌsarahuë.

²⁰ Yaꞌipi piyapiroꞌsari nicatonaꞌ, yonquiinacoso marëꞌ napoarahuë: ‘Sinioro mini chiníquën nanantaton inapita acorin,’ taꞌcaiso marëꞌ napoarahuë. Caso Yosëco noyasáchin ninahuë niꞌton, Israiro chinotërinco,” tënin Sinioro.

Topinan quëran mamanshiroꞌsa chinotopisoꞌ

²¹ Israiroꞌsa copirnonënasoꞌ, Sinioro chachin. Inari mamanshiroꞌsa përaton: “Mamanshiroꞌsanquëmaꞌ, piyapinëhuëpitaroꞌco nihuëntonahuëquë, huëco canpitanta noncoꞌ. Natëaꞌhuainquëmaso marëꞌ canpitanta chiniatoma noncoꞌ.

²² Onpoatonsona iráca napopisopita naporinsoꞌ, aꞌna tahuërinta maꞌsona onpocaso yaꞌhuëarinsoꞌ, inapita shaꞌhuitocoi. Napohuatamaꞌ, yonquirápoi. Noꞌtëquën nanihuachin, natëarainquëma huachi.

²³ Ina piquëran maꞌsona onpoantacasonta shaꞌhuiantacoꞌ. Napohuatamaꞌ, ‘tëhuënchachin yosëroꞌsa antaꞌ,’ tosarai. Maꞌsha tëranta canpitanta nicoꞌ. Noya nininsohuë nipon, co noya nininsohuë nipon, nicoꞌ. Ina nicatoi paꞌyanaꞌhuaiso marëꞌ inapocoꞌ.

²⁴ Napotopiranquëmahuëꞌ, canpitaso co máquëmahuëꞌ. ¡Co manta nicacasoꞌ nanitaparamahuëꞌ! Chinotiinëmaso marëꞌ huayoninquëmasopitasoꞌ, apiroꞌsa niꞌton, napopi.

²⁵ Piꞌi pipirinso parti quëran aꞌnara copirno huëꞌsarin. Nininën quëran përápato huëꞌsarin. Huëꞌsahuaton nortitaquëchin canquipon. Tëshitonaꞌpi noꞌpaꞌ toꞌcarinso pochin, inaso copirnoroꞌsa nitëriapon. Co incari tëranta chinitaponhuëꞌ.

²⁶ ¡Co inso mamanshinquëma tërantaꞌ, coꞌhuara ina naniyátërasohuëꞌ shaꞌhuiramahuëꞌ! Insonquëma tëranta coꞌhuara ina naniyátërasohuëꞌ shaꞌhuirama naporini, ‘tëhuënchachinchi noꞌtëquën shaꞌhuipi paya,’ chitohuëꞌ. Co inquëma tëranta ina shaꞌhuiramahuëꞌ. Co insonta nonamasoꞌ nataninhuëꞌ.

²⁷ Ca mini tëhuënchinsoꞌ shaꞌhuirahuë. Aꞌnara nanan shaꞌhuinaꞌpi Quirosarinquë aꞌparahuë: ‘Co huaꞌquiya quëranhuë Quirosarin yaꞌhuëhuanoꞌsa quëpapiso huënantaponaꞌ,’ taꞌcaso marëꞌ aꞌparahuë.

²⁸ Napoato niꞌpirahuëꞌ, co aꞌna mamanshi tëranta yaꞌnorinhuëꞌ. Co inso tëranta maꞌsona noya nicacaisoꞌ shaꞌhuicaso yaꞌhuërinhuëꞌ. Natanahuësopitanta aꞌpaniinacosoꞌ, co insonta yaꞌhuërinhuëꞌ.

²⁹ ¡Yaꞌipi mamanshiroꞌsasoꞌ co máquënhuëꞌ! Co manta nicacaisoꞌ nanitopihuëꞌ. Capanantë mamanshiroꞌsa niconpi,” itërin.