Isaías 28 - Chayahuita (Shahui)

Israiroꞌsa Yosëri anaꞌintacaso shaꞌhuitërinsoꞌ

^1-4 ¡Maꞌhuántacha Samaria ninanoquë yaꞌhuëpisopita nisapi paya! Inaquë Israiro copirno huaꞌanëntërin. Yanco ahuirin quëran yancotë nipiso pochin nipirinhuëꞌ, ina ninanosoꞌ, israiroꞌsari paꞌyatërin. Inapitasoꞌ noꞌpicaisoráchin cancantatonaꞌ, co noyahuëꞌ nipi. Noyaroꞌpaꞌ motopiana inapatontarinquë ina ninanoso acopirinahuëꞌ, yaꞌhuëhuanoꞌsasoꞌ, huino oꞌotona noꞌpicaisoráchin cancantopi. Napoaton inapita anaꞌintacaso marëꞌ Siniorori aꞌnara chiníquën quëmapi acorin. Inari ocai anotërinso pochin chiníquën nanantaton anoantarin. Panca ihuan maꞌsha quiquirinso pochin, ihuaiꞌ sharoꞌsa inquirinso pochin, pacon huëhuëpiro paꞌninso pochin, yaꞌipi atatahuaton toꞌpi toꞌpitarinso pochin, ina quëmapiri nitapon. Samariaquë noꞌpicaisoráchin cancantopisopita ataꞌhuantapon. Noyápiachin yancotë yaꞌhuëtohuachinara nipaꞌyatopiso pochin ina ninanosoꞌ israiroꞌsari paꞌyatopirinahuëꞌ, inapotapon. Iquira huayo yaꞌnan cayarinsopita quënanpachinara, co oshatapihuëꞌ macatona capacaisoꞌ. Inapochachin ina quëmapintaꞌ, canquihuachin co oshataponhuëꞌ ina ninano ataꞌhuantacasoꞌ.

⁵ Ina tahuëri nanihuachin, Sinioro yaꞌipi nanitaparinsoꞌ, paꞌyataponaꞌ. Caraya chaꞌëpisopitari, noya nicatona paꞌyataponaꞌ. Paꞌpi noya yancotë paꞌyatopiso pochin nitaponaꞌ.

⁶ Coisëroꞌsa nanan anoyatohuachinara, inari catahuapon noꞌtëquën shaꞌhuitacaisoꞌ. Sontaroꞌsa ninano paꞌpoyapisopitantaꞌ, chiníquën cancantatona paꞌpoyacaiso catahuapon.

⁷ Samariaroꞌsa huino oꞌotona pisan pisan toconpi. Máin paꞌyatatonaꞌ, inpan inpan toconpi. Inapita pochachin corto huaꞌanoꞌsaꞌ, pënëntonaꞌpiroꞌsaꞌ, inapitanta ina pochin oꞌotona noꞌpirápi. Huino oꞌosápatona naponin yonquipi. Inapitasoꞌ huaꞌnarëso pochin quënantacaiso nipirinhuëꞌ, maꞌsona nicacasoꞌ shaꞌhuicaiso nipirinhuëꞌ, noꞌpirahuëroꞌsa niꞌton, co Siniorori anitotërinhuëꞌ.

⁸ Oꞌopiquë, imopisoꞌ saianahuanin. Co insëquë tëranta imopiso pahuaninhuëꞌ.

^9-10 Canta yonquiatonaco napopi: “¡Isaiasëntachi yaaꞌchintërinpoaꞌ! ¡Sinioro anitotërincoso aꞌchinchinquëmaꞌ! taꞌton atosárin. Huaꞌhuaroꞌsa quirica nontacaso nitotahuachinara: ‘ta ta tata të të tëtë ti ti titi to to toto,’ tosápi. Inapita pochin cancantatonpoa napotápirinpoahuëꞌ, ¡macari natanapon!” topi.

¹¹ Noyapaꞌ. Naporama niꞌquëhuarëꞌ, inimiconëma quëran Sinioro nontarinquëmaꞌ. Nisha piyapiroꞌsa huëcapairahuatënëmaꞌ, nisha nananquë nontarinquëmaꞌ. Maꞌsha onpotarinquëmasoꞌ nicatomaꞌ, naporo huarëꞌ Sinioro yaaꞌchintërinquëmasoꞌ, nitotarama huachi.

¹² Nani iráca ina shaꞌhuitërinquëmaꞌ: “Cariáchin nanitërahuë asanocancanaꞌhuanquëmasoꞌ. Canotërëso pochin cancantohuatamaꞌ, caquë huëcatomaꞌ, chinotoco,” itërinquëmaꞌ. Napotopirinquëmahuëꞌ, co canpitaso natëramahuëꞌ.

¹³ Napoaton huaꞌhuaroꞌsa quirica aꞌchintohuachinara nontopiso pochin Sinioro nontarinquëmaꞌ. Naporarama quëran aquë aquëtë pochin nisaramaꞌ. Noya paꞌsarama quëran ninantërarahuatona anotopiso pochin nisaramaꞌ. Iꞌparahuatoma anotapomaꞌ. Inapoatoma chiminapomaꞌ. Huënsonquë inaira mapiso pochin nitohuachinquëmaꞌ, co pipiaramahuëꞌ.

Quirosarinquë yaꞌhuëpisopitanta pënëninsoꞌ

^14-15 Quirosarinquë huaꞌan yaꞌconatoma camaitëramasopitantaꞌ, Sinioro naporinso natancoꞌ: “Canpitaso co panorohuanhuëꞌ camaitëramaꞌ. Nonpatamara naporamaꞌ: ‘Sinioro piyapiroꞌsa anaꞌintohuachin, co quiyasoꞌ chiminaꞌhuaiso yaꞌhuërinhuëꞌ. Nani chimirinëꞌcoi anoyatërai. Aꞌnapitaso parisitaponaꞌ, quiyasoꞌ chaꞌësarai. Piyapiꞌsa co noyahuëꞌ ninaisoꞌ shaꞌhuirapihuachinacoi, nonpintahuatoi chinitarai. Inapohuatoi, aꞌnaroáchin natëarinacoi. Inapohuatoi co insonta minsëarincoihuëꞌ,’ toconamaꞌ,” tënin.

¹⁶ Napoaton Sinioro naporin: “Niꞌquëꞌ. Sionquë aꞌnara naꞌpi acoarahuë. Noyá huayonpinan nisahuaton, paꞌpi paꞌton. Inari pëi achiniarin. Ina, pëi simintonën pochin nisarin. Insosona natëhuachinco, co tëꞌhuarëꞌna yaꞌhuëaponhuëꞌ.

¹⁷ Ina pëi nipato, huanirinso ótëinamën pochin noyasáchin nicacaisoꞌ yaꞌhuëapon. Noꞌtëquënáchin nicacaisontaꞌ, tahuaninso tantiatiinan pochin nisarin. Nonpinatoma yachaꞌëramasopitaso nipirinhuëꞌ, panca ihuan paaton pëi atatërinso pochin, paquiiꞌ mëntacontarahuaton quiquitërinso pochin Asiria copirno ataꞌhuantarinquëmaꞌ,” tënin.

^18-29 (-)