Isaías 35 - Chayahuita (Shahui)

Quirosarinquë yaꞌhuëpisopita Yosë nohuanton huënantapisoꞌ

¹ Inotëroquëso co manta noyatatonhuëꞌ, sëtatë pochin noꞌpaꞌ nisárin. Napopirinhuëꞌ, Yosë nohuanton noyatohuachinaꞌ, capa ancantonaꞌpi pochin nisarin.

² Nirio yanco huësoatërinso pochin capa cancantomiachin. Yosë nohuanton Nipano tanan pochin nicapon. Carmiro motopi, Saron motopiana, inapita noyaroꞌparoꞌsaquë pochin nani maꞌsha shaꞌpachinaꞌ, noya noyatapon. Inapohuachinaꞌ, Yosë chini chiníquën nanantërinsoꞌ niꞌsapi. Noya noya nininsoꞌ yaꞌnopon huachi.

³ Sanpatërëso pochin cancantopisopita, achinicancancoꞌ. Canotërëso pochin cancantopisopitantaꞌ, catahuaco chiníquën cancanchinaꞌ.

⁴ Tëꞌhuanaꞌpiroꞌsanta shaꞌhuitatomaꞌ: “¡Chiníquën cancantocoꞌ! ¡Ama paꞌyancosohuëꞌ! Sinioro oꞌmararin nichaꞌëinquëmaso marëꞌ. Inimiconëmapitasoꞌ, noꞌtëquën iꞌhuërëtarin,” itocoꞌ.

^5-8 Naporoꞌ somarayaroꞌsa quënantaponaꞌ. Nëꞌhuëyaroꞌsanta natantaponaꞌ, nonaponaꞌ. Sonpacharoꞌsantaꞌ, yo pochin niiponaꞌ. Inotërosoꞌ, yaꞌshi yaꞌshin nipirinhuëꞌ, noꞌpa quëran notohuaroꞌ iꞌsharoꞌsa pipirantapon. Sonoroꞌsanta yaꞌhuëapon. Ipora asaniroꞌsa yaꞌhuërinquëntaꞌ, piquiraroroꞌsaꞌ, shiꞌshinamatëroꞌsaꞌ, inapita yaꞌhuëapon. Ina noꞌpanëmataëchin aꞌnara caritira pëntonapon. Co oshanëna inquihuachinahuëꞌ, co nanitapihuë inataëchin paꞌtacaisoꞌ. Naponin yonquipisopitantaꞌ, co inataquëchin paꞌsapihuëꞌ. Ina caritirasoꞌ: “Yosë caritiranën,” itaponaꞌ.

⁹ Inaquësoꞌ, co paꞌpiniroꞌsa yaꞌhuëaponhuëꞌ. Co huachi tëꞌhuatoro maꞌsharoꞌsa yaꞌhuëaponhuëꞌ. Inataëchin Yosëri nichaꞌërinsopita huënantaponaꞌ.

¹⁰ Siniorori nichaꞌërinsopita Quirosarinquë huënantaponaꞌ. Capa cancantatona cantarëꞌnachin huënantaponaꞌ. Noya yaꞌhuëatona capa cancantaponaꞌ. Co huachi iquitacaisoꞌ yaꞌhuëaponhuëꞌ. Co huachi naꞌnëcaisoꞌ yaꞌhuëaponhuëꞌ.