Hechos 7 - Chayahuita (Shahui)

Istipan shaꞌhuirinsoꞌ

¹ Ina quëran Corto huaꞌan chini chiníquën nanantërinsoari natanin. —¿Tëhuënchachin naporan nonapon? itërin.

² —Co onporontaꞌ api Yosë pinorahuëꞌ. Natanco, apiroꞌsaꞌ. Iyaroꞌsaꞌ canpitantaꞌ natanco noꞌtëquën shaꞌhuichinquëmaꞌ. Iráca quëran huarëꞌ shimashonënpoapita Yosë imapi. Cantaꞌ ina imarahuë. Tata Yosësoꞌ noya noya. Iráca Tata Apraan nisha noꞌpaquë yaꞌhuasoꞌ, yaꞌnotimarin. Co Aranquë paꞌshátëraponhuëꞌ, nontërin. Misopotamia parti yaꞌhuëpirinhuëꞌ, inaquë Yosëri itapon:

³ “Yaꞌhuëran quëran pipimiatëquëꞌ. Quëmopinënpitantaꞌ patomiatëquëꞌ. Aꞌna parti paaton, inaquë yaꞌhuëquëꞌ. Carinquën aꞌnotaranquën, inaquë yaꞌhuëmiatëquëꞌ,” itërin Yosëri.

⁴ Natanahuaton, Apraan pipirin. Cartia parti quëran pipirahuaton, Aranquë paꞌnin. Inaquë yaꞌhuëantapirinhuëꞌ. Ina quëran paꞌpin chiminpachina, Yosë nohuanton, Canaan parti huëꞌnin. Yaꞌhuërëhuaquë chachin huëꞌnin.

⁵ Huëꞌpirinhuëꞌ, Yosë nohuanton, co noꞌpaꞌ yaꞌhuëtërinhuëꞌ. Co piꞌpisha tërantaꞌ huaꞌanëntërinhuëꞌ. “Aꞌna tahuëri Canaan parti yaꞌhuëmiataramaꞌ. Quëma shiparinpita naꞌasahuatonaꞌ, ina noꞌpaꞌ huaꞌanëntapi,” itërin Yosëri. Co huiꞌnahuayantërasohuëꞌ, napotërin.

⁶ Ina quëran Yosëri itantarin: “Aꞌna tahuëri quëma shiparinpita nisha parti yacapataponaꞌ. Inaquë nisha piyapiꞌsari chiníquën asacatapi. Co pahuërëaponaraihuëꞌ, asacatapi. Catapini pasa piꞌipi aparisitapi.

⁷ Nipirinhuëꞌ, nisha piyapiꞌsaꞌ shiparinpita aparisitopisoꞌ anaꞌintarahuë. Ina quëran shiparinpita pipirapi. Isëquë chachin huënantahuachinaꞌ, chinotarinaco,” itërin Yosëri.

⁸ Ina quëran itantapon: “Caora nohuanto, catahuaranquën. Huiꞌnanpita, yaꞌipi shiparinpita, inapitantaꞌ catahuarahuë. Napoaton marca niacotocoꞌ imaramacosoꞌ anitotacamaso marëꞌ,” itërin. Ina quëran Apraan huiꞌnin yaꞌhuëtërin. Isaco itërin. Posa tahuëritohuachina, marca acotërin. Isaco mashotohuachina, huiꞌnin yaꞌhuëtërin. Cacopo itopi. Ina quëran inantaꞌ huiꞌninpita yaꞌhuëtantarin. Shonca catoꞌ yaꞌhuëtërin. Yaꞌipiya marca niacotëraꞌpiapi. Inapita quëran shonca catoꞌ huënton cotioroꞌsaꞌ yaꞌhuërëhuaꞌ. Inapitasoꞌ shimashonënpoaꞌ, tënëhuaꞌ.

⁹ Aꞌnaraꞌ Cosi itopi. Iinpitari apiratatonaꞌ, noꞌhuipi. Iina chachin nipirinhuëꞌ, co quëꞌyapihuëꞌ. Napoaton nisharoꞌsaꞌ yaꞌnohuachinara, paꞌanpi asacatacaiso marëꞌ. Nisha piyapiꞌsari Iquipitoꞌpaꞌ quëpapi. Yosëriso nipirinhuëꞌ catahuarin.

¹⁰ Parisitopirinhuëꞌ, nichaꞌërin. Ina nohuanton, Iquipito copirnori noya niꞌnin. “Cosi noya quëmapi. Noya yonquirin,” taꞌton, chiníquën nanan quëtërin. Yaꞌipi copirno maꞌshanënpita aꞌpairin. Yaꞌipi Iquipito piyapiꞌsaꞌ camairin.

¹¹ Naporoꞌ Iquipito parti cosharoꞌ co noya papotërinhuëꞌ. Huaꞌquiꞌ co mantaꞌ papotërinhuëꞌ niꞌton, tanarotopi. Canaan partintaꞌ capa cosharoꞌ. Shimashonënpoaꞌ co mantaꞌ yaꞌhuëtopihuëꞌ capacaisoꞌ. Parisitápi.

¹² “Iquipito parti trico yaꞌhuërin,” topiso marëꞌ Cacoposoꞌ huiꞌninpita aꞌparin cosharoꞌ paꞌanacaiso marëꞌ. Iina chachin maꞌpaponaraihuëꞌ, nani mashotërin niꞌton, co nohuitopihuëꞌ. Ina paꞌanatonaꞌ, yaꞌhuëpiꞌpaꞌ cosharoꞌ quëpaantapi capacaiso marëꞌ. Ina capatonaꞌ, nanpipi.

¹³ Ina quëran pëꞌyahuachinara, paꞌpini aꞌpaantarin. Naporoꞌ Cosiri shaꞌhuitërin. “Casoꞌ co nishacohuëꞌ. Cosico. Iyaya, itoco,” itërin. Copirnontaꞌ iinpita anohuitërin.

¹⁴ Ina quëran Cosiri paꞌpin amatërin. Yaꞌipi quëmopinënpitantaꞌ amatërin. Yaꞌipi quëran canchisë shonca aꞌnatërápo piyapi yaꞌhuërin.

¹⁵ “Huëquëꞌ, tata, isëquë yaꞌhuëaꞌahuaꞌ,” itohuachina, Cacopontaꞌ Iquipitoꞌpaꞌ paꞌmarin. Yaꞌipiya paꞌmapi. Inatohuaꞌ Cacopo chiminin. Yaꞌipi shimashonënpoantaꞌ inaquë yaꞌhuërapi quëran chiminpi.

¹⁶ Cacopo chiminpachina, nonën isëquë chachin quënantapi paꞌpitacaiso marëꞌ. Siquimoquë paꞌpitopi. Ina noꞌpa chachin iráca Apraani, amororoꞌsaꞌ paꞌantërin.

¹⁷ Yosëri chachin nani iráca Apraan shaꞌhuitërin Canaan parti huaꞌanëntacasoꞌ. Nipirinhuëꞌ, shinpita co aꞌnaroáchin panantapihuëꞌ. Huaꞌquiꞌ Iquipitoquë yaꞌhuëpi. Inaquë naꞌapi. Panantacaisoꞌ tahuëri yaꞌcaritohuachina, notohuaroꞌ israroꞌsaꞌ yaꞌhuëpi.

¹⁸ Napoin quëran Iquipito parti nisha copirno yaꞌconin. Cosisoꞌ iráca chiminin niꞌton, co nohuitërinhuëꞌ.

¹⁹ Cosi naporinsoꞌ co nitotërinhuëꞌ niꞌton, nonpintaton, israiroꞌsaꞌ aparisitërin. Ahuihuitahuaton, chiníquën asacatërin. Naporahuaton: “Quëmapiaꞌhua nasitohuachin, aipiran tëꞌyatocoꞌ chimiin,” itërin.

²⁰ Naporoꞌ, iyaroꞌsaꞌ, Moisësë nasitërin. Yosëri noya niꞌnin. Paꞌpin aꞌshinë chachin nosoropi niꞌton, cara yoqui poꞌorahuatonaꞌ, pëinënquë acanopitopi.

²¹ Ina quëran aipiran acohuachinaꞌ, Yosë nohuanton copirno huiꞌnini chachin manin asoꞌsocaso marëꞌ. Huaꞌhuin pochin niꞌnin.

²² Iquipito maistroꞌsari noya aꞌchintopi. Yaꞌipi nitotopisoꞌ aꞌchintopi. Napoaton noya noya nonin. Nani maꞌsha nicacasoꞌ nitotërin.

²³ Catapini shonca piꞌipitohuachina, aꞌnapita israiroꞌsaꞌ yonquiaton, paꞌnin niꞌtapon.

²⁴ Inaquë aꞌna Israiro quëmapi quënanconin. Co mantaꞌ onpopirinhuëꞌ, Iquipito quëmapiri ahuëaton, yatëpararin quënanconin. Quëmopinën nosoroaton, “cari iꞌhuërëchi,” tënin. Ina quëran Iquipito quëmapi ahuëaton, tëparin.

²⁵ “Israiroꞌsasoꞌ iyahuëpita. Yosë catahuaarinco inapita nichaꞌëcaꞌhuasoꞌ,” tënin Moisësë yonquinënquë. Inapitaso nipirinhuëꞌ inari nichaꞌëcasoꞌ co yonquipihuëꞌ.

²⁶ Tahuëririnquë catoꞌ israiroꞌsa capini niahuërapi, Moisësëri quënanconin. “¿Onpoatomataꞌ canpita capini niahuëaramaꞌ? Nanan anoyatocoꞌ,” itërin.

²⁷ Ahuëtonaꞌpiso nipirinhuëꞌ co nohuantërinhuëꞌ natëcasoꞌ. “¿Intaꞌ huaꞌan acorinquën? Co coisë pochin shaꞌhuitancoisoꞌ yaꞌhuërinhuëꞌ.

²⁸ Iꞌhuara Iquipito quëmapi tëparan. ¿Inapochachin cantaꞌ yatëparanco ti?” itërin.

²⁹ Ina natanahuaton, tëꞌhuatërin. “Copirno natantohuachin, noꞌhuiarinco,” taꞌton, pipimiatërin huachi. Matian parti yacapatërin. Inaquë saꞌaton, catoꞌ huiꞌnin yaꞌhuëtërin.

³⁰ Catapini shonca piꞌipi Moisësë inaquë yaꞌhuërin. Ina quëran aꞌna tahuëri inotëroꞌ parti paꞌnin. Sinai motopi yaꞌcariya niꞌsoꞌ, sarsa nara orotarinsoꞌ quënanin. Inaquë chachin anquëniri yaꞌnotimarin.

³¹ Ina niꞌsahuaton, paꞌyanin. “¿Maꞌtaꞌ inasoꞌ nimara?” taꞌton, yaꞌcariconin. Naporoꞌ Yosëri itapon:

³² “Casoꞌ Yosëco. Quëma shimashonënpita chinotërinaco. Apraan, Isaco, Cacopo, inapita chinotërinaco,” itërin. Moisësë tëꞌhuataton, ropa ropátarin. Monshorahuaton, co yaniꞌninhuëꞌ.

³³ Ina quëran Yosëri itantarin: “Sapatën ocoiquëꞌ. Isëquë nontaranquën niꞌton, isëquë chachin chinotancosoꞌ yaꞌhuërin, tënahuë.

³⁴ Piyapinëhuëpita Iquipitoquë yaꞌhuëpirinahuëꞌ, parisitápi niꞌnahuë. Chiníquën aparisitopi niꞌton, tarëtápi, natanahuë. Napoaton nichaꞌësarahuë huachi. Huëquëꞌ inatohuaꞌ aꞌpaꞌinquën nichaꞌëcamaso marëꞌ,” itantarin.

³⁵ Napoaton Moisësë inatohua chachin paantarin. Iráca israiroꞌsaꞌ yacatahuapirinhuëꞌ, co yanatëpihuëꞌ. “¿Intaꞌ huaꞌan acorinquën? Co coisë pochin shaꞌhuitancoisoꞌ yaꞌhuërinhuëꞌ,” itopi. Yosëso nipirinhuëꞌ Moisësë chachin huaꞌan acorin. Naraꞌhuaya quëran anquëniri yaꞌnotasoꞌ, Yosëri shaꞌhuitërin inapita nichaꞌëcaso marëꞌ.

³⁶ Ina quëran Iquipitoquë paantarahuaton, nani maꞌsha Yosë pochin ninin, sacaiꞌ nininsopita. Inapoaton, Iquipito quëran ocoirahuaton, nichaꞌërin. Inapochachin Quëhuai marëquë, inotëro parti inaquëpita Yosë pochin ninin. Catapini shonca piꞌipi inaporin.

³⁷ Moisësëri chachin inapita itërin: “Aꞌna tahuëri Yosë nohuanton, aꞌna pënëntonaꞌpi yaꞌhuapon, ca pochin nininsoꞌ. Inantaꞌ Israiro quëmapi nisarin,” tënin.

³⁸ Iráca inotëro parti shimashonënpoaꞌ niyontonpachinara, Moisësëri Yosë nanamën anitotërin. Sinai motopiquë paꞌpachina, anquëniri nontërin. Yosë nanamën shaꞌhuitërin noya nanpicaiso marëꞌ. Canpoa marëntaꞌ shaꞌhuitërin.

³⁹ Shimashonënpoaso nipirinhuëꞌ co nohuantopihuëꞌ Moisësë natëcaisoꞌ. Yaaꞌpopi. Iquipito parti naꞌhuanatonaꞌ, inatohuaꞌ yapaꞌmantapi.

⁴⁰ Napoaton Moisësë motopiquë yaꞌhuasoꞌ, iin, Aaron itopisoꞌ, nontopi. “Mamanshiroꞌsaꞌ nitocoi, ina imahuaꞌ. Moisësë Iquipito quëran ocoipirinpoahuëꞌ, ¿intohuasoꞌ paꞌmara?” taꞌtonaꞌ, mamanshi nipi.

⁴¹ Ohuacaꞌhuaya pochin nininso nipi. Maꞌsha tëparahuatonaꞌ, mamanshi moshapi. Inahuara nipisoꞌ niponahuëꞌ, paꞌyatatonaꞌ pita nipi.

⁴² Napoaton Yosëri tananpitërin. Tananpitohuachina, maꞌsha inápaquë yaꞌhuërinsopita moshapi. Piꞌi, yoqui, tayora, inapita moshapi. Pënëntonaꞌpi iráca Yosë quiricanënquë ninshitaton, tapon: “Israiroꞌsaꞌ nontaton, Yosëri itërin: ‘Catapini shonca piꞌipi inotëro parti paasëmaꞌ maꞌsha tëpahuatamara, co chinotatomaco naporamahuëꞌ.

⁴³ Nisha piyapiroꞌsaꞌ moshapisoꞌ yonquiramaꞌ. Moroco artaronën quëparahuatomaꞌ, ina chinotëramaꞌ. Aꞌna tayorantaꞌ mosharamaꞌ, Nipan itopisoꞌ. Napoaton anaꞌintaranquëmaꞌ. Ca nohuanton, inimicoroꞌsaꞌ huëꞌsahuatonaꞌ, minsëarinënquëmaꞌ. Papironia aquëtëꞌ quëpararinënquëmaꞌ,’ itërin Yosëri,” tënin.

⁴⁴ Shimashonënpoapita iráca inotëro parti pacaponaꞌ, Yosë chinotacaso nëꞌmëtëꞌ pëi quëparápi. Yosëri chachin Moisësë shaꞌhuitërin ina pochin nicatonaꞌ, chinotacaiso marëꞌ. Aꞌnotërinso pochachin nipi. Inaquë Yosë pënëntërinso nanan ninshitërinsoꞌ yaꞌhuërin.

⁴⁵ Ina quëran huiꞌninpitantaꞌ inachachin pëiꞌ yaꞌhuëtopi. Nisha piyapiꞌsaꞌ isëquë yaꞌhuëpirinahuëꞌ, Yosë nohuanton, aꞌpapi. Cosoiri minsëhuachina, aꞌpapi isëquë yaꞌhuëcaiso marëꞌ. Ina pëi chachin isëquë quëpi Yosë chinotacaiso marëꞌ. Tapi huaꞌan yaꞌconaquë huarëꞌ ina pëiquë Yosë chinotopi.

⁴⁶ Yosëri noya catahuarin niꞌton, Tapi noya huaꞌanëntërin. Inari pancana yapëitopirinhuëꞌ, co Yosë nohuantërinhuëꞌ.

⁴⁷ Ina quëran huiꞌnin Saromon itopisoꞌ, panca pëiꞌ naꞌpi quëran ninin inaquë chinotacaiso marëꞌ.

⁴⁸ Nipirinhuëꞌ, Yosësoꞌ chini chiníquën nanantërin. Co nipisoꞌ pëiquëráchin yaꞌhuërinhuëꞌ. Pënëntonaꞌpi inachachin shaꞌhuitërinpoaꞌ:

⁴⁹ “Yosëri itapon: Inápaquë huënsërahuë huaꞌanëntaꞌhuaso marëꞌ. Isoroꞌpantaꞌ nantëhuë ayaꞌnanahuëquë pochin nitërahuë. ¿Onpopintaꞌ yapëirapipiramacohuëꞌ? ¿Insëquë chachintaꞌ acotapomaco yaꞌhuëcaꞌhuaso marëꞌ? Co pëiquëráchin yaꞌhuarahuëꞌ.

⁵⁰ Cari yaꞌipi maꞌsha ninahuë, itërin Yosëri,” tënin.

⁵¹ Canpitaso nipirinhuëꞌ co piꞌpisha tërantaꞌ yanatëtëramahuëꞌ. Co natantochináchinhuëꞌ cancantëramaꞌ. Co onporontaꞌ Ispirito Santo yanatëramahuëꞌ. Iráca shimashonëmapita co noyahuëꞌ cancantopi. Inapita quëpatomaꞌ, inapochachin cancantëramaꞌ.

⁵² Iráca quëran huarëꞌ naꞌa pënëntonaꞌpiroꞌsaꞌ pënëntopirinahuëꞌ, ¿insotaꞌ shimashonëmapitari noya niꞌpi? Yaꞌipiya aparisitopi. “Aꞌna tahuëri noya noya nininsoꞌ oꞌmararin,” topachinara, noꞌtëquën ninopirinahuëꞌ, tëpapi. Ina quëran Cristo chachin oꞌmahuachina, shaꞌhuirapitomaꞌ, atëpatëramaꞌ.

⁵³ Yosë iráca pënëntërinsoꞌ anquëniri chachin shaꞌhuitopirinquëmahuëꞌ, canpitasoꞌ co natëramahuëꞌ, itërin Istipani.

Istipan tëpapisoꞌ

⁵⁴ Natanahuatonaꞌ, chiníquën noꞌhuitonaꞌ, yatëpapi.

⁵⁵ Istipanso nipirinhuëꞌ Ispirito Santori noyá yaꞌcoancantërin niꞌton, inápaquë nëꞌpëtërin. Yosë yaꞌhuërinso chachin niꞌnin. Huënaráchin huënaráchin yaꞌnorin. Quisoso Yosë inchinanën quëran huaniárin, niꞌnin.

⁵⁶ —Niꞌcochi iyaroꞌsaꞌ. Piꞌiroꞌtë niiꞌsoatërin niꞌnahuë. Quisoso chachin Yosë inchinanën quëran huaniarin, quënanahuë, itërin Istipani.

⁵⁷ Ina natantahuatonaꞌ, nipicopihuëratëtopi. Chiníquën noꞌhuitonaꞌ, aꞌnaroáchin maconpi.

⁵⁸ Ninano quëran quëparahuatonaꞌ, naꞌpiquë tëꞌyararapi. Shaꞌhuirapipisopitasoꞌ, aipi aꞌmopisoꞌ ocoirahuatonaꞌ, aꞌna huiꞌnapi Saono itopisoꞌ quëtopi aꞌpaicaso marëꞌ.

⁵⁹ Tëꞌyarasoiꞌ, Istipansoꞌ chiníquën parisitaponahuëꞌ, Quisoso nontërin: “Huaꞌyanëhuë Sinioro matahuatonco, quëpaquëꞌ,” itërin.

⁶⁰ Ina quëran isonahuaton, chiníquën itantarin: “Tëparinacoso marëꞌ, ama Sinioro isopita anaꞌintëquësohuëꞌ,” itërin. Ina tosahuaton, chiminin.