Isaías 11 - Chayahuita (Shahui)

Yosëri acorinso huaꞌanëntohuachin, noya yaꞌhuëcaiso yaꞌhuëarinsoꞌ

¹ Nara motoꞌ itëquën quëran pichopitahuaton papotaantarinso pochin aꞌna tahuëri Quisi shiin copirno yaꞌconaton, huaꞌanëntapon.

² Sinioro ispiritonëni yaꞌcoancantomiatapon. Inari yonquínahuan nicacasoꞌ quëtapon. Nitopënëntahuaton, chiníquën nanantapon. Sinioro noya nohuitaton, natëpon.

³ Co papinanquë piyapiꞌsa maꞌsona onpotacasoꞌ shaꞌhuiponhuëꞌ. Co nanan natëtaton piyapiꞌsa maꞌsona onpotacasoꞌ shaꞌhuiponhuëꞌ.

⁴ Noya coisë pochin, sanpatopisopita maꞌsona onpotacasoꞌ shaꞌhuitapon. Popriyatopisopitanta paꞌpoyaton, catahuapon. Noꞌhuitërayaroꞌsasoꞌ, topinan noncharapirinhuëꞌ anaꞌintapon. Co noyahuëꞌ nipisopitantaꞌ, pihuitëꞌ aꞌparëso pochin ataꞌhuantapon.

⁵ Piyapi nani tahuëri aꞌmoanaton paꞌninso pochin, noyasáchin nicaton noꞌtëquënáchin nonsarin.

⁶ Ina tahuëri nanihuachin: Tanan niꞌniraroꞌsanta co huachi carniroaꞌhuaroꞌsa macatonahuëꞌ, napopináchin yaꞌhuëaponaꞌ. Paꞌpiniroꞌsanta chipoaꞌhuaroꞌsarëꞌ, napopináchin chinotaponaꞌ. Toroaꞌhuanta paꞌpiniaꞌhuarëꞌ, napopináchin yaꞌhuëaton soꞌsopon. Aꞌna huaꞌhuashari inapita quëpapon.

⁷ Ohuacanta tocani payarëꞌ, napopináchin pasto caꞌsarin. Huaꞌhuinapitantaꞌ, napopináchin quëhuënaponaꞌ. Paꞌpiniꞌ mashonta tororëꞌ, napopináchin pasto capon.

⁸ Huaꞌhuaroꞌsantaꞌ, quëtëton yaꞌhuanoꞌsarëꞌ yaꞌnipiponaꞌ. Ina yaꞌhuërinquë icarahuachinantaꞌ, co manta onpotarinhuëꞌ.

⁹ Yaꞌipi huaꞌanëntërinquë noyasáchin nicaponaꞌ. Co insonta aꞌnapita maꞌsha onpotaponhuëꞌ. Marë iꞌshari mëntaitërinso pochachin yaꞌipiroꞌpaquënta Sinioro nohuitapi.

^10-16 (-)