Isaías 31 - Chayahuita (Shahui)

Iquipitoroꞌsari catahuacaisoꞌ nohuantopisopita, maꞌsona onpocaiso yaꞌhuërinsoꞌ

¹ Iquipitoroꞌsari catahuacaiso marëꞌ paapapisopita, ¡maꞌhuántacha nisapi paya! “Cahuarioroꞌsaꞌ, naꞌa sontaroꞌsa toronanquë paꞌpisopita, notohuaroꞌ cahuarioquë paꞌpisopita sontaroꞌsaꞌ, inapita catahuaponacoi,” topisopitantaꞌ, ¡maꞌhuantacha nisapi paya! Co Siniorori catahuacaiso ninapihuëꞌ. Inasoꞌ noyasáchin ninin niꞌton, Israirori chinotërin. Napoaponahuëꞌ, co ina nontopihuëꞌ. Ina marëꞌ ¡maꞌhuantacha nisapi paya!

² Co chinotopiramahuëꞌ, inaso yonquínahuan niꞌton, maꞌsha onpotiinquëmasoꞌ nitotërin. Maꞌsona nicacasoꞌ shaꞌhuihuachina, ina inachachin nisarin. Inasoꞌ, co noyahuëꞌ nipisopita ataꞌhuantapon. Inapita catahuapisopitantaꞌ, inapotapon.

³ Iquipitoroꞌsasoꞌ, co yosëroꞌsahuëꞌ. Topinan piyapiroꞌsa inahuantaꞌ. Cahuarionënapitantaꞌ, topinan maꞌsharoꞌsaꞌ, co ispiritoroꞌsahuëꞌ. Siniorori anaꞌintacaso nanihuachin, paꞌpoyapisopita taꞌhuantaponaꞌ. Paꞌpoyatonaꞌpiroꞌsanta napoaponaꞌ. Yaꞌipi napopináchin quiraquë taꞌhuantaponaꞌ.

⁴ Isontaꞌ, Sinioro naporinso shaꞌhuitaantaꞌinquëmaꞌ: “Paꞌpiniꞌ ohuica mapachina, noꞌhuitárin. Napoasoꞌ, co aꞌpainaꞌpiroꞌsa tëranta tëꞌhuatërinhuëꞌ. Notohuaroꞌ niyontonatona noꞌhuipirinahuë tërantaꞌ, co mapinën patarinhuëꞌ. Inapochachin caso Sinioroco nisarahuë. Yaꞌipi nanitapato, Quirosarin paꞌpoyaꞌhuaso marëꞌ oꞌmarahuë.

⁵ Inairanta huaꞌhuinpita paꞌpoyaton, pëꞌpëtën aipi yanpo yanpónantarin. Inapochachin canta yaꞌipi nanitapato, Quirosarin aꞌpaiapo, paꞌpoyapo, nichaꞌëpo, inapotapo.

⁶ Israiroꞌsanquëmaꞌ. Canpitaso co natëtomacohuëꞌ, naꞌcon tëhuëtëramaco. Inapotopiramacohuëꞌ, huëco casáchin natëantaco.

^7-8 Mamanshiroꞌsa nicatoma oshahuanamaꞌ. Inapitasoꞌ, oro, prata, inapitaquëran ninamaꞌ. Inapita mosharamaso aꞌpohuatamaꞌ, naporo tahuëri chachin asiriaroꞌsa minsëaponaꞌ. Napoaponahuëꞌ, co piyapiꞌsari minsëarinhuëꞌ. Quira tëꞌhuatatona piyapinënpita taꞌaponaꞌ. Huiꞌnapinënapitanta ahuëtonapiroꞌsa nisapirinahuëꞌ, asacatacaiso marëꞌ macaponaꞌ.

⁹ Copirnonënantaꞌ, paꞌyanënquë taꞌapon. Huaꞌanoꞌsantaꞌ, pantiranëna taꞌananpiponaꞌ. Nani Quirosarinquë panca pën acorahuë. Inimiconëma anaꞌintaꞌhuaso marëꞌ naporahuë,” tënin.