Isaías 30 - Chayahuita (Shahui)

Sinioro co natëpiso marëhuëꞌ shaꞌhuitërinsoꞌ

¹ Siniorori israiroꞌsa pënënaton itapon: “Canpitaso huiꞌnahuëpita pochin nipiramahuëꞌ, iráca quëran huarëꞌ co yanatëramacohuëꞌ. Maꞌsona tëranta nicacasoꞌ yonquihuatamara, co chinotëramacohuëꞌ. Co carima ayonquipiranquëmahuëꞌ, maꞌpitaso yaninamaꞌ. Inapoatomaꞌ, naꞌcon naꞌcon oshahuanamaꞌ. Ina marëꞌ canpitasoꞌ, ¡maꞌhuantacha nisarama paya!

² Co natanapomaracohuëꞌ, manorahuatoma Iquipitoquë paꞌmaramaꞌ. Sanohuaninquë naꞌirëso pochachin canpitantaꞌ, huaraon paꞌpoyainquëmaso marëꞌ natanapoma paꞌmaramaꞌ.

³ Napopiramahuëꞌ, inaso co catahuainquëmaso nanitarinhuëꞌ. Sanohuaninquë naꞌirëso pochin nicamaso marëꞌ Iquipitoquë paꞌmaramasoꞌ, atapanaponquëmaꞌ.

⁴ Soan, Anisë, inapita ninanoroꞌsa quëran catahuainëmaso marëꞌ huaꞌanoꞌsa aꞌparamaꞌ.

⁵ Inapitaso napoaponahuëꞌ, co catahuainquëmaso nanitapihuëꞌ. Co maquë tëranta inapita catahuaponquëmahuëꞌ. Ina naꞌintarinquëma naꞌcon parisitaramaꞌ,” itërin.

^6-7 Pëꞌtahuaroꞌsanta huaꞌanoꞌsari quëpapisoꞌ yonquiato shaꞌhuitaranquëmaꞌ: Camiyoquë, moraquë, inaquëpita yaꞌmitëatona Iquipitoquë huaꞌanoꞌsa paꞌsapi. Naꞌcon paꞌtërinsopita tapapisoꞌ, inapitaquë aꞌmitëatona Iquipito huaꞌanoꞌsa quëpataponaꞌ. Niquipi inotërotaquëchin paꞌsapi. Paꞌpi huëhuëpiro noꞌpaꞌ paꞌtapi. Inaquësoꞌ, paꞌpiniroꞌsa përarantapi. Quëtëton yaꞌhuanoꞌsaꞌ, yanponaꞌpi yaꞌhuanoꞌsaꞌ, inapitanta yaꞌhuërin. Iquipitoroꞌsa co maquë nanitopirinahuëꞌ, inapita quëpataponaꞌ. Napoaton carisoꞌ, iquipitoroꞌsa apoyatërahuë: “Topinan quëran përanaꞌpi maꞌsha,” itërahuë.

⁸ Ina quëran Siniorosoꞌ camaiantatonco: “Iporasoꞌ nontë masahuaton, shaꞌhuitëranquënsopita ninshitëquëꞌ. Noya ninshitahuaton inaquë acoquëꞌ. Shaꞌhuirahuësopita nitotacaiso marëꞌ inaquë yaꞌhuëmiachin.

⁹ Isopitaso piyapinëhuëpita nipirinahuëꞌ, nisha nisha cancantatona co yanatërinacohuëꞌ. Co natantochináchinhuëꞌ cancantatonaꞌ, aꞌchintërahuësonta co nohuantopihuëꞌ natanacaisoꞌ.

^10-12 Ninotona quënanaꞌpiroꞌsa shaꞌhuitatomaꞌ: ‘Ama huaꞌnarëso pochin quënanatoma pënëncoisohuëꞌ,’ itonamaꞌ. Pënëntonaꞌpiroꞌsantaꞌ: ‘Ama Sinioro noꞌtëquën anitotërinquëmasopita, shaꞌhuitocoisohuëꞌ. Costaraisopita tëhuënchinsoꞌ, shaꞌhuitocoi. “Noya yaꞌhuëapoi,” taꞌtoi huëꞌërai pochin cancantëraisoꞌ, ama quëma huëꞌsahuaton ochinanatë pochin nitocoisohuëꞌ. Yaꞌhuincananpicoi quiyanta nohuantëraisoꞌ nisaꞌi. Sinioro natëramasoꞌ, aꞌpoco huachi. Co huachi nohuantëraihuëꞌ, Sinioro naporinso natanaꞌhuaisoꞌ. Inasoꞌ, noyasáchin ninin. Israirori chinotërin,’ toconamaꞌ. Napoaton inaso shaꞌhuitarinquëmaꞌ: ‘Canpitaso shaꞌhuitëranquëmasopita nocanatomaꞌ, ahuëtonoꞌsaꞌ, co noyahuëꞌ piyapiꞌsaꞌ, inapita catahuaimaso marëꞌ yoniramaꞌ.

¹³ Inapoatoma canpitasoꞌ, naꞌinamaꞌ. Inapa paira noꞌpapi quëran nipiso yanotontërinso pochin huëhuëpiro nisaramaꞌ. Inapohuachina co yonquiasëhuahuëꞌ, nohuatimapon.

¹⁴ Canpitanta maꞌsha onpocasoꞌ cantiihuachinquëmaꞌ, minë noyá yaꞌquirinso pochin nisaramaꞌ. Inapohuachina, co huachi pënaya macacaso marëꞌ tëranta yaꞌhuërinhuëꞌ. Co iꞌsha poso quëran macacaso tëranta nanitërëhuëꞌ,’ tënin Sinioro,” itërinco.

¹⁵ Naporahuaton, inaso taantarin: “Canpitaso nisha nisha cancantëramaꞌ. Huëco natëantatomaco sano cancantocoꞌ. Inapohuatamaꞌ, nichaꞌësaranquëmaꞌ. Sano cancantatoma casáchin chinotoco. Inapohuatamaꞌ, chiníquën nisaramaꞌ,” tënin Sinioro. Napopirinhuëꞌ, co canpitaso nohuantëramahuëꞌ.

¹⁶ Co yanatëtomarahuëꞌ naporamaꞌ: “Coꞌchi paya. Cahuarioquë tëhuënchinso yaꞌmitëahuatoi taꞌapoi,” toconamaꞌ. Naporama niꞌquëhuarëꞌ, taꞌacamasoꞌ yaꞌhuëapon. “Chiníquën taꞌanaꞌpi toronanoꞌsaquë taꞌapoi,” tomantaramaꞌ. Naporama niꞌquëhuarëꞌ, chini chiníquën taꞌanapiroꞌsa imaponquëmaꞌ.

¹⁷ Huarancanquëma nipomarahuëꞌ, aꞌna inimico sontaroíchin nitaꞌataponquëmaꞌ. Aꞌnatërápo inimico sontaroíchin niponaraihuëꞌ, yaꞌipinquëma nitaꞌatarinquëmaꞌ. Tomaroꞌtë motopiquë pantira naranën aꞌhuanipiso pochin nicama huarëꞌ napoaramaꞌ.

¹⁸ Inapotiimaso shaꞌhuitopirinquëmahuëꞌ, iporaso nosoroinquëmaso marëꞌ ninarinquëmaꞌ. Inasoꞌ, nosororinquëmasoꞌ paꞌpi yaaꞌnotërinquëmaꞌ. Siniorosoꞌ noyasáchin ninaꞌpi. Inaso Yosë niꞌton, inasáchin ninahuatëhuaꞌ, tëhuënchachin capa cancantarihuaꞌ.

^19-33 (-)