Isaías 32 - Chayahuita (Shahui)

Noyasáchin nicaton huaꞌanëntërinsoꞌ

¹ Natanco aꞌna shaꞌhuitaantaꞌinquëmaꞌ: Aꞌnaraꞌ copirno yaꞌconaton, noyasáchin huaꞌanëntapon. Naporoꞌ huaꞌanoꞌsantaꞌ, noyasáchin nicatona huaꞌanëntaponaꞌ.

² Aꞌnaya aꞌnaya, ihuan naꞌpitiinan pochin paꞌpoyatapi. Maꞌsha onpocaso tahuëri nipachin, catahuatapi. Yaniroquë sharoꞌsa opotacaiso marëꞌ cashapiso pochin nisapi. Panca natëtë inotëroquë, piꞌi yaꞌcopirinso pochin nisapi.

³ Maꞌsona yanipachinaꞌ, noya niꞌsahuatona acoaponaꞌ. Maꞌsona shaꞌhuitahuachinantaꞌ, noya huëratëhuanatona natanaponaꞌ.

⁴ Maꞌsona nicacasoꞌ yonquihuachina, noya yonquiatona nicaponaꞌ. Maꞌsona nonpachinaꞌ, aꞌninquëchin nonsapi.

⁵ Co noyahuëꞌ nipisopita naporo tahuëriꞌsasoꞌ, “noya quëmapi,” co itaponahuëꞌ. Apiroꞌsantaꞌ, co huachi noya nicaponahuëꞌ.

⁶ Co noyahuëꞌ nipisopitasoꞌ, naponin nonaponaꞌ. Yonquinënaquë co noyahuëꞌ nicacaisoꞌ yonquiapi. Mantanta nicatonaꞌ, co Yosë pënëntërinsoꞌ natëpihuëꞌ. Sinioropita yanonpinapipitërapi. Tanapisopita co aꞌcapihuëꞌ. Yamoropisopitantaꞌ, co yaoꞌshitopihuëꞌ.

⁷ Apiroꞌsasoꞌ, monatacaiso marëꞌ maꞌpitaso nipi. Paꞌpi co noyahuëꞌ nicacaisoꞌ yonquirápi. Popriroꞌsa nonpintatona ihuapi. Noꞌtëquën catahuacaiso marëꞌ natantopirinahuëntaꞌ, co catahuapihuëꞌ.

⁸ Noya quëmapiso nipirinhuëꞌ, noya nicacasoꞌ yonquirin. Yonquirinsopita nipachina, co nisha nisha cancantarinhuëꞌ.

Siniorori piyapinënpita anaꞌintahuaton, noya acoantarinsoꞌ

⁹ Sanapiꞌsanquëmantaꞌ, pënëinquëma natanco: Canpitaso co manta yonquirëhuë pochin nicatomaꞌ: “Noya yaꞌhuëápoi,” toconamaꞌ. Napopiramahuëꞌ, carima shaꞌhuichinquëma natanco:

¹⁰ Iporaso mini noya yaꞌhuëapiramahuëꞌ, aꞌna piꞌi naꞌcon quëran pochin, paꞌyanatoma ropatapomaꞌ. Cosharoꞌ, oꞌoiꞌ, inapita pahuantaponquëma niꞌton, napoaramaꞌ.

¹¹ Co manta yonquiatoma yaꞌhuëápiramahuëꞌ, paꞌyanatoma ropatoco huachi. Noyasha nitaparamasoꞌ paꞌcoirahuatomaꞌ, sëtatoma aꞌmoramasoꞌ, aꞌmocoꞌ.

¹² Noyápiachin iminoꞌsaꞌ, noyaroꞌpaquë oparoroꞌsa yaꞌhuërinsoꞌ, inapita yonquiatoma naꞌnëcoꞌ.

¹³ Noꞌpanëma patarama niꞌton, pantatápon. Nahuanoꞌsaꞌ, nonitëraroꞌsaꞌ, inapitari imotapon. Pëiroꞌsa capa cancantëramaquë, pantatápon. Ninanonëmaquënta napopiramahuëꞌ, napoapon.

¹⁴ Noya pëiroꞌsa yaꞌhuëtërinquëmaso patapomaꞌ. Ninanoquënta notohuaroꞌ yaꞌhuëpiramahuëꞌ, tanahuantápon. Noyá niacorapiramasopitantaꞌ, patomiatarama huachi. Tanan moraroꞌsa inaquë noya yaꞌhuëaponaꞌ. Nisha nisha pëꞌtahuaroꞌsanta inaquë coshataponaꞌ.

¹⁵ Napoaponahuëꞌ, Siniorosoꞌ yaꞌipi nanitapaton, oꞌmantararin catahuainpoaso marëꞌ. Naporoꞌ inotëroquëntaꞌ, noyaroꞌpaquë pochin shaꞌtaponaꞌ. Noyaroꞌparoꞌsantaꞌ, aquëtë huarëꞌ noya noya nicapon.

¹⁶ Yaꞌipi piyapiroꞌsa noꞌtëquënáchin yonquiapi. Inapoatonaꞌ, yaꞌipi yaꞌhuërëhuaso noꞌpaquë noyasáchin nicaponaꞌ.

¹⁷ Noyasáchin nicatonaꞌ, sano yaꞌhuëaponaꞌ. “Sinioro catahuarincoi,” tëcatonaꞌ, noya yaꞌhuëmiataponaꞌ.

^18-20 Sano yaꞌhuëpiquë piyapinëhuëpita yaꞌhuëaponaꞌ. Noyá acopinan pëiroꞌsaquë, nóya yaꞌhuëaponaꞌ. Tananoꞌsa aꞌnëatona tiquipirinahuë tërantaꞌ, ninanonta minsërahuatona taparo nitopirinahuë tërantaꞌ, canpitaso noya yaꞌhuëatomaꞌ, capa cancantomiataramaꞌ. Shaꞌtëramaso oporapitamaso marëꞌ, notohuaroꞌ iꞌsha yaꞌhuëtaponquëmaꞌ. Pastontaꞌ, tororoꞌsaꞌ, moraroꞌsaꞌ, inapita capacaiso marëꞌ co pahuanaponhuëꞌ.