Hechos 8 - Chayahuita (Shahui)

¹ Istipan tëpasoiꞌ, Saonontaꞌ: “Tëpacoꞌ,” tënin. Naporo quëran huarëꞌ cotio huaꞌanoꞌsaꞌ noꞌhuitatonaꞌ, Quisoso imapisopita chiníquën aparisitopi. Quirosarinquë napopi. Aparisitatonaꞌ, ayanquëëpi. Yaꞌipi Cotia parti, Samaria parti, inaquëpita yanquëëpi. Caꞌtanoꞌsaráchin co paꞌpihuëꞌ.

Saonori aparisitërinsoꞌ

² Nani Istipan tëpahuachinara, Yosë chinotopisopitari paꞌpitopi. Sëtatonaꞌ, naꞌnërápi.

³ Saonoso nipirinhuëꞌ Quisoso imapisopita aparisitaton, pëinënaquë huarëꞌ yaꞌconaꞌpiarin. Quëmapiꞌsaꞌ masahuaton, ohuararahuaton, tashinan pëiquë poꞌmorin. Sanapiꞌsantaꞌ inaquë poꞌmorin.

Samaria parti noya nanan shaꞌhuirinsoꞌ

⁴ Aꞌnaquënso nipirinhuëꞌ yanquëërahuatonaꞌ, paꞌsapi. Yosë nanamën shaꞌhuiraꞌpiapi.

⁵ Pinipisoꞌ Samariaquë paꞌnin. Inaquë Quisocristo naporinsoꞌ shaꞌhuirarin: “Yosëri aꞌpaimarinsoꞌ imacoꞌ canpitantaꞌ,” itarin.

⁶ Naꞌa piyapiꞌsaꞌ niyontonahuatonaꞌ, natanapi. Nóya natanpi. Aꞌchintohuachina, caniaꞌpiroꞌsantaꞌ quëpi. Yosë nohuanton, Pinipiri anoyatërin. Niꞌsahuatonaꞌ, aquë aquëtëꞌ yaimapi. “Yosëri catahuarin niꞌton, aꞌnaroáchin anoyatërin,” topi.

⁷ Aꞌnaquënsoꞌ sopairi yaꞌcoancantërin niꞌton huaꞌyantopirinahuëꞌ, Pinipiri shaꞌhuitohuachina, sopairoꞌsaꞌ chiníquën nonsahuatonaꞌ, pipiraꞌpiapi. Aꞌnaquëontaꞌ caniopi quëran co huachi nanitopihuëꞌ iratacaisoꞌ, quëhuënápi. Aꞌnapitasoꞌ apia niꞌtonaꞌ, sonpapi. Inapitantaꞌ huëꞌpachinara, anoyatërin.

⁸ Napoaton inaquë yaꞌhuëpisopitasoꞌ, capa cancantopi.

⁹ Inaquë aꞌna quëmapi Simon itopisoꞌ yaꞌhuërin. Coꞌhuara Pinipi huëꞌshatërasohuëꞌ, naꞌcon pënotërin. Nani huaꞌquiꞌ piyapiꞌsaꞌ nonpintërin. “Casoꞌ chiníquën nanantërahuë,” tëninso marëꞌ paꞌyatopi.

¹⁰ Yaꞌipi Samariaquë yaꞌhuëpisopitari natëpi. Yaꞌipi piyapiꞌsaꞌ, huaꞌanoꞌsa quëran huarëꞌ natëpi. “Iso quëmapi Yosë pochin ninin. Nani maꞌsha nanitaparin,” topi.

¹¹ Huaꞌquiꞌ pënotaton, piyapiꞌsaꞌ nonpintërin. Napoaton natëpi.

¹² Nipirinhuëꞌ, Pinipiri noya nanan shaꞌhuitohuachina, noya natanpi. “Yosë yahuaꞌanëntërinpoaꞌ. Quisocristo inápa quëran aꞌpaimarin nichaꞌëinpoaso marëꞌ. Ina imacoꞌ canpitantaꞌ,” itohuachina, natëpi. Ina quëran quëmapiꞌsaꞌ sanapiꞌsarë chachin aporihuanpi.

¹³ Simontaꞌ natëpirinhuëꞌ. Aporihuanahuaton, Pinipi caꞌtanin. Pinipiri caniaꞌpiroꞌsaꞌ aꞌnaroáchin anoyatërin. Nani maꞌsha nanitaparin. “Tëhuënchachin Yosëri catahuarin,” topi. Ina niꞌsahuaton, Simon paꞌyanin. “Maꞌpitacha nanitaparin paya,” tënin, yonquiaton.

¹⁴ Naporoꞌ caꞌtanoꞌsaꞌ Quirosarinquë yaꞌhuëpi. “Samariaquë yaꞌhuëpisopitantaꞌ Yosë nanamën natëpi huachi,” topi. Natantahuatonaꞌ, Pitro, Coansha cato chachin aꞌpapi nicaponaꞌ.

^15-16 Naꞌa yaꞌhuëhuanoꞌsaꞌ nani aporihuanpi. “Sinioro Quisoso imarai,” taꞌtonaꞌ, aporihuanaponaraihuëꞌ, Ispirito Santori co yaꞌcoancanchátërarinhuëꞌ. Napoaton Pitro, Coansha inapita oꞌmarahuatonaꞌ, Yosë nontopi Ispirito Santori yaꞌcoancantacaso marëꞌ.

¹⁷ Ina quëran sëꞌhuamotohuachinara, Ispirito Santori yaꞌcoancantërin.

^18-19 Simontaꞌ nicaton: “Caꞌtanoꞌsari sëꞌhuamotorahuatonaꞌ, Ispirito Santo ayaꞌcoancantopi,” taꞌton: —Aꞌchintoco cantaꞌ canpita pochin nii. Ina marëꞌ pahuërëꞌinquëmaꞌ. Ispirito Santo ayaꞌcoancanchi cantaꞌ, topirahuëꞌ, itërin.

²⁰ Pitrorisoꞌ itapon: —Maꞌpitacha yonquiran paya. Coriqui marëꞌ Ispirito Santo ¿yamaꞌparanco ti? Co ina marëꞌ Yosë quëtërinpoahuëꞌ. Co inasoꞌ paꞌanëhuëꞌ. Ina pochin yonquihuatan, parisitopiquë paꞌsaran. ¡Coriquirëꞌquën chachin inaquë paꞌsaran!

²¹ Co yaꞌipi cancanën quëran imaranhuëꞌ niꞌton, co Yosë noya niꞌninquënhuëꞌ.

^22-23 Paꞌpi co noyahuëꞌ yonquiran. Catinaquë tonporëso pochin ninan niꞌton, co piꞌpian tërantaꞌ Yosë yanatëranhuëꞌ. Napoaton co noyahuëꞌ yonquiransopita naniantaton, Yosë nontëquëꞌ tapona oshanën yainquitápirinquënhuëꞌ, itërin.

²⁴ —Canpitari Yosë nontocoꞌ ama ina pochin anaꞌinchincosohuëꞌ, itërin. Chiníquën paꞌyanaton, naporin.

²⁵ Ina quëran Pitro Coansharë chachin piyapiꞌsaꞌ aꞌchintantapi. Quisocristo naporinsoꞌ anitotapi. Yaꞌipi Yosë nanamën shaꞌhuitantapi. Nani shaꞌhuitohuachinara, yaꞌhuëpiꞌpaꞌ yapaantapi. Samaria parti paatonaꞌ, aꞌnaya aꞌnaya ninanoroꞌsaquë noya nanan shaꞌhuitëraꞌpiapi. Inaporatonaꞌ, Quirosarinquë cancoantapi.

Itiopia quëmapi natërinsoꞌ

²⁶ Ina quëran Sinioro anquëninëni yaꞌnotimarahuaton, Pinipi shaꞌhuitërin: “Huanirahuaton, Quirosarin quëran Casaꞌpaꞌ ira paꞌninso paꞌtëquëꞌ,” itërin. Inatohuaꞌ inotërachin yaꞌhuërin.

²⁷ Shaꞌhuitohuachina, paꞌnin. Paꞌsapirinhuëꞌ, aꞌna quëmapi quënanconin, Itiopiaquë yaꞌhuërinsoꞌ. Inasoꞌ huaꞌan. Itiopia copirno paya Cantasi itopisoari nani acorin yaꞌipi coriquinën aꞌpaicaso marëꞌ. Huaꞌansoꞌ iꞌhua Quirosarinquë pantarin Yosë chinotacaso marëꞌ.

²⁸ Nani oꞌmantaton, yaꞌhuërinꞌpaꞌ paantararin. Toronaꞌhua cahuariori quëparinquë huënsëaton, paꞌsarin. Papon pochin, Yosë quiricanën iráca Isaiasë ninshitërinsoꞌ nontë́rarin.

²⁹ Naporoꞌ Ispirito Santori Pinipi shaꞌhuitërin: “Manóton yaꞌyoranconahuaton, imaraaquëꞌ,” itërin.

³⁰ Pinipisoꞌ taꞌarahuaton, yaꞌyoranconin. Isaiasë ninshitërinsoꞌ nontaquëyaꞌ, natanin: —Nontëransoꞌ iyasha, ¿nitotëran ti? itërin.

³¹ —¡Coꞌchi iyasha, nitotërahuë paya! Co insontaꞌ aꞌchintërincohuëꞌ niꞌton, co nanitërahuëꞌ. Huëquëꞌ huënsëiquëꞌ. Shaꞌhuitoco nitochi, itërin. Napotohuachina, inaquë huënsërin. Papona pochin ninontërapi.

³² —Isoꞌ iyasha nontápirahuëꞌ, maꞌtaꞌ tápon naporinsoꞌ co nitotërahuëꞌ, itahuaton, Yosë quiricanënquë nontërinsoꞌ aꞌnotërin nontacaso marëꞌ. “Tëhuënchachin ohuica tëpacaiso marëꞌ quëpahuachinara, co mantaꞌ tëninhuëꞌ. Carniroaꞌhuanta yaꞌihuachinara, co naꞌnërinhuëꞌ. Inapochachin ina quëmapi yatëpahuachinaꞌ, co mantaꞌ taponhuëꞌ.

³³ Nonpinapipi niꞌton, coisë co noꞌtëquën shaꞌhuirinhuëꞌ. Tëpapi niꞌton, co aꞌna huiꞌnin tërantaꞌ yaꞌhuërërinhuëꞌ,” tënin quiricanënquë.

³⁴ —¿Ma quëmapitaꞌ yatëpapisoꞌ? Isaiasë nica. Aꞌna quëmapi nica. Co casoꞌ nitotërahuëꞌ. Shaꞌhuitoco cantaꞌ nitochi, itërin huaꞌani.

³⁵ “Quisoso ninoton, Isaiasë ninshitërin,” itahuaton, ina quirica chachin nontaton, yaꞌipi Quisoso nanamën aꞌchintërin.

³⁶ Nani aꞌchintohuachina, ira paꞌtapona pochin iiꞌ quënanconpi. —Niꞌquëꞌ iyasha. Iiꞌ yaꞌhuërin. Cantaꞌ aporintoco, topirahuëꞌ, itërin huaꞌani. [

³⁷ —Yaꞌipi cancanën quëran huarëꞌ natëhuatan, aporintaranquën, itërin. —Quisocristosoꞌ Yosë huiꞌnin chachin, tënahuë, tënin huaꞌan.]

³⁸ “Noyahuaꞌ,” itohuachina, toronaꞌhua asanorin. Nohuararahuatonaꞌ, cato chachin iꞌquë paꞌmapi. Inaquë aporintërin.

³⁹ Nonshipirinahuëꞌ, aꞌnanaya Pinipi ayarin. Ispirito Santori quëparin niꞌton, huaꞌani co huachi quënaninhuëꞌ. Co quënanaponahuëꞌ, noya cancantaton, paꞌnin.

⁴⁰ Pinipiso nipirinhuëꞌ, Asotoquëꞌpa yaꞌnochanin. Ina quëran paꞌsahuaton, ninanoroꞌsaquë noya nanan shaꞌhuitëraꞌpiarin. Sisariaquë huarëꞌ shaꞌhuiraꞌpiarin.