Isaías 40 - Chayahuita (Shahui)

Quirosarinquë yaꞌhuëpisopita Siniorori achinicancaninsoꞌ

¹ Sinioro naporin: “Piyapinëhuëpita noya nontatomaꞌ, achinicancancoꞌ.

² Noyasha nontatoma piyapinëhuëpita catahuaco chiníquën cancanchinaꞌ. Sontaro sirihuitërinso pochin nininsoꞌ, nani nanirin. Tëhuëpiso marëꞌ anaꞌintërahuësoꞌ, nani pahuërëtatë pochin nipi. Oshanëna marëꞌ nani naꞌcon naꞌcon parisitopi,” tënin.

^3-4 Natanco, aꞌna quëmapi chiníquën shaꞌhuirarin: “Sinioro yaoꞌmarin niꞌton, ira tapacoꞌ. Inotëroquë ira yaꞌhuërinso ótëcoꞌ. Panënoꞌsa papatahuatomaꞌ, iconantërinsopita mëntarotocoꞌ. Naꞌpiroꞌsanta chiꞌhuincacoꞌ. Inapochachin canpitantaꞌ, cancanëma anoyatocoꞌ.

⁵ Naporoꞌ Sinioro chini chiníquën nanantërinsoꞌ aꞌnotarinpoaꞌ. Napohuachina yaꞌipi piyapiꞌsari niꞌsapi. Sinioro chachin naporin,” tapon.

⁶ Ina quëran napoantarin natanahuë: “Chiníquën shaꞌhuiquëꞌ,” tënin. Napohuachina cari natanahuë: “Maꞌta chiníquën shaꞌhuiꞌi,” itërahuë. “Yaꞌipi piyapiꞌsa panpatoro pochin niconpi. Iminquë yanco yaꞌhuërinso pochin co chinipihuëꞌ.

⁷ Panpatoroso pacahuatëra, aꞌnaroáchin yanirin. Yancoroꞌsanta aꞌnaroáchin ahuirin. Sinioro nohuanton inapita co chinirinsohuë pochin, piyapiꞌsantaꞌ, co chinipihuëꞌ.

⁸ Panpatorosoꞌ, yaniconin. Yancoroꞌsanta ahuiconin. Sinioro nanamënso napoaponahuëꞌ, yaꞌhuëmiatarin, tëquëꞌ,” itërinco.

Chiníquën nanantaton Sinioro oꞌmararinsoꞌ

⁹ Quirosarinquë yaꞌhuëramasopita noya nanan shaꞌhuicoꞌ. Motopi naniontarinquë nanpërahuatoma chiníquën shaꞌhuiontacoꞌ. Ama tëꞌhuatatomahuëꞌ yaꞌipi Cota huënton israiroꞌsa shaꞌhuitocoꞌ: “¡Maꞌtana Sinioro chinotërëhuasoꞌ!

¹⁰ Chiníquën nanantaton oꞌmararin. Yaꞌipi minsërahuaton, piyapinënpita isëquë chachin quëantarin. Nisharoꞌsari huaꞌanëntopirinahuëꞌ, inapita quëran nichaꞌërin.

¹¹ Huaꞌanëni ohuicanënpita aꞌpairin. Carniroaꞌhuaroꞌsaꞌ, iporahuaton quëparin. Nasha huaipisopita oshaquëran quëpaton aꞌcarin. Ina naporinso pochin canpoantaꞌ, Sinioro noya aꞌpaiarinpoaꞌ,” itocoꞌ.

Sinioro chini chiníquën nanantërinsoꞌ

¹² Siniorosoꞌ chini chiníquën nanantaton, marë pancaiꞌ nipirinhuëꞌ, aꞌna imiraquëáchin aꞌnirin. Piꞌiroꞌtënta cara cuartaíchin pochin aꞌnirin. Yaꞌipi isoroꞌpaquë amocan yaꞌhuërinsontaꞌ, pëꞌtënacaso marëꞌ aꞌnitiinanquë poꞌmorin. Motopiroꞌsaꞌ, motopiaꞌhuaroꞌsaꞌ, inapitanta pëꞌtënanquë pëꞌtënin.

^13-14 ¡Co insoari tëranta Siniorosoꞌ ótëarinhuëꞌ! ¡Co insoari tëranta maꞌsona nicacasoꞌ, ina aꞌchintërinhuëꞌ! ¡Co insoari tërantaꞌ, pënënaton yonquínahuan ina acorinhuëꞌ!

¹⁵ Nacionoꞌsa panca nipirinahuëꞌ, Sinioro marësoꞌ, aꞌna shiꞌtaíchin iꞌsha pochin niconpi. Marë yonsan noꞌparoꞌsaquë yaꞌhuëpisopitantaꞌ, amocan pochin co manta paꞌtopihuëꞌ.

¹⁶ Yaꞌipi Nipano tananquë tëranta maꞌsharoꞌsa ina marëꞌ tëpacaisoꞌ co naniarinhuëꞌ. Inaquë naꞌcon ihuë yaꞌhuëpirinhuëꞌ, co ina tëranta naniarinhuë Yosë marëꞌ ahuiquitacaisoꞌ.

¹⁷ Yaꞌipi nacionoꞌsanta ina marësoꞌ, co máquënoꞌsahuëꞌ. Co manta paꞌtërinsopitahuë pochin niconpi.

^18-19 ¡Co aꞌnaya tëranta Yosë pochin yaꞌhuërinhuëꞌ! ¡Co inso mamanshi tërantaꞌ, ina pochin yaꞌhuërinhuëꞌ! Mamanshisoꞌ, huaꞌna asoquirahuatona nipi. Nitapacaisoꞌ ninaꞌpiri oro quëran pashitërin. Inapotahuaton prata quëran catinaaꞌhuaroꞌsa apëꞌpëconotërin.

²⁰ “Nara quëran nii,” topachinantaꞌ, onëhuan nininso nara huayonin. Inaporahuaton noyá nitotërinso patëtonaꞌpi, yonirin. Inari noyá payontohuachina, co anotërinhuëꞌ.

²¹ ¡Canpitanta nitotërama niꞌsora! ¡Nani natanama shaꞌhuipisopita! ¡Yaꞌnan caniaritërin quëran huarëꞌ shaꞌhuipisopita yaꞌhuërin! ¡Isoroꞌpaꞌ Yosëri acorin quëran huarëꞌ nani nitotëramaꞌ!

²² Yosësoꞌ, piꞌiroꞌtë tahuirinso aipi huaꞌanëntarin. Inatohua quëran canpoasoꞌ sëquërë pochin niꞌninpoaꞌ. Naꞌicaso marëꞌ nëꞌmëtë ótënëso pochin piꞌiroꞌtënta ótënin. Nëꞌmëtë pëi ótënatë pochin nitërin.

²³ Ina nohuanton chiníquën nanantopisopitantaꞌ, co huachi máquënoꞌsahuëꞌ nisapi. Huaꞌanoꞌsanta ina nohuanton taꞌhuantapi.

²⁴ Ina marësoꞌ huaꞌanoꞌsantaꞌ, sharoꞌsa nasha pichopitopiso pochin niconpi. Ipora huarëꞌ itëaꞌhuain pipiarinso pochin, co manta chinipihuëꞌ. Siniorori pihuitë pochin nitohuachina, chiminatona ahuiánahuanapi. Panca ihuan paꞌpachina, trico shaꞌhuëtë quiquirinso pochin nitërin.

²⁵ Siniorosoꞌ noyasáchin nicaton naporin: “¿In pochinta niꞌnamaco? ¡Co ca pochin aꞌna yaꞌhuërinhuëꞌ!

²⁶ Inta nipachin piꞌiroꞌtë nëꞌpëricoꞌ. ¡Nani canpita cari acorahuësoꞌ nitotëramaꞌ! Yaꞌipi inaquë yaꞌhuërinsopita acoato, aꞌnaya aꞌnaya insëquësona nohuantërahuëquë acorahuë. Chini chiníquën nanantato nininëna quëran përapatora, yaꞌipi yaꞌnopi,” tënin.

²⁷ Israiroꞌsanquëmaꞌ, canpitaso Cacopo shinpitanquëmaꞌ. Canpitaso naporamaꞌ: “¡Sinioroso co huachi tahuërëtërinpoahuëꞌ! Parisitápirëhuahuëꞌ co nonininpoahuëꞌ,” tënamaꞌ. ¡Co ina pochin yonquicamaso yaꞌhuërinhuëꞌ!

²⁸ ¡Nani canpitaso nitotëramaꞌ! ¡Nani shaꞌhuitërinënquëmasoꞌ natanamaꞌ! Sinioronënpoasoꞌ, Yosë yaꞌhuëmiatërinsoꞌ. Inari isoroꞌpaꞌ, yaꞌipi yaꞌhuërinsopitarë chachin acorin. Co aso canotaton nëꞌca nëꞌcatosárinhuëꞌ. Nitotërinsontaꞌ, co naninahuanhuëꞌ.

²⁹ Canotopisopita, inari achiniantarin. Sanpatopisopitantaꞌ, ananitaantarin.

³⁰ Huiꞌnapiꞌsa niponaraihuëꞌ, canotatona nëꞌca nëꞌcatopi. Huaꞌhua huiꞌnapiꞌsantaꞌ, iꞌparahuatona anotopi.

³¹ “Sinioro mini catahuarinco,” topisopitaso nipirinhuëꞌ, nashaquëranchin chiniantarëso pochin nicaponaꞌ. Panca onian co sacai quëranhuë yanponinso pochin nicatonaꞌ, co oshataponahuë maꞌsona noya nicacaisoꞌ. Co canotonahuanhuë taꞌarëso pochin co sanpataponahuëꞌ. Co aminahuanhuë iratërëso pochin, Yosë imamiataponaꞌ.