Isaías 1 - Chayahuita (Shahui)

Cota huënton israiroꞌsa oshahuanacaisoráchin cancantopisoꞌ

¹ Osiasë copirnoꞌton Cota huëntonquë huaꞌanëntasoꞌ, Isaiasë pënëntacasoꞌ caniaritërin. Ina quëran Cotamo yaꞌhuërëꞌ, huaꞌanëntaantarin. Ina piquëran Acasontaꞌ, huaꞌanëntaantarin. Ina quëran, Isiquiasënta huaꞌanëntaantarin. Inapita copirnoroꞌsa Cota huëntonquë huaꞌanëntasoiꞌ, Isaiasë pënëntërin. Inasoꞌ, Amosë huiꞌnin. Yosëri huaꞌnarëso pochin aꞌnotaton, Cota huënton israiroꞌsaꞌ, Quirosarin ninanoꞌ, inapita maꞌsona onpocaisoꞌ anitotërin.

² Piꞌiroꞌtëquë, isoroꞌpaquë, inaquëpita yaꞌhuëramasoꞌ, yaꞌipinquëma Sinioro noninso natancoꞌ: “Huiꞌnahuëpita huaꞌhuishin quëran huarëꞌ asoꞌsorahuë. Inapotopirahuëꞌ, inahuaso co natërinacohuëꞌ.

³ Torosoꞌ, huaꞌanën nohuitërin. Morantaꞌ, huaꞌanëni pëi acotërinsoꞌ, nohuitërin. Israiroꞌsaso piyapinëhuëpita nipirinahuëꞌ, co nohuitërinacohuëꞌ. Co nohuitatonacohuëꞌ, co manta yonquipisohuë pochin niconpi.

⁴ Oshahuanacasoráchin cancantëramasopita, ¡maꞌhuantacha nisarama paya! Canpitaso paꞌpi co noyahuëꞌ ninamaꞌ. Co noyahuëꞌ nipisopita huiꞌnarinquëmaꞌ. Nitapicancamiatëramaꞌ. Aꞌporamaco. Naporamaꞌ. Caso Yosëco noyasáchin ninahuë niꞌton, Israiro chinotërinco. Inaco nipirahuëꞌ, aꞌporamaco.

^5-6 Canpitaso co natantochináchinhuëꞌ cancantëramasoꞌ, co yaaꞌporamahuëꞌ. Ina marëꞌ noꞌhuitënquëma anaꞌintëranquëmaꞌ. Co máquëma tëranta noyatërinso yaꞌhuërinhuëꞌ. Motëma quëran nantëranëmaquë huarëꞌ, piꞌniosáchin pochin, pomato pomato toconinso pochin, taꞌtaráchin niconinso pochin, niconamaꞌ. Naporamasoꞌ, co inso tëranta nonëninquëmahuëꞌ. Co tomaquë tëranta pashitatënënquëma asanorinënquëmahuëꞌ. Inapoatoma co huachi manta chiniramahuëꞌ.

⁷ Yaꞌipi yaꞌhuëramaso noꞌpaꞌ, tananhuantárin quëparitërin. Ninanoroꞌsantaꞌ, huiquitërantarin. Inimiconëmapitanta niꞌtonëmaquë chachin shaꞌtëramasopita nitërinsoꞌ, capitërinënquëmaꞌ. Sotoma ninano ataꞌhuantopiso pochin yaꞌipi yaꞌhuëramasoꞌ taꞌhuantërin.

⁸ Quirosarin ninanoáchin quëparitërin. Oparo aꞌpaicaiso marëꞌ ina huancánachin pëi acopiso pochin quëparitërin. Pipinoroꞌ huáncana naꞌicaiso marëꞌ pëi acopiso pochin ninin. Inimicoroꞌsari ninano tancapitërinso pochin inaora quëparitërin,” tënin Sinioro.

⁹ Siniorosoꞌ yaꞌipi nanitapaton, carayanpoa quëparitahuaso marëꞌ aꞌpairinpoaꞌ. Coꞌsoꞌ inaporinhuë naporini, Sotoma, Comora, inapita ninanoroꞌsa pochin, nani taꞌhuanchitërihuahuëꞌ.

Yosë chinotopirinahuëꞌ, topinan quëran napopisoꞌ

^10-11 Quirosarin huaꞌanoꞌsanquëmaꞌ. Canpitasoꞌ sotomaroꞌsa huaꞌanëna pochin niconamaꞌ. Comoraroꞌsa pochin nipiramahuëꞌ, Sinioro pënëntërinsoꞌ noya natanco: “Ama huachi maꞌsharoꞌsa ca marëꞌ quëcosohuëꞌ. Naꞌa carniroroꞌsa oshanëma marëꞌ yaꞌipi ahuiquitaramaꞌ. Toroaꞌhuaroꞌsanta tomaquën ahuiquitaramaꞌ. Tororoꞌsaꞌ, ohuicaroꞌsaꞌ, chiporoꞌsaꞌ, inapita huënainënantaꞌ, co huachi noya niꞌnahuëꞌ.

¹² Chinotamacoso marëꞌ canpitasoꞌ, pëinëhuëquë huëꞌnamaꞌ. Napohuatamara, canpitaora nohuanton huëꞌnamaꞌ. ¡Pëinëhuë iꞌiratëroꞌsa toꞌquiatoma anëꞌhuëtamasoꞌ, co carima camairanquëmahuëꞌ!

^13-14 Co noyahuëꞌ nisápomarahuëꞌ, maꞌsha tëpatoma chinotamacoso marëꞌ yáquënamaꞌ. Inapita quënamasoꞌ, co manta paꞌtërinhuë pochin niꞌnahuëꞌ. Inapita aꞌpëhuatamara conainën pantarinsoꞌ, co huachi ahuantërahuëꞌ. Nani sahuato, nani yoquiaꞌhuaraiquë, niyontonatoma chinotëramaco. Co noyahuëꞌ cancantërama niꞌton, niyontonpiramahuëꞌ amiranquëmaꞌ. Amitënquëmaꞌ, co huachi ahuantëranquëmahuëꞌ.

¹⁵ Nontamacoso marëꞌ anquihuatamara, co manta yaniꞌnanquëmahuëꞌ. Naꞌaro nontopiramacohuëꞌ, co natanaranquëmahuëꞌ. Naꞌcon tëpatërama niꞌton, huënaiꞌ imirasáchin pochin niꞌnanquëmaꞌ.

¹⁶ Amarëso pochin nicatomaꞌ, ¡ama huachi oshahuancosohuëꞌ! ¡Co noyahuëꞌ ninamasopita aꞌpoco huachi!

¹⁷ ¡Noya nicacamasoꞌ nitotocoꞌ! Aꞌnapita napopináchin nicacamaso marëꞌ cancantocoꞌ. Saꞌahuaroꞌsaꞌ, quëyoronoꞌsaꞌ, inapita catahuatoma paꞌpoyacoꞌ.

¹⁸ Huëco paꞌahua nonatëhua anoyatahuaꞌ. Quëhuanën quëran aꞌshitërëso pochin naꞌcon oshahuanpiramahuëꞌ, inquitaranquëmaꞌ. Ina inquitatënquëmaꞌ, ocai, piꞌshiro, inapita huiritërinso pochin, anoyacancantaranquëmaꞌ.

¹⁹ Natëhuatamaco, sharoꞌsa noya noyatërinsoꞌ caꞌsaramaꞌ.

²⁰ Napoaponahuëꞌ, co natantochináchinhuëꞌ cancantápatamaꞌ, quiraquë taꞌhuantapomaꞌ,” tënin. Sinioro chachin ina pochin shaꞌhuitërinpoaꞌ.

Quirosarinquë yaꞌhuëpisopita anaꞌintahuaton, noya acoantarinsoꞌ

²¹ Naquëranchin Sinioro pënëninquëmasoꞌ natancoꞌ: “Iráca Quirosarinquë yaꞌhuëpisopita casáchin cancantërinaco. ¡Iporaso nipirinhuëꞌ, monshihuantë sanapi pochin cancantëramaꞌ! Iracasoꞌ, yaꞌipi inaquë yaꞌhuëpisopita noyasáchin nipi. Noꞌtëquënáchin yonquipi. Inapopirinahuëꞌ, iporasoꞌ, tëpatoroꞌsaráchin pochin yaꞌhuëramaꞌ.

²² Pratasoꞌ paꞌton. Inapochachin canpitanta nipiramahuëꞌ. Iporasoꞌ ina chiꞌchironën pochin niconamaꞌ. Noya huino pochin noya nipiramahuëꞌ, iporasoꞌ, iꞌsha pochin niconamaꞌ.

²³ Huaꞌanoꞌsanëma quëran huarëꞌ co natantochináchinhuëꞌ cancantopi. Ihuatëroꞌsarëꞌ nipayapi. Pahuërëhuachinara, co huachi noꞌtëquën anaꞌintopihuëꞌ. Maꞌsha topinan quëtápaisoꞌ nohuantoonpi. Saꞌahuaroꞌsaꞌ, quëyoronoꞌsaꞌ, inapita maꞌsha onpotohuachinara, co paꞌpoyapihuëꞌ.

²⁴ Napoaton ca Sinioroco yaꞌipi nanitapato naporahuë: ‘Caso yaꞌipi nanitaparahuë. Co insonta Israiro nacionquë ca pochin yaꞌhuërinhuëꞌ. ¡Copi toco huachi! Inimicotërinacosopitasoꞌ, noꞌtëquën anaꞌintarahuë. ¡Iꞌhuërëtaꞌhuaso yaꞌhuërin!

²⁵ Naquëranchin maꞌsha onpotaantaꞌhuanquënso yaꞌhuërin. Amoro ahuiquitomiatërëso pochin amirotochináchin ninamasoꞌ, inquitaranquëmaꞌ.

²⁶ Ca nohuanton iráca pochachin coisëroꞌsaꞌ, yaꞌhuëtaantarinquëmaꞌ. Ayonquinaꞌpiroꞌsantaꞌ, yaꞌhuëantapon. Noya acoantahuatënquëmaꞌ: “Noyasáchin nipiquë ninanoꞌ,” itaantaponëmaꞌ. “Noꞌtëquënáchin natëtopiquë ninanoꞌ,” itaponëma antaꞌ.

²⁷ Quirosarinquë yaꞌhuëpisopita casáchin tahuërëtaantahuachinaco, nichaꞌësarahuë. Caso noyaco niꞌto, napotarahuë.

²⁸ Co natëtochináchinhuëꞌ cancantopisopita, oshahuanoꞌsaꞌ, inapitasoꞌ, tëshi paꞌquirëso pochin nitarahuë. Aꞌporinacosopitantaꞌ, chiminaponaꞌ.

²⁹ Canpitasoꞌ, insina narasoroꞌsaquë mamanshiroꞌsa mosharamaꞌ. Yancororoꞌsaquëntaꞌ, inaporamaꞌ. Inapita naꞌcon paꞌyatopiramahuëꞌ, atapanaponquëmaꞌ.

³⁰ Insina nara nohuamëtërinso pochin canpitanta nisaramaꞌ. Yancoroꞌ iꞌshari pahuantërinso pochin nisaramaꞌ.

³¹ Chiníquënoꞌsanquëma nipomarahuëꞌ, shinpitë yanimë pochin nisaramaꞌ. Co noyahuëꞌ ninamasopitasoꞌ, pën noꞌhuitërinso pochin nisarin. Huëchinpitohuachina, naporo chachin huëyapoma huachi. Co incari tëranta atacopitaponhuëꞌ,’ tënahuë,” tënin.