Isaías 33 - Chayahuita (Shahui)

Ahuëtopisopita Siniorori anaꞌintacaso shaꞌhuitërinsoꞌ

¹ Aꞌnaquëmasoꞌ, piyapiꞌsa ahuëatoma ataꞌhuantëramaꞌ. Aꞌnaquëmantaꞌ, nonpintatoma maꞌsha onpotëramaꞌ. Aꞌnapita inapotopiramahuëꞌ, co canpitaso inapotërinënquëmahuëꞌ. Ataꞌhuantërama piquëran, canpitanta ataꞌhuantaponënquëmaꞌ. Nonpintatoma piyapiꞌsa maꞌsha onpotërama piquëran, canpitanta inapotaponënquëmaꞌ.

² Quiyasoꞌ Sinioro quëmasáchin ninarainquën niꞌton, nosorocoi. Nani tashíramiachin catahuarancoi. Maꞌsha onporaiso tahuëriꞌsantaꞌ, nichaꞌëcoi.

³ Quëmari noꞌhuiransoꞌ natanatonaꞌ, nisha nisha piyapiroꞌsa taꞌapi. Quëma huaniranso nicatonaꞌ, nacionoꞌsanta yanquëapi.

⁴ Sëquërëꞌ paꞌpachina chitoro tashirotërinso pochin paꞌnin. Ina pochachin inimiconënapitanta yaꞌcontatonaꞌ, maꞌshanënapita paꞌton nininsoꞌ osërëtaponaꞌ.

⁵ Siniorosoꞌ piꞌiroꞌtëquë yaꞌhuërin. Inasoꞌ, chini chiníquën nanantërin. Ina nohuanton Quirosarinquë noꞌtëquën yonquiatona noyasáchin nisapi.

⁶ Ina nohuanton chachin inaquë noya yaꞌhuëaponaꞌ. Inaquë yaꞌhuëpisopitasoꞌ, yonquínahuan nicatonaꞌ, nitotonoꞌsa nicaponaꞌ. Inapoatona chaꞌëponaꞌ. Sinioro tëꞌhuatatona natëpi niꞌton, maꞌsha paꞌton nininsoꞌ quënanëso pochin nipi.

⁷ Cota huënton sontaroꞌsasoꞌ, chiníquën cancantopisopita nipirinahuëꞌ, catahuacaiso marëꞌ cachiroꞌsaquë chiníquën naꞌnërantapisoꞌ natancoꞌ. Anoyatacaiso marëꞌ aꞌpapisopitantaꞌ, co anoyatatonaraihuëꞌ, naꞌnërantapi.

⁸ Iraroꞌsa tanahuantápi. Co huachi paꞌtopihuëꞌ. Nicatahuacaiso marëꞌ anoyatopisopitantaꞌ, tapipi. Quënaninso noꞌtëquën shaꞌhuinaꞌpintaꞌ, nocanconpi. Itohuara capini maꞌsha nionpotopi.

⁹ Shaꞌpirinahuëꞌ, co nítërinhuë niꞌton, noꞌpa chachionta sëtatona aꞌmopiso pochin ninin. Nipano tanan quëran huarëꞌ ahuiánahuanaton tapaninso pochin ninin. Saron motopianantaꞌ, inotëro pochin niconin. Pasan parti, Carmiro motopi parti, inaquënta nararoꞌsa ahuiánahuanatonaꞌ, nohuamonotopi.

¹⁰ Sinioro chachin naporin: “Iporacha cantaꞌ, huanito maꞌsha nisarahuë. Chini chiníquën nanantërahuësoꞌ, noya noya ninahuësoꞌ, inapita aꞌnoarahuë.

¹¹ Canpitaso maꞌsha nicacaso yonquipiramahuëꞌ, yonquiramasopitasoꞌ, shinpitë yanimë pochin niꞌton, co manta chiniarinhuëꞌ. Pihuitë pochin nitatënquëmaꞌ, anaꞌintaranquëmaꞌ. Pëni ataꞌhuantërinso pochin nitarinquëmaꞌ.

¹² Nisha nisha ninanoroꞌsa huiquitatonaꞌ, huariano taranapi. Nahuan yanirinso pochin huëyaponaꞌ.

¹³ Aquë yaꞌhuëramasopita, naporahuëso natancoꞌ. Yaꞌcaria yaꞌhuëramasopitanta naporahuëso nicatomaꞌ: ‘Tëhuënchachin Siniorosoꞌ, chini chiníquën nanantërin,’ tocoꞌ,” tënin.

¹⁴ Quirosarin oshahuanoꞌsasoꞌ, paꞌyanapi. Yaꞌipi inpioroꞌsanta paꞌyanatonaꞌ: “Siniorosoꞌ, pën maꞌsha ahuiquitërinso pochin ninin. Yaꞌhuëmiatërinso pën pochin niꞌton, ¡Sinioro anaꞌintërinquësoꞌ, pën yaꞌhuëmiataton yaꞌipi ahuiquitërin! ¡Co inquënpoa tërantaꞌ, inaquë yaꞌhuëcaso nanichitërihuahuëꞌ!” tapona.

^15-16 Aꞌnaquën noꞌtëquënáchin yonquiatonaꞌ, noꞌtëquënáchin nonpi. Co piyapiꞌsa maꞌsha onpotatona maꞌhuanpihuëꞌ. Maꞌsha yanicanapirinahuë tërantaꞌ, noꞌtëquën anaꞌintopi. Tëpatacaso marëꞌ shaꞌhuitopirinahuëꞌ, co nohuantopihuëꞌ. Co noyahuëꞌ nicacaisoꞌ, co piꞌpian tëranta yonquipihuëꞌ. Napopisopitasoꞌ, noya yaꞌhuëaponaꞌ. Natëtëanaroꞌsaquë yaꞌcopiinamën acorinso pochin nisapi. Cosharoꞌ, oꞌoi, inapita co pahuantapihuëꞌ.

¹⁷ Naquëranchin copirno noya noya yaꞌnorinso niantapomaꞌ. Naporosoꞌ, noꞌpanënpoa nanirinso paꞌpi áquë nisarin.

¹⁸ Naporoꞌ inimicoroꞌsa tëꞌhuatëransoꞌ yonquiaton tapon: “Inimico huaꞌan, sontoronënpita nicacaso marëꞌ pichiyantërinpoasoꞌ, ¡co huachi yaꞌhuërinhuëꞌ! Inimico copirno marëꞌ pahuërëtacasoꞌ maꞌpatonaꞌpi huaꞌaontaꞌ, ¡co huachi yaꞌhuërinhuëꞌ! Toriroꞌsa pichirahuaton onposo sontaroꞌsa aꞌpacaiso marëꞌ tantiachantërinso huaꞌaontaꞌ, ¡co huachi yaꞌhuërinhuëꞌ!” tosaran.

¹⁹ Co panorohuanhuëꞌ inimicoroꞌsa huáncana yaꞌhuëpiranhuëꞌ. Co huachi inapita huáncana yaꞌhuëaponhuëꞌ. Inapitasoꞌ nonpachinarantaꞌ, co natanchináchinhuëꞌ nonconpi. Nisëꞌmorinso pochin nonpachinara co incari nataninhuëꞌ.

²⁰ Quirosarin ninano niꞌcoꞌ. Inaquë nani piꞌiquë pita naꞌhuëcaso marëꞌ paꞌnëhuaꞌ. Inaso ninanoꞌ, noyá acopinan yaꞌhuërin huachi. Sontaroꞌsa nëꞌmëtë pëinëna noya ótënpiso pochin ninin. Inapita achinicaiso marëꞌ noninënpitasoꞌ, co incari tëranta oshitëaponhuëꞌ. Naranënpita paꞌhuacopisontaꞌ, co incari tëranta opanaponhuëꞌ.

²¹ Inaquë Siniorosoꞌ, huënaráchin huënaráchin yaꞌnopon. Inaquëso naꞌa iroꞌsa yaꞌhuëapon. Pancairoꞌsanta yaꞌhuëapon. Inaquëso napoaponahuëꞌ, co onporo tëranta inimiconënpitari yaꞌcontaponahuëꞌ. Inapitasoꞌ chiníquën nancharoꞌsa yaꞌhuëtopi. Panca noꞌsoratëhuan nipirinahuëꞌ, co nanitapihuëꞌ.

^22-23 Siniorosoꞌ coisënënpoa niꞌton, maꞌpitaso nicacasoꞌ pënëninpoaꞌ. Inasoꞌ copirnonënpoa niꞌton, nichaꞌësarinpoaꞌ. Ina nohuanton inimicoroꞌsa nanchanënaquë pancara nara ahuanipisoꞌ, co chiniaponhuëꞌ. Sihuirinënpita ananahuatërin niꞌton, ihuani pihuicasoꞌ nëꞌmëtëntaꞌ, saꞌmoconin. Inapohuachina, inimicoroꞌsa maꞌshanëna osërëtarihuaꞌ. Somarayaroꞌsa quëran huarëꞌ maꞌsha macaponaꞌ. Sonpacharoꞌsanta maꞌsha mamiataponaꞌ.

²⁴ Quirosarinquë yaꞌhuëpisopitasoꞌ, Siniorori oshanëna inquitarin niꞌton, co huachi aꞌnaya tërantaꞌ, “caniorahuë casoꞌ,” tëcaponahuëꞌ.